LIVE TV
വിമാനത്തില് യാത്ര ചെയ്യുമ്പോഴെല്ലാം സീറ്റുകള്ക്ക് സമീപം ലൈഫ് ജാക്കറ്റുകള് കാണാറുണ്ട്. പക്ഷേ പാരച്യൂട്ടുകള് ഉണ്ടാകാറില്ല അല്ലേ?. വിമാനത്തിന് തകരാറുകള് സംഭവിച്ചാല് യാത്രക്കാര്ക്ക് പാരച്യൂട്ടുകള് നല്കാത്തത് എന്തുകൊണ്ട്? ആളുകള്ക്ക് പാരച്യൂട്ടുകള് ധരിച്ച് ചാടാന് കഴിയാത്തത് എന്തുകൊണ്ട്? ഇതിന് പിന്നില് ചില കാരണങ്ങളുണ്ട്.
ആളുകള് വിമാനങ്ങളില് നിന്ന് എളുപ്പത്തില് ചാടുന്നതായി സിനിമകളിലൊക്കെ കണ്ടിട്ടുണ്ടാവും. ആഹാ സംഗതി സിംപിളാണല്ലോ എന്ന് തോന്നുമെങ്കിലും യഥാര്ത്ഥത്തില് അങ്ങനെ ചെയ്യുന്നത് അത്ര നിസ്സാരമല്ല. വളരെ ബുദ്ധിമുട്ടുള്ളതും അപകടകരവുമായ പ്രവൃത്തിയാണ്. സാധാരണ യാത്രാ വിമാനങ്ങള് ഏകദേശം 30,000 അടിയോ അതില് കൂടുതലോ ഉയരത്തില് പറക്കുന്നു. അത്തരം ഉയരങ്ങളില് വായു നേര്ത്തതും തണുപ്പ് വളരെ കഠിനവുമാണ്. പ്രത്യേക പരിശീലനം ഇല്ലാത്തവരും ഓക്സിജന്റെ അഭാവത്തിലും ഇങ്ങനെ ചാടുന്നത് അത്യന്തം അപകടകരമാണ്.
വിമാനത്തിന്റെ വേഗത മണിക്കൂറില് 800 കിലോമീറ്റര് വരെ എത്താം. ഇത്രയും ഉയര്ന്ന വേഗതയില് വാതില് തുറന്ന് പുറത്തേക്ക് ചാടുന്നത് എളുപ്പമല്ല. വായു മര്ദ്ദം കാരണം പറക്കുന്ന സമയത്ത് തുറക്കാന് വളരെ ബുദ്ധിമുട്ടുള്ള രീതിയിലാണ് അതിന്റെ വാതിലുകള് രൂപകല്പ്പന ചെയ്തിരിക്കുന്നത്. കൂടാതെ സാധാരണക്കാര്ക്ക് പാരച്യൂട്ട് ഉപയോഗിച്ച് ചാടാന് പരിശീലനവും ഇല്ല. പരിശീലനമില്ലാതെ പാരച്യൂട്ട് ഉപയോഗിച്ച് ചാടുന്നത് ജീവന് രക്ഷിക്കുന്നതിനേക്കാള് വലിയ അപകടം വരുത്തിവയ്ക്കും.
വിമാനയാത്ര തുടങ്ങുമ്പോഴും അവസാനിക്കുമ്പോഴും ആണ് മിക്ക അപകടങ്ങളും സംഭവിക്കുന്നത്.
അതായത് പറന്നുയരുമ്പോഴോ ലാന്ഡിംഗ് സമയത്തോ ആണ് പല വിമാന അപകടങ്ങളും സംഭവിക്കുന്നര്ഥം. ആ സമയത്ത് വിമാനം നിലത്തിന് വളരെ അടുത്തായിരിക്കും. പാരച്യൂട്ട് ഉപയോഗിക്കുന്നതിന് കുറച്ച് ഉയരവും സമയവും ആവശ്യമുണ്ട്. അങ്ങനെയുള്ള സാഹചര്യങ്ങളിലെ അത് ഉപയോഗിക്കാന് സാധിക്കൂ. പറന്നുയരുമ്പോഴും ലാന്ഡ് ചെയ്യുമ്പോഴും വിമാനം നിലത്തിനടുത്താണെങ്കില്, യാത്രക്കാര്ക്ക് പാരച്യൂട്ട് ഉപയോഗിക്കാനുള്ള സമയം ലഭിക്കില്ല.
