LIVE TV
ഷാർജയ്ക്കും ദുബായിക്കും ഇടയിൽ യാത്ര ചെയ്യുന്ന ആയിരക്കണക്കിന് യാത്രികർക്ക് ആശ്വാസമായി അൽ തവൂൺ തുരങ്ക പാതയുടെ ആദ്യഘട്ടം വരുന്നു. വരും നവംബറിൽ ഈ സ്വപ്ന പദ്ധതി ഗതാഗതത്തിനായി തുറന്നുകൊടുക്കുമെന്ന് ഷാർജ റോഡ്സ് ആൻഡ് ട്രാൻസ്പോർട്ട് അതോറിറ്റി വ്യക്തമാക്കി. പുതിയ തുരങ്കം പ്രവർത്തനസജ്ജമാകുന്നതോടെ ഇരു ഇമാറേറ്റുകൾക്കുമിടയിലുള്ള യാത്രാസമയത്തിൽ 85 ശതമാനം വരെ വലിയ കുറവുണ്ടാകുമെന്നാണ് അധികൃതരുടെ വിലയിരുത്തൽ.
ഷാർജയ്ക്കും ദുബായിക്കുമിടയിലുള്ള ഗതാഗത സൗകര്യങ്ങൾ കൂടുതൽ മെച്ചപ്പെടുത്തുന്നതിന്റെ ഭാഗമായാണ് ഈ വികസന പദ്ധതി നടപ്പിലാക്കുന്നത്. അൽ തവൂൺ വഴി അൽ നഹ്ദയിലേക്കും ദുബായിലേക്കും കൂടുതൽ വേഗത്തിൽ എത്തിച്ചേരാൻ ഇത് സഹായിക്കും. അൽ തവൂൺ, അൽ ഖാൻ, ഷെയ്ഖ് മുഹമ്മദ് ബിൻ സായിദ് റോഡിലേക്ക് നയിക്കുന്ന പ്രധാന ജങ്ഷനുകളെ തമ്മിൽ ബന്ധിപ്പിച്ച് ഇരു ഇമാറേറ്റുകൾക്കുമിടയിലുള്ള പ്രധാന ഗതാഗത ഇടനാഴികൾ നവീകരിക്കുകയാണ് പദ്ധതിയിലൂടെ ലക്ഷ്യമിടുന്നത്.
അൽ തവൂൺ സ്ക്വയറിൽ നിർമ്മിക്കുന്ന ഈ തുരങ്കത്തിൽ ഇരുവശത്തേക്കുമായി മൂന്ന് വരികൾ വീതമാണുള്ളത്. തിരക്കേറിയ സമയങ്ങളിൽ പോലും മണിക്കൂറിൽ ഏകദേശം 4,000 വാഹനങ്ങൾക്ക് ഇതുവഴി തടസ്സമില്ലാതെ സുഗമമായി കടന്നുപോകാൻ സാധിക്കും. നിലവിൽ നിർമ്മാണം ദ്രുതഗതിയിൽ പുരോഗമിക്കുന്ന ഈ കൂറ്റൻ പദ്ധതി 2027 ഫെബ്രുവരിയിൽ പൂർണ്ണമായും പൂർത്തിയാകുമെന്ന് അധികൃതർ അറിയിച്ചു.
ഇതിനുപുറമെ, 140 ദശലക്ഷം ദിർഹം ചെലവിൽ നിർമ്മിക്കുന്ന മറ്റൊരു പ്രധാന റോഡ് പദ്ധതിയുടെ നിർമ്മാണവും പുരോഗമിക്കുന്നുണ്ട്. ശൈഖ് ഖലീഫ ബിൻ സായിദ് സ്ട്രീറ്റിനും മലീഹ റോഡിനും ഇടയിലുള്ള ജങ്ഷൻ നവീകരിച്ച് മൂന്ന് വരി പാലം നിർമ്മിക്കുന്നതാണ് പദ്ധതി. ഇത് ശൈഖ് മുഹമ്മദ് ബിൻ സായിദ് റോഡിലേക്കുള്ള ഗതാഗതം കൂടുതൽ എളുപ്പമാക്കാനും മധ്യ ഷാർജയിൽ നിന്ന് മലീഹയിലേക്കുള്ള യാത്രാസമയം ഗണ്യമായി കുറയ്ക്കാനും ഉപകരിക്കും. നിർമ്മാണ സമയം കുറയ്ക്കാനും അസംസ്കൃത വസ്തുക്കളുടെ ഉപഭോഗം പരിമിതപ്പെടുത്താനുമായി 2021-ൽ അവതരിപ്പിച്ച പുനരുപയോഗ സാങ്കേതികവിദ്യ സംവിധാനത്തിന്റെ ഉപയോഗം അതോറിറ്റി ഇപ്പോൾ കൂടുതൽ വിപുലീകരിച്ചിട്ടുമുണ്ട്.
Content Highlights: The first phase of the Al Taawun tunnel route is expected to open in November. The project aims to reduce travel time between Sharjah and Dubai, ease congestion and improve traffic movement in the area.
