LIVE TV
വർഷങ്ങൾക്ക് ശേഷം മോഹൻലാലും മമ്മൂട്ടിയും ഒന്നിക്കുന്ന ചിത്രമായ പേട്രിയറ്റിന്റെ പ്രമോഷന്റെ ഭാഗമായി ജിയോ ഹോട്ട്സ്റ്റാർ പുറത്തിറക്കിയ 'ലെജൻഡ് ഹാങ്ഔട്ട്' വീഡിയോ സമൂഹമാധ്യമങ്ങളിൽ വൈറലാകുന്നു. മമ്മൂട്ടി, മോഹൻലാൽ, മഹേഷ് നാരായണൻ, കുഞ്ചാക്കോ ബോബൻ, ഫഹദ് ഫാസിൽ, സുഷിൻ ശ്യാം, രാജീവ് മേനോൻ തുടങ്ങിയവർ തമ്മിലുള്ള രസകരമായ സംഭാഷണമാണ് ഈ വീഡിയോയിൽ ഉള്ളത്.
പേട്രിയറ്റിനെ കുറിച്ച് ആലോചിച്ചത് മുതൽ സിനിമ ഒരുക്കുന്നതിന് ഇടയിലെ വിവിധ ഘട്ടങ്ങളെ കുറിച്ച് വരെ അഭിനേതാക്കളും അണിയറ പ്രവർത്തകരും സംസാരിക്കുന്നുണ്ട്. ഇതിനിടയിൽ മോഹൻലാൽ സിനിമയിൽ ഭാഗമായതിനെ കുറിച്ച് മമ്മൂട്ടി പറയുന്ന ഭാഗമാണ് സമൂഹമാധ്യമങ്ങളിൽ വൈറലാകുന്നത്. പേട്രിയറ്റിന് ദേശീയ തലത്തിൽ ശ്രദ്ധ നൽകാൻ മറ്റ് ഭാഷകളിൽ നിന്നുള്ള അഭിനേതാക്കളെ അഭിനയിപ്പിക്കുന്നതിനെ കുറിച്ച് ആലോചിച്ചിരുന്നു എന്നും എന്നാൽ താനാണ് മോഹൻലാലിനെ നിർദേശിച്ചത് എന്നുമാണ് മമ്മൂട്ടിയുടെ വാക്കുകൾ.
'പേട്രിയറ്റിനെ നാഷണൽ സിനിമയാക്കാൻ മറ്റ് ഭാഷകളിൽ നിന്ന് അഭിനേതാക്കളെ നോക്കിയാലോ എന്ന ആലോചിച്ചിരുന്നു. അപ്പോൾ ഞാനാണ് പറഞ്ഞത്, ഇവിടെ ഒരാളുണ്ടല്ലോ അദ്ദേഹത്തോട് സംസാരിച്ച് നോക്കാം എന്ന്. മഹേഷാണ് ലാലുവിന്റെ അടുത്ത് പോയത്. ലാലു അവതരിപ്പിക്കുന്ന കഥാപാത്രം വളരെ പ്രധാനപ്പെട്ടതാണ്. പടം ഒരു സ്റ്റേജിലെത്തുമ്പോൾ പിന്നീട് മുൻപോട്ട് പോകണമെങ്കിൽ ഈ ക്യാരക്ടർ വേണം,' മമ്മൂട്ടി പറഞ്ഞു.
മോഹൻലാലിന് ഹൈപ്പേറ്റുന്നതിൽ മമ്മൂട്ടിയോളം വരില്ല മറ്റാരുമെന്നാണ് വീഡിയോക്ക് താഴെ വരുന്ന കമന്റുകൾ. ഇച്ചാക്ക ലാലുവിനെ പുകഴ്ത്തുന്നത് കേൾക്കുന്നത് മലയാളികൾക്ക് പ്രത്യേക സന്തോഷമാണെന്നും കമന്റുകളുണ്ട്. സൂപ്പർസ്റ്റാറുകൾ ഇത്രമേൽ പരസ്പരം ബഹുമാനിക്കുകയും അകമഴിഞ്ഞ് അഭിനന്ദിക്കുകയും ചെയ്യുന്ന രീതി മറ്റ് ഇൻഡസ്ട്രികളിൽ കാണാനാകില്ലെന്നും ചിലർ കമന്റ് ചെയ്യുന്നുണ്ട്.
മെയ് ഒന്നിനാണ് പേട്രിയറ്റ് തിയേറ്ററുകളിലെത്തുന്നത്. മമ്മൂട്ടിയും മോഹൻലാലും ഒന്നിക്കുന്ന 56ാം സിനിമയാണ് പേട്രിയറ്റ്. നയൻതാര, രേവതി, ദർശന രാജേന്ദ്രൻ, സെറിൻ ഷിഹാബ് തുടങ്ങിയവരാണ് ചിത്രത്തിൽ മര്റ് പ്രധാന വേഷങ്ങളിൽ എത്തുന്നത്. കഴിഞ്ഞ ദിവസം പുറത്തിറങ്ങിയ സിനിമയുടെ ട്രെയിലർ മികച്ച പ്രതികരണമാണ് നേടിയത്.
Content Highlights : Mammootty praises Mohanlal as an actor with national recognition in patriot Legends Hangout promo video
