LIVE TV
കൊച്ചി: സിഎംആര്എല്ലിന്റെ മുഴുവന് സാമ്പത്തിക ഇടപാടുകളും അന്വേഷണ പരിധിയില് എന്ന് എന്ഫോഴ്സ്മെന്റ് ഡയറക്ട്രേറ്റ്. മുഖ്യമന്ത്രിയുടെ മകള് വീണയുടെ കമ്പനിയായ എക്സാലോജിക്കുമായി നടത്തിയ സാമ്പത്തിക ഇടപാടുകളിലെ അന്വേഷണം മാത്രമല്ല, സിഎംആര്എല്ലുമായി മറ്റു രാഷ്ട്രീയ നേതാക്കളും പ്രമുഖരും നടത്തിയ ഇടപാടുകളും അന്വേഷണ പരിധിയിലാണെന്നാണ് ഇ ഡി വ്യക്തമാക്കുന്നത്. സിഎംആര്എല്ലിന്റെ ഡയറിയിലുള്ള പേരുകള് കേന്ദ്രീകരിച്ചും അന്വേഷണം നടക്കും.
പി വി (പിണറായി വിജയന്), ഒ സി (ഉമ്മന്ചാണ്ടി), ആര് സി ( രമേശ് ചെന്നിത്തല), കെ കെ ( കുഞ്ഞാലിക്കുട്ടി), ഐ കെ ( ഇബ്രാഹിം കുഞ്ഞ്) എന്നിവരുടെ പേരുകളായിരുന്നു സിഎംആർഎൽ ഡയറിയിൽ ഉണ്ടായിരുന്നത്. സിഎംആര്എല് സിഎഫ്ഒ കെ സി സുരേഷ് കുമാറിന്റെ വസതിയില് ആദായ നികുതി വകുപ്പ് നടത്തിയ പരിശോധനയില് കണ്ടെത്തിയ ഡയറിയിലായിരുന്നു യുഡിഎഫ് നേതാക്കളുടെയും പേര് ഉള്ളത്.
അതേസമയം സിഎംആർഎൽ-എക്സാലോജിക് സാമ്പത്തിക ഇടപാട് കേസിൽ ഇന്ന് പ്രതിപക്ഷ നേതാവ് പിണറായി വിജയന്റെ വീട്ടിലടക്കം കേരളത്തിലുടനീളം നടക്കുന്ന റെയ്ഡുമായി ബന്ധപ്പെട്ട ഒരു വിവരവും ആഭ്യന്തര വകുപ്പിനെ അറിയിച്ചിട്ടില്ലെന്നാണ് മന്ത്രി രമേശ് ചെന്നിത്തല പ്രതികരിച്ചത്. റെയ്ഡിനെക്കുറിച്ച് ഒരു വിവരവും ആഭ്യന്തര വകുപ്പിനോ പൊലീസിനോ ലഭിച്ചിട്ടില്ല. മുഖ്യമന്ത്രി ഡല്ഹിയില്പോയി പ്രധാനമന്ത്രിയെ കാണുന്നത് സാധാരണ നടപടിയാണ്. അതിനെ ഇതുമായി കൂട്ടിക്കുഴയ്ക്കുന്നത് രാഷ്ട്രീയ ഉദ്ദേശത്തോടെയാണ്. റെയ്ഡ് സംബന്ധിച്ച് ഒരു വിവരം ലഭിച്ചില്ലെന്നാണ് ഡിജിപിയോട് വിവരം തേടിയപ്പോള് പറഞ്ഞതെന്നും രമേശ് ചെന്നിത്തല പറഞ്ഞു.
കോണ്ഗ്രസും ബിജെപിയും അറിഞ്ഞുകൊണ്ടാണ് നിലവിലെ ഇ ഡി പരിശോധന എന്നത് സ്ഥിരം പല്ലവിയാണ്. അത്തരം പ്രചരണങ്ങള് കടന്നകൈ ആകും. കൂട്ടുകെട്ടുണ്ടാക്കിയവര്ക്ക് എന്ത് സംഭവിച്ചുവെന്ന് അറിയില്ലെന്നും രമേശ് ചെന്നിത്തല പറഞ്ഞു.
Content Highlights: The Enforcement Directorate is expanding its probe in the CMRL case by focusing on names mentioned in the CMRL diary and alleged financial dealings involving leaders and prominent individuals
