LIVE TV
ഗൾഫ് കപ്പ് ഫുട്ബോൾ ഫൈനൽ മത്സരത്തിൽ യുഎഇ ദേശീയ ടീമിന് പിന്തുണയേകാൻ ആരാധകർക്കായി യുഎഇ ഫുട്ബോൾ അസോസിയേഷൻ പ്രഖ്യാപിച്ച ആറ് പ്രത്യേക വിമാനങ്ങളിലെയും സീറ്റുകൾ മിനിറ്റുകൾക്കകം വിറ്റുതീർന്നു. ഇന്ന് ഉച്ചയ്ക്ക് ഒരു മണിയോടെയാണ് ബുക്കിങ് ആരംഭിച്ചത്. എന്നാൽ, രജിസ്ട്രേഷൻ ലിങ്ക് തുറന്ന് 10 മിനിറ്റിനുള്ളിൽ തന്നെ ആറ് വിമാനങ്ങളിലെയും മുഴുവൻ സീറ്റുകളും വിറ്റഴിയുകയായിരുന്നു.
ഒക്ടോബർ ആറ് ചൊവ്വാഴ്ച യുഎഇ സമയം രാത്രി 10 മണിക്കാണ് ഗൾഫ് കപ്പിന്റെ കലാശപ്പോര്. സൗദിയിലെ ജിദ്ദയിലുള്ള പ്രിൻസ് അബ്ദുള്ള അൽ-ഫൈസൽ സ്റ്റേഡിയം ഫൈനലിന് വേദിയാകും. സൗദി അറേബ്യയാണ് ഫൈനലിൽ യുഎഇയുടെ എതിരാളി. മത്സരത്തിന് നേരിട്ടെത്തി ടീമിന് ആവേശം പകരണമെന്ന് ആഗ്രഹിക്കുന്നവർക്കായി ഞായറാഴ്ച ഉച്ചയ്ക്ക് ഒരു മണി മുതൽ വിമാനങ്ങളിൽ സീറ്റ് ബുക്ക് ചെയ്യാനുള്ള പ്രത്യേക രജിസ്ട്രേഷൻ ലിങ്ക് യുഎഇ ഫുട്ബോൾ അസോസിയേഷൻ തുറന്നുകൊടുത്തു.
ശനിയാഴ്ച നടന്ന വാശിയേറിയ സെമിഫൈനലിൽ ഒമാനെ എതിരില്ലാത്ത ഒരു ഗോളിന് മറികടന്നാണ് യുഎഇ ഫൈനലിലേക്ക് മുന്നേറിയത്. മത്സരത്തിൽ ലഭിച്ച പെനാൽറ്റി അവസരം നഷ്ടമായെങ്കിലും കളി അവസാനിക്കാൻ നിമിഷങ്ങൾ ബാക്കിനിൽക്കെ ഫോർവേഡ് ഉസ്മാൻ കമാറ നേടിയ മിന്നുന്ന ഹെഡർ ഗോളാണ് യുഎഇക്ക് വിജയം സമ്മാനിച്ചത്. 2018-ന് ശേഷം ആദ്യമായാണ് യുഎഇ ഗൾഫ് കപ്പ് ഫൈനലിൽ പ്രവേശിക്കുന്നത്. 2007, 2013 വർഷങ്ങളിലെ കിരീടനേട്ടത്തിന് ശേഷം മൂന്നാമതൊരു ഗൾഫ് കപ്പ് കൂടി സ്വന്തമാക്കുകയാണ് ടീമിന്റെ ലക്ഷ്യം.
മറുവശത്ത്, കരുത്തരായ ഖത്തറിനെ പെനാൽറ്റി ഷൂട്ടൗട്ടിൽ (3-2) മറികടന്നാണ് ആതിഥേയരായ സൗദി അറേബ്യ ഫൈനലിലെത്തിയത്. യുഎഇ ഭരണകൂടത്തിൻ്റെ സൗജന്യ വിമാനങ്ങൾക്കപ്പുറം വലിയൊരു ആരാധകക്കൂട്ടം തന്നെ ജിദ്ദയിലേക്ക് തിരിക്കുമെന്നും സ്റ്റേഡിയത്തിൽ യുഎഇക്ക് വൻ പിന്തുണ ലഭിക്കുമെന്നുമാണ് അധികൃതർ പ്രതീക്ഷിക്കുന്നത്.
Content Highlights: The six special flights arranged by the UAE Football Association to take fans to Jeddah for the Gulf Cup final against Saudi Arabia were fully booked in under 10 minutes. Registration opened at 1pm UAE time on October 4, reflecting strong demand among supporters.
