LIVE TV
ഐപിഎൽ 2026 സീസൺ അതിന്റെ നിർണ്ണായക ഘട്ടത്തിലേക്ക് കടക്കുമ്പോൾ ക്രിക്കറ്റ് ലോകം മുഴുവൻ ഉറ്റുനോക്കുന്നത് ചെന്നൈ സൂപ്പർ കിംഗ്സിന്റെ പ്ലേ ഓഫ് സാധ്യതകളിലേക്കാണ്. റോയൽ ചലഞ്ഞേഴ്സ് ബംഗളൂരു കഴിഞ്ഞ മത്സരത്തിൽ ലഖ്നൗവിനോട് പരാജയപ്പെട്ടത് പോയിന്റ് പട്ടികയിൽ ചെന്നൈയ്ക്ക് വലിയ ആശ്വാസമാണ് നൽകിയിരിക്കുന്നത്. നായകൻ റുതുരാജ് ഗെയ്ക്വാദും മലയാളി ബാറ്റിംഗ് വിസ്മയം സഞ്ജു സാംസണും മികച്ച ഫോമിൽ തുടരുന്നത് ചെന്നൈ ആരാധകർക്ക് വരാനിരിക്കുന്ന മത്സരങ്ങളിൽ വലിയ പ്രതീക്ഷ നൽകുന്നു.
നിലവിൽ 14 പോയിന്റുള്ള സൺറൈസേഴ്സ് ഹൈദരാബാദ് പ്ലേ ഓഫ് ബെർത്തിന് തൊട്ടരികിലാണ്. ഒരു വിജയം കൂടി നേടിയാൽ അവർക്ക് ടോപ്പ് 4-ൽ ഇടം ഉറപ്പിക്കാം. മറുഭാഗത്ത് ടൂർണമെന്റിന്റെ ആദ്യ പകുതിയിൽ അപരാജിതരായി കുതിച്ച പഞ്ചാബ് കിംഗ്സ് ഇപ്പോൾ 13 പോയിന്റുമായി പ്രതിസന്ധിയിലാണ്. കഴിഞ്ഞ മൂന്ന് മത്സരങ്ങളിലും പരാജയപ്പെട്ട പഞ്ചാബിന് ഇനി പ്ലേ ഓഫിലെത്താൻ ശേഷിക്കുന്ന നാല് മത്സരങ്ങളിൽ രണ്ടെണ്ണമെങ്കിലും ജയിക്കേണ്ടി വരും.
രാജസ്ഥാൻ റോയൽസിനാകട്ടെ ശേഷിക്കുന്ന നാല് മത്സരങ്ങളിൽ മൂന്നെണ്ണത്തിലും വിജയിച്ചാൽ മാത്രമേ സുരക്ഷിതമായ ഒരു സ്ഥാനത്തെത്താൻ സാധിക്കൂ. ആർസിബിയുടെ പരാജയം ഈ ടീമുകൾക്കെല്ലാം ഒരുപോലെ സമ്മർദ്ദം കുറച്ചിട്ടുണ്ട്.
നിലവിൽ 10 മത്സരങ്ങളിൽ നിന്ന് 10 പോയിന്റുള്ള ചെന്നൈയ്ക്ക് പ്ലേ ഓഫ് ഉറപ്പിക്കാൻ 16 പോയിന്റാണ് സുരക്ഷിതമായ മാർക്ക്. ഇതിനായി ശേഷിക്കുന്ന നാല് മത്സരങ്ങളിൽ മൂന്നെണ്ണം വിജയിക്കണം. എന്നാൽ ആർസിബി വരാനിരിക്കുന്ന മത്സരങ്ങളിലും പരാജയപ്പെട്ടാൽ 14 പോയിന്റോടെ പോലും ചെന്നൈയ്ക്ക് പ്ലേ ഓഫിൽ കടക്കാൻ സാധിച്ചേക്കാം. ലഖ്നൗ സൂപ്പർ ജയന്റ്സിനെതിരായ അടുത്ത രണ്ട് മത്സരങ്ങൾ മികച്ച റൺറേറ്റിൽ വിജയിക്കുക എന്നതാണ് ചെന്നൈയ്ക്ക് മുന്നിലുള്ള പ്രധാന വെല്ലുവിളി. ഇത് സാധ്യമായാൽ പ്ലേ ഓഫിൽ ചെന്നൈയ്ക്ക് വലിയ അത്ഭുതങ്ങൾ സൃഷ്ടിക്കാൻ കഴിയും.
ഈ സീസണിൽ ചെന്നൈയുടെ ബാറ്റിംഗിന്റെ നട്ടെല്ലായി മാറിയിരിക്കുന്നത് സഞ്ജു സാംസണും റുതുരാജ് ഗെയ്ക്വാദുമാണ്. സഞ്ജു ഇതിനോടകം തന്നെ രണ്ട് സെഞ്ച്വറികൾ നേടി തന്റെ കരിയറിലെ ഏറ്റവും മികച്ച ഫോമിലാണെന്ന് തെളിയിച്ചു കഴിഞ്ഞു. ഡൽഹിക്കെതിരായ മത്സരത്തിൽ പുറത്താകാതെ നേടിയ 87 റൺസ് ചെന്നൈയുടെ ആത്മവിശ്വാസം വർധിപ്പിച്ചിട്ടുണ്ട്.
റുതുരാജ് നായകൻ എന്ന നിലയിൽ നടത്തുന്ന കൃത്യമായ തീരുമാനങ്ങളും ചെന്നൈയ്ക്ക് മുതൽക്കൂട്ടാണ്. വരാനിരിക്കുന്ന മത്സരങ്ങളെ ഓരോന്നിനെയും 'നോക്കൗട്ട്' മത്സരങ്ങളായി കണ്ട് മുന്നോട്ട് പോകാനാണ് ടീം മാനേജ്മെന്റ് ലക്ഷ്യമിടുന്നത്. കൃത്യമായ പ്ലാനിംഗിലൂടെ നീങ്ങിയാൽ ചെന്നൈയ്ക്ക് ടോപ്പ് 2-ൽ എത്തി ക്വാളിഫയർ 1 കളിക്കാനുള്ള സാധ്യതയും നിലനിൽക്കുന്നുണ്ട്. ധോണിയുടെ അഭാവത്തിൽ ചെന്നൈ പ്ലേ ഓഫ് കളിക്കുമോ എന്നാണ് ആരാധകർ ഉറ്റുനോക്കുന്നത്.
Content highlights:csk playoff chances increase after rcb loss ipl 2026 points table analysis
