LIVE TV
വിനീത് ശ്രീനിവാസൻ ചിത്രം മുകുന്ദനുണ്ണി അസോസിയേറ്റ്സിനെ അഭിനന്ദിച്ച് സംവിധായകൻ അനുരാഗ് കശ്യപ്. ഗംഭീര സിനിമയാണ് മുകുന്ദനുണ്ണി എന്നും വിനീത് മികച്ച പ്രകടനമാണ് കാഴ്ചവെച്ചിരിക്കുന്നതെന്നും അനുരാഗ് കശ്യപ് പറഞ്ഞു. ലെറ്റർബോക്സിലൂടെയാണ് അനുരാഗ് തന്റെ പ്രതികരണം അറിയിച്ചത്.
'വളരെ മനോഹരമായി മേക്ക് ചെയ്യുകയും എഴുതുകയും ചെയ്ത സിനിമ. വിനീത് ശ്രീനിവാസൻ ഗംഭീരമായിരുന്നു. സംവിധായകനൊപ്പം ഇരുന്നു സിനിമ കണ്ട് അദ്ദേഹത്തെ ലജ്ജിതനാക്കിയതും പുതിയൊരു അനുഭവമായിരുന്നു. ഞാൻ അഭിനവിന്റെ ആരാധകനാണ്', അനുരാഗ് കശ്യപിന്റെ വാക്കുകൾ.
അനുരാഗ് കശ്യപിന് മറുപടിയുമായി വിനീത് ശ്രീനിവാസനുമെത്തി. 'ഒരുപാട് എഴുതണമെന്ന് ആഗ്രഹമുണ്ട്, പക്ഷേ വാക്കുകൾ കിട്ടുന്നില്ല. ഇന്ത്യയിലെ എന്റെ പ്രിയപ്പെട്ട സിനിമാ നിർമ്മാതാക്കളിൽ ഒരാളുടെ കമന്റ് വായിക്കുമ്പോൾ ഒരുപാട് ഇമോഷൻസ് എന്റെ ഉള്ളിലേക്ക് കടന്നുവരുകയാണ്. നാളെ ഈ പോസ്റ്റ് ഞാൻ ഡിലീറ്റ് ചെയ്തേക്കാം, കാരണം ഇത് പങ്കിടുന്നത് എന്റെ ഭാഗത്തുനിന്നുള്ള ഒരു ഷോ ഓഫ് പോലെയാണ് തോന്നുന്നത്. നന്ദി അഭിനവ് സുന്ദർ നായക്, അനുരാഗ് കശ്യപ്. സത്യ കണ്ട ആ പതിമൂന്നു വയസ്സുകാരൻ അതിശയിച്ചിരിക്കുകയാണ്', വിനീതിന്റെ വാക്കുകൾ.
വിനീത് ശ്രീനിവാസനെ നായകനാക്കി അഭിനവ് സുന്ദർ നായക് സംവിധാനം ചെയ്ത് വൻ സ്വീകാര്യത നേടിയ ചിത്രമായിരുന്നു 'മുകുന്ദൻ ഉണ്ണി അസോസിയേറ്റ്സ്'. ചിത്രത്തിലെ വിനീത് ശ്രീനിവാസന്റെ അഡ്വ മുകുന്ദന് ഉണ്ണിയെന്ന കഥാപാത്രവും ഏറെ ശ്രദ്ധ നേടിയിരുന്നു. വിനീത് ശ്രീനിവാസനൊപ്പം സുരാജ് വെഞ്ഞാറമൂട്, സുധി കോപ്പ, തന്വി റാം, ജഗദീഷ്, ആര്ഷ ചാന്ദിനി ബൈജു, നോബിള് ബാബു തോമസ്, അല്ത്താഫ് സലിം തുടങ്ങിയവരും പ്രധാന വേഷങ്ങളിലെത്തിയിരുന്നു.
Content Highlights: Director Anurag Kashyap praised the Malayalam film Mukundanunni Associates and appreciated Vineeth Sreenivasan’s performance. Vineeth responded to Kashyap’s words, expressing gratitude for the recognition.
