LIVE TV
കോക്രോച്ച് ജനതാപാര്ട്ടി എന്ന ഡിജിറ്റല് പ്രസ്ഥാനം നിരന്തരം വാര്ത്തകളില് ഇടംനേടിക്കൊണ്ടിരിക്കുകയാണ്. സുപ്രീം കോടതി ചീഫ് ജസ്റ്റിസ് സൂര്യകാന്ത് യുവാക്കളെ പാറ്റകളോട് ഉപമിച്ചതില് പ്രതിഷേധിച്ച് ഉയര്ന്നുവന്ന ആക്ഷേപഹാസ്യ മുന്നണിയാണ് 'കോക്രോച്ച് ജനതാ പാര്ട്ടി'. ഇത് സംബന്ധിച്ച് രാഷ്ട്രീയ കോലാഹലങ്ങള് ഒരു വശത്ത് നടക്കുന്നുണ്ടെങ്കിലും പാറ്റകള് എന്ന ജീവി വര്ഗത്തെക്കുറിച്ച് കൗതുകകരമായ പല കാര്യങ്ങളുണ്ട്. എന്തുകൊണ്ടാണ് ഇത്ര നിസ്സാരമെന്ന് തോന്നുന്ന ഈ പ്രാണി മനുഷ്യര്ക്ക് ഇത്രയധികം കൗതുകകരമായി മാറിയത്?
ഭൂമിയിലെ ഏറ്റവും അതിജീവനശേഷിയുള്ള ജീവികളില് ഒന്നാണ് പാറ്റകള് എന്ന വസ്തുതയെ ശാസ്ത്രം പിന്തുണയ്ക്കുന്നു. ശാസ്ത്രജ്ഞര് കണക്കാക്കുന്നത് ഏകദേശം 300 ദശലക്ഷം വര്ഷങ്ങളായി പാറ്റകള് ഭൂമിയില് നിലനില്ക്കുന്നുണ്ടെന്നാണ്. ദശലക്ഷക്കണക്കിന് വര്ഷങ്ങള്ക്ക് മുമ്പ് ദിനോസറുകള് പോലുള്ള ഭീമന് ജീവിവര്ഗ്ഗങ്ങള്ക്ക് പോലും വംശനാശം സംഭവിച്ചെങ്കിലും, പാറ്റകള് എല്ലാ പാരിസ്ഥിതിക ദുരന്തങ്ങളെയും അതിജീവിച്ച് ഇന്നും ജീവനോടെയുണ്ട്. ഇതിന് പിന്നിലെ കാരണം എന്താണെന്നല്ലേ?
പാറ്റകളെ സംബന്ധിച്ചുള്ള ഏറ്റവും അത്ഭുതകരമായ കാര്യങ്ങളില് ഒന്ന് തല മുറിച്ചുമാറ്റിയാലും അവയ്ക്ക് ഒരു ആഴ്ചയോളം ജീവിക്കാന് കഴിയും എന്നതാണ്. പാറ്റകള് സര്വ്വഭുക്കുകളായ ജീവികളാണ്. അതായത് അവ എന്ത് ഭക്ഷണവും കഴിക്കും. കടലാസ്, പശ, തുകല്, മുടി, അഴുകുന്ന ജൈവവസ്തുക്കള് തുടങ്ങി നിരവധി വിചിത്ര വസ്തുക്കള് ദഹിപ്പിക്കാന് പോലും അവയ്ക്ക് കഴിയും.
ഏത് പരിതസ്ഥിതിയുമായും അവ പൊരുത്തപ്പെടും. പാറ്റകള്ക്ക് ഭക്ഷണമില്ലാതെ ഏകദേശം ഒരു മാസവും വെള്ളമില്ലാതെ ഏകദേശം രണ്ടാഴ്ചയും അതിജീവിക്കാന് കഴിയും.
