LIVE TV
കൃത്രിമ ബുദ്ധി (AI), അത്യാധുനിക സാങ്കേതികവിദ്യ തുടങ്ങിയ മേഖലകളിലെ സഹകരണം കൂടുതൽ ശക്തിപ്പെടുത്തുന്നതിനായി ബഹ്റൈനും അമേരിക്കയും തമ്മിൽ ധാരണയായി. 'ആർട്ടിഫിഷ്യൽ ഇന്റലിജൻസ് ഓപ്പർച്യൂണിറ്റീസ് പാർട്ണർഷിപ്പ്' എന്ന സംയുക്ത പ്രസ്താവനയിലാണ് ഇരു രാജ്യങ്ങളും ഒപ്പുവെച്ചത്. ബഹ്റൈൻ ദേശീയ സുരക്ഷാ ഉപദേഷ്ടാവും റോയൽ ഗാർഡ് കമാൻഡറുമായ ശൈഖ് നാസർ ബിൻ ഹമദ് അൽ ഖലീഫയുടെ അമേരിക്കൻ സന്ദർശനത്തിനിടെയാണ് ഈ സുപ്രധാന കരാർ യാഥാർത്ഥ്യമായത്.
അമേരിക്കയിലെ ബഹ്റൈൻ അംബാസഡർ ശൈഖ് അബ്ദുല്ല ബിൻ റാഷിദ് അൽ ഖലീഫയും യുഎസ് പ്രതിരോധ വകുപ്പിലെ പോളിസി വിഭാഗം അണ്ടർ സെക്രട്ടറി എൽബ്രിഡ്ജ് കോൾബിയുമാണ് സംയുക്ത പ്രസ്താവനയിൽ ഒപ്പുവെച്ചത്. പുതിയ നവീകരണങ്ങൾ, സംരംഭകത്വം, സാങ്കേതിക സഹകരണം എന്നിവ പ്രോത്സാഹിപ്പിച്ച് ഇരു രാജ്യങ്ങളുടെയും സാമ്പത്തിക വളർച്ചയും സുരക്ഷയും ഉറപ്പാക്കുകയാണ് ഈ പങ്കാളിത്തത്തിന്റെ പ്രധാന ലക്ഷ്യം. കൃത്രിമ ബുദ്ധിയുമായി ബന്ധപ്പെട്ട അടിസ്ഥാന സൗകര്യ വികസനത്തിൽ വിശ്വസനീയമായ കൂട്ടായ്മയുടെ പ്രാധാന്യവും ഈ കരാർ അടിവരയിടുന്നു.
ഊർജം, നിർണായക ധാതുക്കൾ, സെമികണ്ടക്ടറുകൾ, അത്യാധുനിക കമ്പ്യൂട്ടിങ് സംവിധാനങ്ങൾ, ഡിജിറ്റൽ കണക്റ്റിവിറ്റി എന്നിവ ഉൾപ്പെടെയുള്ള ആർട്ടിഫിഷ്യൽ ഇന്റലിജൻസ് (AI) അടിസ്ഥാന സൗകര്യ വികസനത്തിൽ ഇരു രാജ്യങ്ങളും കൈകോർക്കും. കൂടാതെ, നവീകരണ നയങ്ങൾ, എഐ വിതരണ ശൃംഖലകൾ, ഗവേഷണ-വികസന പ്രവർത്തനങ്ങൾ, വളർന്നുവരുന്ന സാങ്കേതിക മേഖലകളിലെ സ്വകാര്യ നിക്ഷേപം എന്നിവ പ്രോത്സാഹിപ്പിക്കുന്നതിനുള്ള കൃത്യമായ ചട്ടക്കൂടും ഈ കരാറിലൂടെ രൂപപ്പെടുത്തിയിട്ടുണ്ട്. അത്യാധുനിക ഡാറ്റാ സെന്ററുകൾ, വിശ്വസനീയമായ എഐ മോഡലുകൾ, നൂതന ആപ്ലിക്കേഷനുകൾ എന്നിവയുടെ വികസനത്തിലും സഹകരണം വിപുലീകരിക്കും.
ബഹ്റൈനും അമേരിക്കയും തമ്മിലുള്ള ദീർഘകാല സൗഹൃദ ബന്ധത്തിന്റെ തുടർച്ചയാണ് ഈ പുതിയ പങ്കാളിത്തം. അത്യാധുനിക സാങ്കേതികവിദ്യകളിലെ സഹകരണം വിപുലീകരിക്കുന്നതിനൊപ്പം ഇരു രാജ്യങ്ങളുടെയും സുസ്ഥിര സാമ്പത്തിക വികസനം, ആഗോള മത്സരശേഷി, പുതിയ നിക്ഷേപ-വളർച്ചാ അവസരങ്ങൾ എന്നിവയ്ക്ക് ഇത് കൂടുതൽ കരുത്തേകുമെന്ന് ഔദ്യോഗിക വൃത്തങ്ങൾ വ്യക്തമാക്കി.
Content Highlights: Bahrain and the United States have entered into a significant agreement to deepen collaboration in the field of artificial intelligence. The partnership is expected to promote innovation, encourage technology exchange, and support digital transformation initiatives between the two countries.
