LIVE TV
മക്കയിലെ വിശുദ്ധ ഹറം പള്ളിയിലെത്തുന്ന ഉംറ തീർത്ഥാടകർക്കും വിശ്വാസികൾക്കും ഇനി മുതൽ അനായാസം തിരക്ക് ഒഴിവാക്കി കർമങ്ങൾ പൂർത്തിയാക്കാം. മതാഫ് (ത്വവാഫ് ചെയ്യുന്ന സ്ഥലം), മസ്ആ (സഅ്യി ചെയ്യുന്ന സ്ഥലം) എന്നിവിടങ്ങളിലെ തിരക്ക് തത്സമയം അറിയാനുള്ള പുതിയ ഡിജിറ്റൽ സേവനത്തിന് സൗദി അധികൃതർ തുടക്കം കുറിച്ചു. ഇതിലൂടെ തിരക്ക് കുറഞ്ഞ റൂട്ടുകൾ മുൻകൂട്ടി തിരഞ്ഞെടുക്കാൻ തീർത്ഥാടകർക്ക് സാധിക്കും.
ഇരുഹറം കാര്യാലയങ്ങൾക്കായുള്ള ജനറൽ അതോറിറ്റിയാണ് ഈ സ്മാർട്ട് ഗൈഡൻസ് സംവിധാനം പുറത്തിറക്കിയത്. ഹറം പള്ളിക്കുള്ളിലെ ജനത്തിരക്കിന്റെ കൃത്യമായ വിവരങ്ങളും നിർദേശങ്ങളും ഈ പ്ലാറ്റ്ഫോമിലൂടെ ഉടനടി ലഭ്യമാകും. ഇത് പള്ളിയിലെ ജനക്കൂട്ടത്തെ മികച്ച രീതിയിൽ നിയന്ത്രിക്കാനും, തീർത്ഥാടകർക്ക് കൂടുതൽ സൗകര്യപ്രദമായി പ്രാർത്ഥനകളും കർമങ്ങളും നിർവഹിക്കാനും ഏറെ സഹായകരമാകും.
ഒരു ക്യുആർ (QR) കോഡ് സ്കാൻ ചെയ്തുകൊണ്ട് തീർത്ഥാടകർക്ക് ഈ ഡിജിറ്റൽ പ്ലാറ്റ്ഫോമിലേക്ക് പ്രവേശിക്കാം. ഇതിൽ തത്സമയം വിവരങ്ങൾ മാറിക്കൊണ്ടിരിക്കും. ഇതുവഴി തിരക്കില്ലാത്ത സമയവും വഴികളും നോക്കി യാത്ര പ്ലാൻ ചെയ്യാനും ത്വവാഫും സഅ്യിയും കൂടുതൽ എളുപ്പത്തിൽ പൂർത്തിയാക്കാനും സാധിക്കും. ഹറം പള്ളിയിലെ തിരക്ക് കുറയ്ക്കാനും സുഗമമായ സുരക്ഷാ ക്രമീകരണങ്ങൾക്കും ഈ പുതിയ ഡിജിറ്റൽ സംവിധാനം വലിയൊരു നാഴികക്കല്ലാകും.
Content Highlights: Saudi authorities have launched a digital platform enabling pilgrims to monitor crowd density in Makkah in real time. The initiative is designed to improve crowd management, enhance safety, and help pilgrims plan their visits more efficiently.