ഒരു വിമാനത്തിന് 150 നും 300 നും ഇടയില് യാത്രക്കാരെ വഹിക്കാന് കഴിയും. പ്രതിസന്ധി ഘട്ടത്തില് പാരച്യൂട്ടുകള് ധരിച്ച് എല്ലാ യാത്രക്കാരും ഓരോരുത്തരായി പുറത്തേക്ക് ചാടുകയാണെങ്കില് അത് വളരെ സമയമെടുക്കുന്ന പ്രവൃത്തിയാണ്. പല യാത്രക്കാര്ക്കും ചാടാന് പോലും കഴിയണമെന്നില്ല. വിമാനം സുരക്ഷിതമായി ലാന്ഡ് ചെയ്യുക എന്നത് വളരെ എളുപ്പവും സുരക്ഷിതവുമായ ഒരു ഓപ്ഷനാണ്.
ഇന്നത്തെ വിമാനങ്ങള് വളരെയധികം സുരക്ഷിതമായി നിര്മ്മിച്ചവയാണ്. എഞ്ചിന് തകരാറുകളോ മറ്റ് പ്രശ്നങ്ങളോ ഉണ്ടായാല് പൈലറ്റുമാര്ക്ക് പലപ്പോഴും അടുത്തുള്ള വിമാനത്താവളത്തില് വിമാനം സുരക്ഷിതമായി ലാന്ഡ് ചെയ്യാന് കഴിയും. അത്തരം സാഹചര്യങ്ങള് കൈകാര്യം ചെയ്യാന് പൈലറ്റുമാര്ക്ക് പരിശീലനം നല്കിയിട്ടുമുണ്ട്.
ഓരോ യാത്രക്കാരനും വെവ്വേറെ പാരച്യൂട്ട് ഉണ്ടായിരുന്നെങ്കില് വിമാനത്തിന്റെ ഭാരവും അതിനനുസരിച്ച് വര്ദ്ധിക്കുമായിരുന്നു. ഈ വര്ദ്ധിച്ച ഭാരം പറക്കാന് കൂടുതല് ഇന്ധനം ആവശ്യമാക്കും. ഇത് ചെലവ് വര്ദ്ധിപ്പിക്കും. മാത്രമല്ല ഇത്രയധികം പാരച്യൂട്ടുകള് വാങ്ങുക, പരിശോധിക്കുക, അവ മികച്ച അവസ്ഥയില് നിലനിര്ത്തുക എന്നീ കാര്യങ്ങളൊക്കെ ബുദ്ധിമുട്ടായിരിക്കും. പകരം വിമാന സുരക്ഷ, എഞ്ചിന് പരിശോധനകള്, പൈലറ്റ് പരിശീലനം എന്നിവയില് എയര്ലൈനുകള് കൂടുതല് ശ്രദ്ധ കേന്ദ്രീകരിക്കുന്നു. ഈ നടപടികള്ക്ക് യാത്രക്കാരെ സുരക്ഷിതരാക്കും.
അതുകൊണ്ടാണ് വിമാനങ്ങളില് ഓരോ യാത്രക്കാരനും പാരച്യൂട്ടുകള്ക്ക് പകരം ലൈഫ് ജാക്കറ്റുകള്, ഓക്സിജന് മാസ്കുകള്, സുരക്ഷിതമായ ലാന്ഡിംഗ് സിസ്റ്റം എന്നിവ സജ്ജീകരിച്ചിരിക്കുന്നത്. അടിയന്തര സാഹചര്യങ്ങളില്, വിമാനത്തില് നിന്ന് യാത്രക്കാരെ ചാടുന്നതിനേക്കാള് സുരക്ഷിതമായി ലാന്ഡിംഗ് ചെയ്യുന്നതാണ് കൂടുതല് ഉചിതവും സുരക്ഷിതവുമായ സമീപനമായി കണക്കാക്കുന്നത്.
Content Highlights :Why are passengers not provided with parachutes in the event of a plane malfunction?
