'ഹിജാബ് നിരോധിത വസ്ത്രമല്ല'; വസ്ത്രധാരണം മൗലികാവകാശമെന്ന് കുഞ്ഞാലിക്കുട്ടി

മലപ്പുറം: ഹിജാബ് കേസില്‍ സുപ്രീകോടതി അവധാനതയോടെ ഇടപെട്ടുവെന്ന് മുസ്ലീം ലീഗ് നേതാവ് പി കെ കുഞ്ഞാലിക്കുട്ടി. വിശ്വാസത്തിന് അനുസരിച്ചുള്ള വസ്ത്രധാരണം മൗലിക അവകാശമാണ്. ലോകത്താകമാനം ഇത് അംഗീകരിക്കപ്പെട്ടിട്ടുണ്ട്. ഹിജാബ് എവിടെയും നിരോധിത വസ്ത്രമല്ലെന്നും വിവിധ മതവിഭാഗങ്ങളുടെ അവകാശങ്ങള്‍ സംരക്ഷിക്കപ്പെടണമെന്നും കുഞ്ഞാലിക്കുട്ടി പ്രതികരിച്ചു.

ഇന്ത്യയില്‍ മാത്രമുള്ള ഹിജാബ് നിരോധനം മൗലികാവകാശങ്ങളുടെ ലംഘനമാകും. വസ്ത്രധാരണ രീതിയും ഭക്ഷണ രീതിയുമൊക്കെ മൗലികാവകാശങ്ങളാണ്. ഏതെങ്കിലും വേഷത്തിനോ വിശ്വാസത്തിനോ ജീവിത രീതിക്കോ നിരോധനം ഏര്‍പ്പെടുത്തുന്നത് മൗലികാവകാശം നിരോധിക്കുന്നതിന് തുല്യമാണ്. ഹിജാബ് കേസ് വിശാലബെഞ്ചിന് വിട്ടിരിക്കുകയാണ്. വിധിക്ക് വേണ്ടി കാത്തിരിക്കുന്നുവെന്നും കുഞ്ഞാലിക്കുട്ടി പറഞ്ഞു.

കര്‍ണാടകയിലെ വിദ്യാഭ്യാസ സ്ഥാപനങ്ങളിലെ ഹിജാബ് നിരോധനം ചോദ്യം ചെയ്തുള്ള ഹര്‍ജികളില്‍ ജഡ്ജിമാരുടേത് ഭിന്നവിധിയായതിനെ തുടര്‍ന്നായിരുന്നു വിശാല ബെഞ്ചിന് വിടാന്‍ തീരുമാനിച്ചത്. ഹര്‍ജി പരിഗണിച്ച സുപ്രീംകോടതി ബെഞ്ചിലെ രണ്ട് ജഡ്ജിമാരും പ്രത്യേകമാണ് വിധി പറഞ്ഞത്. കര്‍ണാടക ഹൈക്കോടതി വിധി ജസ്റ്റിസ് ഹേമന്ത് ഗൂപ്ത ശരിവെച്ചു. എന്നാല്‍ ജസ്റ്റിസ് സുധാന്‍ഷു ധൂലിയ വിധി റദ്ദാക്കുകയായിരുന്നു.

Story Highlights: PK Kunhalikkutty Response On Hijab Case