LIVE TV
യുഎഇയിൽ നിന്ന് വേനലവധിക്ക് നാട്ടിലേക്ക് മടങ്ങാൻ ഒരുങ്ങുന്ന പ്രവാസികൾക്ക് കടുത്ത തിരിച്ചടിയായി വിമാനക്കൂലിയിലെ വൻ വർദ്ധനവ്. ഓഗസ്റ്റ് മാസത്തെ യാത്രയ്ക്കായി ചില റൂട്ടുകളിൽ ഒരാൾക്ക് മടക്കയാത്രയ്ക്കടക്കം 9,000-ത്തിലേറെ ദിർഹമാണ് ഈടാക്കുന്നത്. ഇതോടെ നാലംഗങ്ങളുള്ള ഒരു കുടുംബത്തിന് ടിക്കറ്റ് ഇനത്തിൽ മാത്രം 37,000 ദിർഹം വരെ ചിലവഴിക്കേണ്ടി വരും.
യുഎഇയിൽ നിന്ന് വേനലവധിക്ക് നാട്ടിലേക്ക് മടങ്ങാൻ ഒരുങ്ങുന്ന പ്രവാസികൾക്ക് വിമാനക്കൂലിയിലെ വൻ വർദ്ധനവ് കനത്ത പ്രഹരമാണ്. ഇന്ത്യയിലെ വിവിധ നഗരങ്ങളിലേക്കുള്ള നിരക്കിൽ വൻ വ്യത്യാസമാണ് നിലവിലുള്ളത്. ഏറ്റവും ഉയർന്ന നിരക്ക് ഹൈദരാബാദിലേക്കാണ്. ഒരാൾക്ക് മടക്കയാത്രയടക്കം 9,250 ദിർഹം വേണ്ടിവരും. ദില്ലിയിലേക്ക് 9,090 ദിർഹവും കൊച്ചിയിലേക്ക് 7,800 ദിർഹം വരെയുമാണ് നിരക്ക്. എമിറേറ്റ്സ്, ഇൻഡിഗോ, സ്പൈസ് ജെറ്റ് തുടങ്ങിയ പ്രമുഖ എയർലൈനുകളിലെല്ലാം നിരക്കുകൾ കുതിച്ചുയരുകയാണ്.
യുഎഇയിലെ സ്കൂൾ അവധിക്കാലം പ്രമാണിച്ചുള്ള കനത്ത തിരക്ക് കാരണം ഭൂരിഭാഗം ഫ്ലൈറ്റുകളിലും ബുക്കിംഗ് പൂർത്തിയായിക്കഴിഞ്ഞു. വരും ദിവസങ്ങളിൽ നിരക്കുകൾ ഇനിയും ഉയർന്നേക്കാം. അതേസമയം മുംബൈ, ചെന്നൈ തുടങ്ങിയ നഗരങ്ങളിലേക്ക് താരതമ്യേന കുറഞ്ഞ നിരക്കുകൾ ലഭ്യമാണ്. മുംബൈയിലേക്ക് ചില എയർലൈനുകളിൽ 1,204 ദിർഹം മുതലും ചെന്നൈയിലേക്ക് 1,678 ദിർഹം മുതലും ടിക്കറ്റുകൾ ലഭിക്കുന്നുണ്ട്. അതായത്, ഒരു കുടുംബം ഹൈദരാബാദിലേക്ക് പോകാൻ 37,000 ദിർഹം ചിലവഴിക്കുമ്പോൾ, മുംബൈ വഴി പോകുന്നവർക്ക് 5,000 ദിർഹത്തിൽ താഴെ തുകയ്ക്ക് യാത്ര ചെയ്യാനാകും.
ഡിമാൻഡ് കൂടിയ സാഹചര്യത്തിൽ വരും ദിവസങ്ങളിൽ നിരക്കുകൾ ഇനിയും ഉയരാനാണ് സാധ്യത. ടിക്കറ്റ് വില താങ്ങാനാകാതെ പല പ്രവാസികളും ബദൽ മാർഗ്ഗങ്ങൾ തേടുകയാണ്. ദുബായിൽ നിന്ന് മുംബൈയിലെത്തി അവിടെ നിന്ന് ആഭ്യന്തര കണക്റ്റിംഗ് ഫ്ലൈറ്റുകൾ വഴി നാട്ടിലേക്ക് യാത്ര ചെയ്യുന്നത് വഴി വലിയൊരു തുക ലാഭിക്കാൻ കഴിയുമെന്നാണ് ട്രാവൽ രംഗത്തെ വിദഗ്ദ്ധർ ചൂണ്ടിക്കാണിക്കുന്നത്. യാത്രാസമയം കൂടുമെങ്കിലും സാധാരണക്കാരായ പ്രവാസികൾക്ക് ഇത് വലിയൊരു ആശ്വാസമാകും.
Content Highlights: Non-resident Indians and other expats preparing to travel home for the summer holidays are being affected by a steep rise in airline ticket prices. Increased demand and seasonal travel rush have pushed fares higher across several Gulf-India routes.
