LIVE TV
യുഎഇയിലുള്ള ഇന്ത്യൻ പ്രവാസികൾക്ക് ആശ്വാസ പ്രഖ്യാപനവുമായി എയർ ഇന്ത്യ എക്സ്പ്രസ് വിമാനക്കമ്പനി. യുഎഇ തലസ്ഥാനമായ അബുദാബിയിൽ നിന്ന് ഇന്ത്യയിലെ പ്രധാന നഗരങ്ങളിലേക്ക് കൂടുതൽ നേരിട്ടുള്ള വിമാന സർവീസുകൾ കമ്പനി ആരംഭിച്ചു. യാത്രാക്കാരുടെ വർദ്ധിച്ചുവരുന്ന ആവശ്യകത പരിഗണിച്ചും ഇരുരാജ്യങ്ങൾക്കുമിടയിലുള്ള യാത്രാസൗകര്യങ്ങൾ കൂടുതൽ എളുപ്പമാക്കുന്നതിനുമാണ് ഈ പുതിയ വിപുലീകരണം.
പുതിയ ഘട്ട വിപുലീകരണത്തിന്റെ ഭാഗമായി നവി മുംബൈ, ഇൻഡോർ, ലഖ്നൗ എന്നീ നഗരങ്ങളിലേക്ക് നേരിട്ടുള്ള വിമാന സർവീസുകൾ കമ്പനി ഇതിനകം ആരംഭിച്ചു. ഇതിനുപുറമെ, വടക്കുകിഴക്കൻ സംസ്ഥാനങ്ങളിലേക്ക് നേരിട്ടുള്ള യാത്ര ഉറപ്പാക്കിക്കൊണ്ട് ഓഗസ്റ്റ് ഏഴ് മുതൽ അബുദാബിയിൽ നിന്ന് ഗുവാഹത്തിയിലേക്കും സർവീസ് ആരംഭിക്കും. ബിസിനസ്സ്, വിനോദസഞ്ചാര ആവശ്യങ്ങൾക്കായി യാത്ര ചെയ്യുന്നവരുടെ എണ്ണത്തിൽ ഉണ്ടായ വൻ വർദ്ധനവാണ് ഈ പുതിയ റൂട്ടുകൾ തുറക്കാൻ കാരണം.
അബുദാബിയിലെ സായിദ് ഇന്റർനാഷണൽ എയർപോർട്ടിൽ നിന്നാണ് ഈ പുതിയ സർവീസുകളെല്ലാം പ്രവർത്തിക്കുന്നത്. ഇന്ത്യയും യുഎഇയും തമ്മിലുള്ള വ്യോമബന്ധം കൂടുതൽ ശക്തമാക്കാനും യാത്രാസൗകര്യങ്ങൾ മെച്ചപ്പെടുത്താനും ഇത് സഹായിക്കുമെന്ന് അബുദാബി എയർപോർട്ട്സ് സിഇഒ അഹമ്മദ് ജുമാ അൽ ഷാമിസി പറഞ്ഞു. ആഗോള വ്യോമയാന, ടൂറിസം കേന്ദ്രമെന്ന നിലയിൽ അബുദാബിയുടെ പ്രാധാന്യം ഉയർത്താൻ ഈ സഹകരണം ഉപകരിക്കും.
ഇന്ത്യയ്ക്കും പശ്ചിമേഷ്യൻ രാജ്യങ്ങൾക്കുമിടയിൽ ഏറ്റവും വലിയ വിമാന ശൃംഖലയുള്ള കമ്പനികളിലൊന്നാണ് എയർ ഇന്ത്യ എക്സ്പ്രസ്. യുഎഇക്ക് പുറമെ ബഹ്റൈൻ, കുവൈറ്റ്, ഒമാൻ, ഖത്തർ, സൗദി അറേബ്യ എന്നീ ജിസിസി രാജ്യങ്ങളിലെ വിവിധ നഗരങ്ങളിലേക്ക് ഇന്ത്യയിൽ നിന്ന് കമ്പനി പ്രതിദിനം നിരവധി സർവീസുകൾ നടത്തുന്നുണ്ട്.
Content Highlights: Air India Express has announced expanded flight services to additional Indian cities. The move is expected to improve connectivity and provide more travel options for expatriates and other passengers.
