LIVE TV
മമ്മൂട്ടി അന്നും ഇന്നും എന്നും സത്യസന്ധനായ മനുഷ്യനാണെന്ന് അദ്ദേഹത്തിന്റെ PR മേഖലയുമായി ബന്ധപ്പെട്ട് പ്രവർത്തിച്ച PRO പ്രതീഷ് ശേഖർ. തമാശയായി അദ്ദേഹം പറയുന്ന പല കാര്യങ്ങളും പലപ്പോഴും വളച്ചൊടിക്കപ്പെടാറുണ്ടെന്നും യഥാർത്ഥത്തിൽ മനസ്സിലാക്കിയവർക്ക് അദ്ദേഹത്തിന്റെ മനസ്സ് അറിയാമെന്നും പ്രതീഷ് കുറിച്ചു. ഫേസ്ബുക്ക് പോസ്റ്റിലൂടെയാണ് പ്രതീഷ് ഇക്കാര്യം കുറിച്ചത്.
ഫേസ്ബുക്ക് പോസ്റ്റിന്റെ പൂർണരൂപം:
'മമ്മൂക്ക… അന്നും ഇന്നും എന്നും Genuine! മാധ്യമ മേഖലയിൽ പ്രവർത്തിച്ച കാലം മുതൽ മമ്മൂക്കയുടെ കമ്പനിയുടെ PR മേഖലയുമായി ബന്ധപ്പെട്ട് പ്രവർത്തിച്ച കാലം വരെ അദ്ദേഹത്തെ അടുത്തറിയാൻ കഴിഞ്ഞതിൽ നിന്ന് ഞാൻ മനസ്സിലാക്കിയ ചില കാര്യങ്ങളുണ്ട്. മമ്മൂക്ക അന്നും ഇന്നും എന്നും ഒരു Genuine മനുഷ്യനാണ്. തമാശയായി അദ്ദേഹം പറയുന്ന പല കാര്യങ്ങളും പലപ്പോഴും വളച്ചൊടിക്കപ്പെടാറുണ്ട്. അതിൽ നിന്ന് പല കഥകളും വിവാദങ്ങളും ഉണ്ടാകാറുമുണ്ട്. പക്ഷേ, ആ മനുഷ്യനെ യഥാർത്ഥത്തിൽ മനസ്സിലാക്കിയവർക്ക് അദ്ദേഹത്തിന്റെ മനസ്സ് അറിയാം'.
'അദ്ദേഹം സംസാരിക്കുന്നത് അഹങ്കാരത്തിൽ നിന്നല്ല. നിലനിൽപ്പിന് വേണ്ടിയുമല്ല. പലപ്പോഴും നമുക്കും സമൂഹത്തിനും വേണ്ടി മാത്രമാണ്. മനുഷ്യരോടൊപ്പം നിൽക്കുന്ന ഒരു മനുഷ്യനെയാണ് ഞാൻ അദ്ദേഹത്തിൽ കണ്ടിട്ടുള്ളത്. ഇത്രയും വർഷം പല ചാനൽ പരിപാടികളിലും പിന്നീട് മമ്മൂട്ടി കമ്പനിയുടെയും സിനിമകളുടെയും ഭാഗമായി പ്രവർത്തിച്ചപ്പോഴും എനിക്ക് മനസ്സിലായ കാര്യം ഇതാണ്. ആ മനുഷ്യനോടും അദ്ദേഹത്തിന്റെ പ്രവർത്തനങ്ങളോടുമുള്ള ആദരവ് എന്നും നിലനിൽക്കും. ഒരുപക്ഷേ, അദ്ദേഹത്തോടൊപ്പം പ്രവർത്തിച്ച അനുഭവം കൊണ്ടുതന്നെയാകാം ഇതുവരെ ഒരു സിനിമയുടെ PR, Marketing ജോലിക്കായി ആരെയും അങ്ങോട്ട് സമീപിക്കാത്തത്'.
'വരുന്നത് വരട്ടെ. ആരെയും കള്ളം പറഞ്ഞ് വീഴ്ത്താനോ അനാവശ്യമായി പുകഴ്ത്താനോ എനിക്ക് കഴിയില്ല. ഉള്ളത് ഉള്ളതുപോലെ പറയും. കാരണം സിനിമയും ഈ മേഖലയിലെ എന്റെ ജീവിതവും എനിക്ക് അത്രമേൽ പ്രധാനപ്പെട്ടതാണ്. ശത്രുക്കൾ ഉണ്ടാകും. കാലം അവരെയും തിരിച്ചറിയിക്കും. ഞാൻ ഏത് പാർട്ടിയാണെന്ന സംശയം ആർക്കെങ്കിലും ഉണ്ടെങ്കിൽ എന്റെ മറുപടി ഒന്നേയുള്ളൂ…മനുഷ്യത്വം എന്ന പാർട്ടിയിലാണ് ഞാൻ! മമ്മൂക്കയോടുള്ള ആദരവോടെ…', പ്രതീഷ് ശേഖർ കുറിച്ചു.
Content Highlights: Pratheesh shekhar about mammootty
