LIVE TV
നോയിഡ: ആപ്പിളിന്റെ ഏറ്റവും പുതിയ ഐഫോൺ 18 പ്രോ സീരീസ് ഇന്ത്യയിൽ ഔദ്യോഗികമായി വിൽപ്പനയ്ക്കെത്തി. നിരവധി പേരാണ് ഇതിനോടകം ഫോണ് സ്വന്തമാക്കിയത്. ഓരോ വർഷവും ഐഫോൺ ലോഞ്ചിനോടനുബന്ധിച്ച് ഉണ്ടാകാറുള്ള വലിയ തിരക്കിന് ഇത്തവണയും കുറവൊന്നും ഇല്ല. സ്റ്റോറുകൾ തുറക്കുന്നതിന് മണിക്കൂറുകൾക്ക് മുൻപുതന്നെ ഉപഭോക്താക്കൾ കാത്തുനില്ക്കുന്ന ദൃശ്യങ്ങളാണ് പലയിടത്ത് നിന്നും പുറത്ത് വരുന്നത്. ഇതിനിടയിൽ, ഭാര്യയ്ക്ക് പുതിയ ഫോൺ സമ്മാനിക്കാൻ സ്വർണം വിറ്റ് പണം കണ്ടെത്തിയ ഡൽഹി സ്വദേശിയുടെ വാക്കുകളാണ് ഇപ്പോൾ സോഷ്യൽ മീഡിയയിലടക്കം ശ്രദ്ധേയമാകുന്നത്.
നോയിഡയിലെ ഡിഎൽഎഫ് മാൾ ഓഫ് ഇന്ത്യയിലുള്ള ആപ്പിൾ സ്റ്റോറിന് മുന്നിൽ രാവിലെ എട്ടുമണിക്ക് മുൻപുതന്നെ നീണ്ട ക്യൂ രൂപപ്പെട്ടു. ക്യൂവിൽ മുന്നിലുണ്ടായിരുന്ന ഡൽഹി സ്വദേശിയാണ് കൗതുകകരമായ അനുഭവം പങ്കുവെച്ചത്. ഭാര്യയ്ക്ക് വേണ്ടിയാണ് താൻ ഐഫോൺ 18 പ്രോ വാങ്ങാൻ എത്തിയതെന്ന് അദ്ദേഹം വ്യക്തമാക്കി. ഭാര്യ ആവശ്യപ്പെട്ട ബർഗണ്ടി നിറത്തിലുള്ള ഫോണാണ് അദ്ദേഹം തിരഞ്ഞെടുത്തത്.
ഭാര്യ ഇതുവരെ ഐഫോൺ ഉപയോഗിച്ചിരുന്നില്ലെന്നും ഈ ഫോണ് അവള്ക്ക് ഒരു സർപ്രൈസ് ആയി നൽകാനാണ് ഉദ്ദേശിക്കുന്നതെന്നും അദ്ദേഹം പറഞ്ഞു. "ഇന്ന് കയ്യിൽ പണമുണ്ട്, മുൻപ് ഉണ്ടായിരുന്നില്ല. ഭാവിയിൽ പണമുണ്ടാകുമോ ഇല്ലയോ എന്ന് ആർക്കറിയാം, ഇന്നത്തെ സന്തോഷം കണ്ടെത്തുക, ജീവിക്കുക," എന്നായിരുന്നു ഇതിനായുള്ള പണം എങ്ങനെ കണ്ടെത്തി എന്ന ചോദ്യത്തിന് അദ്ദേഹത്തിന്റെ മറുപടി. പണം കണ്ടെത്താനായി താൻ വീട്ടിലെ സ്വർണം വിൽക്കുകയാണ് ചെയ്തതെന്നും യുവാവ് വെളിപ്പെടുത്തി.
പ്രിയപ്പെട്ടവർക്ക് ഐഫോൺ സമ്മാനമായി നൽകാൻ ദൂരങ്ങൾ താണ്ടിയെത്തിയവരും നിരവധിയാണ്. പഞ്ചാബിൽ നിന്ന് നോയിഡയിലെത്തിയ ഗുർദിത സിംഗ് എന്ന യുവാവ് പ്രതിശ്രുത വധുവിന് സമ്മാനമായാണ് ഐഫോൺ 18 പ്രോ വാങ്ങിയത്. ഇരുവരുടെയും വിവാഹം ഉടൻ നടക്കാനിരിക്കെയാണ് ഈ സർപ്രൈസ് ഗിഫ്റ്റ്. രാവിലെ ആറുമണി മുതൽ സുഹൃത്തിനൊപ്പം സ്റ്റോറിന് മുന്നിൽ കാത്തുനിന്ന ഗുർദിത, തനിക്കായി ഒരു ഐഫോൺ 18 പ്രോ മാക്സും സ്വന്തമാക്കി. രണ്ടു ഫോണുകൾക്കുമായി ഏകദേശം 3.5 ലക്ഷത്തിലധികം രൂപയാണ് ഇയാൾ ചെലവഴിച്ചത്.
മുൻ വർഷങ്ങളെ അപേക്ഷിച്ച് ഐഫോൺ 18 പ്രോ സീരീസിന് വില വർധിച്ചിട്ടുണ്ടെങ്കിലും അതൊന്നും തങ്ങളെ പിന്നോട്ടടിപ്പിക്കുന്നില്ലെന്നാണ് സ്റ്റോറുകളിലെത്തിയ ഉപഭോക്താക്കളുടെ പ്രതികരണം. ഭർത്താവിനൊപ്പം രണ്ട് ഐഫോൺ 18 പ്രോ വാങ്ങാനെത്തിയ ഒരു വനിത പ്രതികരിച്ചത്, "വില കൂടിയിട്ടുണ്ടാകാം, എന്നാൽ ഐഫോൺ ഇഷ്ടപ്പെടുന്നവർ എത്ര വില നൽകിയും അത് വാങ്ങും" എന്നാണ്. അടുത്തതായി പുറത്തിറങ്ങുന്ന ഐഫോൺ ഡ്യുവോ (iPhone Duo) ഹോങ്കോങ്ങിലുള്ള സുഹൃത്ത് വഴി അടുത്ത മാസം വരുത്തിക്കുമെന്നും ഇവർ പറഞ്ഞു. "വില കൂടിയാലും കുഴപ്പമില്ല, മാനേജ് ചെയ്തോളാം" എന്നാണ് ഹരിയാനയിൽ നിന്നെത്തിയ വിശാൽ എന്ന യുവാവ് വ്യക്തമാക്കുന്നത്.
Content Highlights: A young man reportedly sold gold to purchase an iPhone 18 Pro as a surprise gift for his wife. The unusual gift decision has attracted attention, particularly amid strong consumer interest in Apple's latest iPhone models. The incident highlights the lengths some consumers may go to when choosing expensive personal gifts for their partners.
