LIVE TV
പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന രജിനികാന്ത് ചിത്രം ജയിലർ 2വിന്റെ ക്യാരക്ടർ വീഡിയോ പുറത്ത്. ചിത്രത്തിൽ വില്ലനായി എത്തുന്ന മലയാള നടൻ സുരാജ് വെഞ്ഞാറമൂടിന്റെ കിടിലൻ ഇൻട്രോ വീഡിയോയാണ് സൺ പിച്ചേഴ്സ് പങ്കുവെച്ചിരിക്കുന്നത്. അനിരുദ്ധിന്റെ കലക്കൻ സ്കോറിൽ സുരാജിന്റെ മാസ് എൻട്രിയാണ് വിഡിയോയിൽ കാണാൻ കഴിയുന്നത്. ദിലീപ് എന്ന കഥാപാത്രമാണ് സുരാജ് കൈകാര്യം ചെയ്യുന്നത്.
'അമ്പോ വേറെ ലെവൽ, സുരാജേട്ടന്റെ മാസ്സ്, ഇതൊരു ഒന്ന് ഒന്നര പൊളിയായിരിക്കും, രജിനിയെ കടത്തി വെട്ടുമോ?', എന്നിങ്ങനെ നിരവധി കമന്റുകളാണ് വീഡിയോയ്ക്ക് താഴെ വരുന്നത്. ഇന്ന് മുതൽ എല്ലാ കഥാപാത്രങ്ങൾക്കും ഇൻട്രോ വീഡിയോസ് പുറത്തിറക്കുമെന്ന് സൺ പിച്ചേഴ്സ് നേരത്തെ അറിയിച്ചിരുന്നു. ഈ വർഷം ഒക്ടോബർ 15 ന് ചിത്രം ആഗോള റിലീസ് ആയി തിയേറ്ററുകളിൽ എത്തും. ചിത്രത്തിന്റേതായി പുറത്തുവന്ന പ്രൊമോ വീഡിയോ നിറഞ്ഞ് നിൽക്കുന്നത് മുഴുവൻ മലയാളി താരങ്ങൾ ആണ്. സുനിൽ സുഖദ, ഹക്കിം ഷാ, കോട്ടയം നസീർ, സുജിത് ശങ്കർ എന്നിവരെ പ്രൊമോയിൽ കാണാം.
ജയിലർ ആദ്യ ഭാഗത്തിൽ മാത്യു എന്ന കഥാപാത്രമായി കാമിയോ റോളിലെത്തി മോഹൻലാൽ ഞെട്ടിച്ചിരുന്നു. രണ്ടാം ഭാഗത്തിലും നടൻ എത്തുന്നുണ്ട്. മുത്തുവേൽ പാണ്ഡ്യൻ എന്ന കഥാപാത്രത്തെയാണ് ചിത്രത്തിൽ രജനികാന്ത് അവതരിപ്പിക്കുന്നത്. ആഗോള ബോക്സ് ഓഫീസില് നിന്ന് 600 കോടിയിലേറെ നേടിയ ചിത്രം വിജയിച്ചത് മുതല് ആരാധകര് കാത്തിരിക്കാന് തുടങ്ങിയതാണ് രണ്ടാം ഭാഗത്തിനായി. ചിത്രത്തിൽ ബോളിവുഡ് താരം ഹൃത്വിക് റോഷനും ഒരു കാമിയോ വേഷത്തിൽ വരുന്നുണ്ട്.
തമിഴ് സിനിമയില് ഏറ്റവും വലിയ ഓപണിംഗ് വരാന് സാധ്യതയുള്ള അപ്കമിംഗ് പ്രോജക്റ്റുമാണ് ജയിലര് 2. അനിരുദ്ധ് രവിചന്ദര് തന്നെയാണ് രണ്ടാം ഭാഗത്തിന്റെയും സംഗീത സംവിധാനം നിര്വ്വഹിക്കുന്നത്. ആദ്യ ഭാഗം പോലെതന്നെ ആക്ഷന് രംഗങ്ങളാല് സമ്പന്നമായിരിക്കും രണ്ടാം ഭാഗവും.
Content Highlights: Jailer 2 Character video of suraj venjaramoodu is out
