പഴയങ്ങാടിയിൽ മുഖ്യമന്ത്രിക്കും മന്ത്രിമാർക്കും നേരെ കരിങ്കൊടി
കണ്ണൂർ: മുഖ്യമന്ത്രിക്കും മന്ത്രിമാർക്കും നേരെ കരിങ്കൊടി. കണ്ണൂർ പഴയങ്ങാടിയിലെ വെച്ച് യൂത്ത് കോൺഗ്രസ് പ്രവർത്തകരാണ് മുഖ്യമന്ത്രിക്കും മന്ത്രിമാർക്കും നേരെ കരിങ്കൊടി കാട്ടിയത്. യൂത്ത് കോൺഗ്രസ് ജില്ലാ വൈസ് പ്രസിഡന്റുമാരായ മഹിതാമോഹൻ, സുധീഷ് വെള്ളച്ചാൽ എന്നിവരുടെ നേതൃത്വത്തിൽ ആയിരുന്നു പ്രതിഷേധം നടന്നത്. കരിങ്കൊടി കാട്ടിയതിന് പിന്നാലെ യൂത്ത് കോൺഗ്രസ് പ്രവർത്തകർക്ക് ക്രൂരമർദ്ദനമേറ്റു. സിപിഐഎം പ്രവർത്തകരും മുഖ്യമന്ത്രിയുടെ കമാൻഡോ ഉദ്യോഗസ്ഥരുമാണ് മർദ്ദിച്ചത് എന്ന് യൂത്ത് കോൺഗ്രസ് പ്രവർത്തകർ അറിയിച്ചു. മർദ്ദനത്തിൽ ഗുരുതരമായി പരിക്കേറ്റ സുധീഷ് തളിപ്പറമ്പ് ലൂർദ് ആശുപത്രിയിൽ ചികിത്സയിലാണ്.
നേരത്തെ കല്ല്യാശ്ശേരിയിൽ വെച്ചും യൂത്ത് കോൺഗ്രസ് പ്രവർത്തകർ മുഖ്യമന്ത്രിയും മന്ത്രിമാരും സഞ്ചരിക്കുന്ന നവകേരള സദസ്സിന്റെ ബസിന് നേരെ കരിങ്കൊടി പ്രതിഷേധം നടത്തിയിരുന്നു. സംഭവത്തിൽ മൂന്ന് യൂത്ത് കോൺഗ്രസ് പ്രവർത്തകരെ അറസ്റ്റ് ചെയ്തു. നേരത്തെ പ്രതിഷേധ സാഹചര്യങ്ങൾ തടയുന്നതിനായി യൂത്ത് ലീഗ് പ്രവർത്തകരെയും കെ എസ് യു പ്രവർത്തകരെയുമെല്ലാം കരുതൽ തടങ്കലിലെടുത്തിരുന്നു. നാല് കെ എസ് യു പ്രവർത്തകരെയും നാല് യൂത്ത് ലീഗ് പ്രവർത്തകരെയുമാണ് വിവിധ സ്ഥലങ്ങളിൽ നിന്ന് തടങ്കലിലെടുത്തത്.
തങ്ങളെ ഡിവൈഎഫ്ഐ പ്രവർത്തകർ പൊലീസ് സ്റ്റേഷനിൽ കയറി മർദിച്ചതായും പൊലീസ് യാതൊരുവിധ നടപടികളും സ്വീകരിച്ചില്ലെന്നും കെ എസ് യു പ്രവർത്തകർ റിപ്പോർട്ടറിനോട് പറഞ്ഞു. ഇത് മാടായി കോളേജ് തിരഞ്ഞെടുപ്പിൽ കെ എസ് യു വിജയിച്ചതിന്റെ തുടർന്നുള്ള പകപോക്കലാണെന്ന് കെ എസ് യു പ്രവർത്തകർ ആരോപിച്ചു. കരിങ്കൊടി പ്രതിഷേധത്തിന്റെ സാഹചര്യത്തിൽ അടുത്ത വേദികളിൽ പൊലീസ് സുരക്ഷ വർധിപ്പിക്കാനുള്ള സാഹചര്യമാണുള്ളത്.
