LIVE TV
സൗദി അറേബ്യയിൽ സമീപദിവസങ്ങളിലുണ്ടായ ഹൂതി ആക്രമണങ്ങളുടെയും സുരക്ഷാ ആശങ്കകളുടെയും പശ്ചാത്തലത്തിൽ യുഎഇയിൽ നിന്നുള്ള പുതിയ ഉംറ ബുക്കിംഗുകളിൽ വൻ ഇടിവ്. യുഎഇയിൽ നിന്നുള്ള പുതിയ ഉംറ ബുക്കിംഗുകളിൽ 50 ശതമാനത്തോളം കുറവുണ്ടായതായി പ്രമുഖ ട്രാവൽ ഓപ്പറേറ്റർമാർ വ്യക്തമാക്കുന്നു. നിലവിലെ സാഹചര്യത്തിൽ കാര്യങ്ങളിൽ കൂടുതൽ വ്യക്തത വരുന്നത് വരെ പല തീർത്ഥാടകരും തങ്ങളുടെ പുതിയ യാത്രാപദ്ധതികൾ താത്കാലികമായി മാറ്റിവെച്ചിരിക്കുകയാണ്.
അതേസമയം, മുൻകൂട്ടി ബുക്ക് ചെയ്തിട്ടുള്ള യാത്രാ പ്ലാനുകളെയൊന്നും നിലവിലെ സാഹചര്യം ബാധിച്ചിട്ടില്ല. മുൻകൂട്ടി എടുത്ത ഉംറ ബുക്കിംഗുകൾ ആരും റദ്ദാക്കിയിട്ടില്ലെന്നും മുൻ നിശ്ചയിച്ച പ്രകാരം തന്നെ തീർത്ഥാടകർ യാത്ര തുടരുന്നുണ്ടെന്നും ട്രാവൽ ഏജൻസികൾ അറിയിച്ചു. റിയാദിലേക്കുള്ള വിമാന സർവീസുകൾ റദ്ദാക്കിയതിനെ തുടർന്ന് ആ റൂട്ടിലെ യാത്രക്കാരെ ജിദ്ദ, മദീന വിമാനത്താവളങ്ങളിലേക്ക് പുനഃക്രമീകരിച്ചാണ് നിലവിൽ സർവീസുകൾ നടത്തുന്നത്.
യുഎഇയിൽ നിന്ന് കരമാർഗ്ഗമുള്ള ബസ് പാക്കേജുകൾക്ക് 1,100 ദിർഹം മുതലും വിമാന മാർഗ്ഗമുള്ള ഉംറ പാക്കേജുകൾക്ക് 2,700 ദിർഹം മുതലുമാണ് നിലവിൽ നിരക്കുകൾ ആരംഭിക്കുന്നത്. നിലവിലുള്ള തീർത്ഥാടകർക്ക് ആവശ്യമായ എല്ലാ സുരക്ഷാ സൗകര്യങ്ങളും യാത്രാ സഹായങ്ങളും ഉറപ്പാക്കിയിട്ടുണ്ടെന്നും ട്രാവൽ ഓപ്പറേറ്റർമാർ കൂട്ടിച്ചേർത്തു.
Content Highlights: Security concerns and flight disruptions in Saudi Arabia have led to a 50% drop in new Umrah enquiries and bookings among UAE travel operators, while many pilgrims with existing bookings are continuing with their plans.