മനുഷ്യരെ അപേക്ഷിച്ച് വളരെ ഉയര്ന്ന അളവിലുള്ള വികിരണങ്ങളെ പോലും പാറ്റകള്ക്ക് ചെറുക്കാന് കഴിയുമെന്ന് ശാസ്ത്രജ്ഞര് കണ്ടെത്തിയിട്ടുണ്ട്. കീടനാശിനികള്ക്കും രാസവസ്തുക്കള്ക്കുമെതിരെ പോലും പ്രതിരോധിക്കാന് അവയ്ക്ക് കഴിയും. വെള്ളത്തിനെ അതിജീവിക്കാനും പാറ്റകള് വളരെ മിടുക്കരാണ്. അവയ്ക്ക് 40 മിനിറ്റ് വരെ വെള്ളത്തിനടിയില് ശ്വാസം പിടിച്ചു നിര്ത്താന് കഴിയും. ഇത് മുങ്ങിമരിക്കാനുള്ള അവയുടെ സാധ്യതയെ കുറയ്ക്കുന്നു.
ലോകമെമ്പാടും ഈ ജീവികള് വേഗത്തില് വ്യാപിക്കുന്നതിന്റെ രഹസ്യം അവയുടെ മുട്ടകള് വിരിയുന്നത് വളരെ കുറഞ്ഞ സമയതതിനുള്ളിലാണെന്നാണ്. പാറ്റയുടെ മുട്ടകള് വെറും 28 ദിവസത്തിനുള്ളില് വിരിയുന്നു. അവയില് നിന്ന് ചെറിയ കുഞ്ഞുങ്ങള് പുറത്തുവരുന്നു. വളരെ കുറഞ്ഞ സമയത്തിനുള്ളില് ഈ കുഞ്ഞുങ്ങള് മുതിര്ന്നവരായി വളരുകയും പ്രത്യുല്പാദന ശേഷി നേടുകയും ചെയ്യുന്നു.
മനുഷ്യന് അടക്കമുള്ള ഏത് ജീവിയാണെങ്കിലും തലയില്ലെങ്കില് ഉടന് മരിക്കും. കാരണം അവയുടെ ശ്വാസം നിലയ്ക്കും. പക്ഷേ പാറ്റകളുടെ കാര്യത്തില് അങ്ങനെയല്ല. ഈ ജീവി ശ്വസിക്കാന് വായയെയോ മൂക്കിനെയോ ആശ്രയിക്കുന്നില്ല. അതിന്റെ ശരീരം മുഴുവന് സ്പൈറക്കിള്സ് എന്നറിയപ്പെടുന്ന ചെറിയ ദ്വാരങ്ങളാല് മൂടപ്പെട്ടിരിക്കുന്നു. ഈ ചെറിയ ദ്വാരങ്ങളിലൂടെ വായു നേരിട്ട് പാറ്റകളുടെ ശരീരത്തിലേക്ക് എത്തുന്നു. അതുകൊണ്ടാണ് തലയില്ലെങ്കിലും ശ്വസിക്കാന് അതിന് ഒരു ബുദ്ധിമുട്ടും നേരിടേണ്ടിവരാത്തതും ഒടുവില് വിശപ്പും ദാഹവും മൂലം മാത്രം മരിക്കുന്നതും. പാറ്റകള് തണുത്ത രക്തമുള്ള ജീവികളാണ്. ഇതിനര്ത്ഥം മനുഷ്യരില് നിന്ന് വ്യത്യസ്തമായി അവയ്ക്ക് ഇടയ്ക്കിടെ ഭക്ഷണം കഴിക്കുകയോ ശരീര താപനില നിലനിര്ത്താന് ധാരാളം ഊര്ജ്ജം ഉത്പാദിപ്പിക്കുകയോ ചെയ്യേണ്ടതില്ല എന്നാണ്.
Content Highlights :Even dinosaurs became extinct, but cockroaches have survived even major natural disasters and are still alive today.
