LIVE TV
ആരോഗ്യകരമായ ഭക്ഷണക്രമത്തില്‍ പച്ചക്കറികള്‍ക്ക് പ്രത്യേക സ്ഥാനമുണ്ട്. വിറ്റാമിനുകളും ധാതുക്കളും നാരുകളും ലഭിക്കാന്‍ പച്ചക്കറികള്‍ പതിവായി കഴിക്കണമെന്ന് ആരോഗ്യവിദഗ്ധര്‍ നിര്‍ദേശിക്കാറുണ്ട്. എന്നാല്‍ പച്ചക്കറികള്‍ വാങ്ങുന്നതുപോലെ തന്നെ പ്രധാനമാണ് അവ വൃത്തിയാക്കി പാകം ചെയ്യുന്നതും. പുറമേ കാണുന്ന അഴുക്ക് നീക്കിയതുകൊണ്ട് മാത്രം എല്ലാ ഭാഗങ്ങളും വൃത്തിയായെന്ന് ഉറപ്പിക്കാനാവില്ല. പ്രത്യേകിച്ച് അടുങ്ങിയ ഇലകള്‍ ഉള്ളതും ചെറിയ വിടവുകളും മടക്കുകളുമുള്ളതുമായ പച്ചക്കറികളില്‍ മണ്ണും മറ്റ് മാലിന്യങ്ങളും കുടുങ്ങിയിരിക്കാം. അതിനാല്‍ ചില പച്ചക്കറികള്‍ കഴുകുമ്പോള്‍ അധിക ശ്രദ്ധ ആവശ്യമാണ്.
കോളിഫ്‌ളവറിന്റെ പൂക്കള്‍ പോലെയുള്ള ഘടനയ്ക്കുള്ളില്‍ മണ്ണും ചെറിയ പ്രാണികളും കുടുങ്ങിയിരിക്കാന്‍ സാധ്യതയുണ്ട്. പുറമേ വൃത്തിയുള്ളതായി തോന്നിയാലും ഉള്ളിലെ എല്ലാ ഭാഗങ്ങളും പരിശോധിക്കേണ്ടതുണ്ട്. കോളിഫ്‌ളവര്‍ ചെറിയ കഷണങ്ങളാക്കി മുറിച്ചശേഷം ശുദ്ധമായ ഒഴുകുന്ന വെള്ളത്തില്‍ നന്നായി കഴുകുക. പൂക്കള്‍ക്കിടയില്‍ അഴുക്കുണ്ടോ എന്ന് പരിശോധിക്കണം. ആവശ്യമെങ്കില്‍ ചെറിയ കഷണങ്ങളാക്കി വീണ്ടും കഴുകാം. പാകം ചെയ്യുമ്പോള്‍ നന്നായി വേവിക്കാനും ശ്രദ്ധിക്കുക.
കാബേജിന്റെ ഇലകള്‍ ഒന്നിനുമുകളില്‍ ഒന്നായി അടുക്കിയിരിക്കുന്നതിനാല്‍ അവയ്ക്കിടയില്‍ മണ്ണും അഴുക്കും കുടുങ്ങാം. പുറത്തെ ഇലകളില്‍ മാത്രമല്ല, അകത്തെ ഇലകളിലും ശ്രദ്ധിക്കണം. പുറത്തെ കേടായ ഇലകള്‍ നീക്കം ചെയ്യുക. തുടര്‍ന്ന് ഇലകള്‍ വേര്‍തിരിച്ച് ശുദ്ധമായ വെള്ളത്തില്‍ കഴുകാം. കാബേജ് മുറിക്കുന്നതിന് മുമ്പ് പുറംഭാഗവും വൃത്തിയാക്കണം. അരിഞ്ഞശേഷം ആവശ്യമായ രീതിയില്‍ വീണ്ടും കഴുകിയശേഷം പാകം ചെയ്യാം.
ചീര, മുരിങ്ങയില പോലുള്ള ഇലക്കറികളില്‍ മണ്ണും മണലും കുടുങ്ങാന്‍ സാധ്യതയുണ്ട്. ഇലകളുടെ അടിഭാഗത്തും തണ്ടിനോട് ചേര്‍ന്ന ഭാഗങ്ങളിലും അഴുക്ക് കാണപ്പെടാം. ഇലക്കറികള്‍ ശരിയായി കഴുകാതിരിക്കുന്നത് ഭക്ഷണത്തിലൂടെ രോഗാണുക്കള്‍ ശരീരത്തിലെത്താനുള്ള സാധ്യത വര്‍ധിപ്പിക്കും. ആദ്യം കേടായ ഇലകളും വേരിനോട് ചേര്‍ന്ന അഴുക്കുള്ള ഭാഗങ്ങളും നീക്കം ചെയ്യുക. തുടര്‍ന്ന് ഇലകള്‍ വേര്‍തിരിച്ച് ഒരു പാത്രത്തിലെ ശുദ്ധജലത്തില്‍ മുക്കി സാവധാനം ഇളക്കുക. മണ്ണ് അടിയില്‍ അടിഞ്ഞുകഴിഞ്ഞാല്‍ ഇലകള്‍ മറ്റൊരു പാത്രത്തിലേക്ക് മാറ്റാം. ആവശ്യമെങ്കില്‍ രണ്ടോ മൂന്നോ തവണ ആവര്‍ത്തിക്കുക. അവസാനം ശുദ്ധജലത്തില്‍ കഴുകി വേവിച്ചെടുക്കുക.
ക്യാപ്‌സിക്കത്തിന്റെ പുറംഭാഗത്ത് പൊടിയും അഴുക്കും ഉണ്ടാകാം. മുറിക്കുമ്പോള്‍ കത്തി പുറത്തെ അഴുക്കില്‍ സ്പര്‍ശിച്ചാല്‍ അത് അകത്തേക്ക് പകരാനും സാധ്യതയുണ്ട്. വിത്തുകള്‍ക്ക് ചുറ്റുമുള്ള ഭാഗവും വൃത്തിയാക്കണം. മുറിക്കുന്നതിന് മുമ്പ് ക്യാപ്‌സിക്കം ഒഴുകുന്ന ശുദ്ധജലത്തില്‍ നന്നായി കഴുകുക. തുടര്‍ന്ന് മുറിച്ച് വിത്തുകളും ഉള്ളിലെ അവശിഷ്ടങ്ങളും നീക്കം ചെയ്യാം. ആവശ്യാനുസരണം അകത്തെ ഭാഗവും വെള്ളത്തില്‍ കഴുകുക. പച്ചയായി കഴിക്കുന്നതാണെങ്കില്‍ വൃത്തിയാക്കുന്നതില്‍ പ്രത്യേക ശ്രദ്ധ നല്‍കണം.
വഴുതനങ്ങയുടെ പുറംഭാഗം വൃത്തിയുള്ളതായി തോന്നിയാലും മുറിക്കുമ്പോള്‍ ഉള്ളില്‍ ചെറിയ പ്രാണികളോ കേടായ ഭാഗങ്ങളോ കാണപ്പെടാം. അതിനാല്‍ പാചകത്തിന് മുമ്പ് വഴുതനങ്ങ പരിശോധിക്കേണ്ടത് പ്രധാനമാണ്. മുറിക്കുന്നതിന് മുമ്പ് വഴുതനങ്ങ ശുദ്ധമായ ഒഴുകുന്ന വെള്ളത്തില്‍ കഴുകുക. തുടര്‍ന്ന് മുറിച്ച് ഉള്ളില്‍ അസാധാരണമായ കറുത്ത പാടുകളോ പ്രാണികളുടെ സാന്നിധ്യമോ ഉണ്ടോ എന്ന് പരിശോധിക്കുക. കേടായ ഭാഗങ്ങള്‍ നീക്കം ചെയ്യുക. നന്നായി കേടുപാടുകളുള്ളതോ ചീഞ്ഞതോ ആണെങ്കില്‍ ഉപയോഗിക്കാതിരിക്കുന്നതാണ് നല്ലത്.
സാലഡുകളില്‍ പച്ചയായി ഉപയോഗിക്കുന്ന ലെറ്റിയൂസ് ഇലകളില്‍ മണ്ണും രോഗാണുക്കളും കുടുങ്ങാന്‍ സാധ്യതയുണ്ട്. പാകം ചെയ്യാതെ കഴിക്കുന്നതിനാല്‍ വൃത്തിയാക്കുന്നതില്‍ കൂടുതല്‍ ശ്രദ്ധ വേണം. ഓരോ ഇലയും വേര്‍തിരിച്ച് ശുദ്ധമായ ഒഴുകുന്ന വെള്ളത്തില്‍ കഴുകുക. ഇലകളുടെ അടിഭാഗത്തും മടക്കുകളിലും അഴുക്കുണ്ടോ എന്ന് പരിശോധിക്കണം. കഴുകിയശേഷം വൃത്തിയുള്ള പാത്രത്തിലോ ടിഷ്യൂവിലോ വെച്ച് അധിക ഈര്‍പ്പം നീക്കാം.
കോളിഫ്‌ളവര്‍, കാബേജ്, ചീര തുടങ്ങിയവ ആവശ്യത്തിന് വേവിക്കുന്നത് രോഗാണുക്കളുടെ അപകടസാധ്യത കുറയ്ക്കാന്‍ സഹായിക്കും.
പച്ചക്കറികള്‍ കഴുകുന്നത് എല്ലാ കീടനാശിനി അവശിഷ്ടങ്ങളും രോഗാണുക്കളും പൂര്‍ണമായി നീക്കുമെന്ന് ഉറപ്പില്ല. എങ്കിലും ശരിയായ രീതിയില്‍ കഴുകുന്നതും വൃത്തിയുള്ള അടുക്കളശീലങ്ങള്‍ പാലിക്കുന്നതും ഭക്ഷ്യസുരക്ഷയ്ക്ക് പ്രധാനമാണ്.
Content Highlights :Even if they appear clean on the outside, soil, dirt, and small insects can hide between the leaves or within the folds of vegetables. Let’s look at six types of vegetables that require extra care when washing
