LIVE TV
ഒരു കൊച്ച് ബോളിവുഡ് റൊമാന്റിക് ചിത്രം ഇപ്പോൾ ബോളിവുഡിൽ തരംഗം തീർക്കുകയാണ്. മോഹിത് സൂരി സംവിധാനം ചെയ്ത് അഹാൻ പാണ്ഡെ, അനീറ്റ് പദ്ദ എന്നിവരെ കേന്ദ്രകഥാപാത്രങ്ങളായി എത്തിയ 'സൈയാരാ' ആണ് ബോക്സ് ഓഫീസിൽ കത്തിക്കയറുന്നത്. റിലീസ് ചെയ്തു ഒരാഴ്ച കഴിയുമ്പോൾ കോടികളാണ് സിനിമ ഇന്ത്യൻ ബോക്സ് ഓഫീസിൽ നിന്ന് വാരികൂട്ടിയിരിക്കുന്നത്.
ഏഴ് ദിവസം കൊണ്ട് 171 കോടിയാണ് ഇന്ത്യയിൽ നിന്നുള്ള സൈയാരായുടെ കളക്ഷൻ. 21.50 കോടി ആദ്യ ദിനം കളക്ഷൻ നേടിയ സിനിമ തുടർന്നുള്ള ദിവസങ്ങളിൽ മികച്ച പ്രകടനമാണ് കാഴ്ചവെച്ചത്. മൂന്നാം ദിനം 35.75 കോടിയാണ് സിനിമ നേടിയത്. സിനിമ കണ്ടുകൊണ്ടിരിക്കുമ്പോഴുള്ള പ്രേക്ഷകരുടെ പ്രതികരണങ്ങൾ ഇതിനോടകം വൈറലാണ്. വലിയ തിരക്കാണ് സിനിമയ്ക്ക് എല്ലായിടത്തും അനുഭവപ്പെടുന്നത്. ഓവർസീസ് മാർക്കറ്റിലും സിനിമയ്ക്ക് കുതിപ്പുണ്ടാക്കാൻ സാധിക്കുന്നുണ്ട്. ഇതുവരെ അഞ്ച് മില്യൺ യുഎസ് ഡോളറാണ് സിനിമയുടെ നേട്ടം. കേരളത്തിലും സിനിമയ്ക്ക് വലിയ വരവേൽപ്പാണ് ലഭിക്കുന്നത്.
ആഷിഖി 2 , ഏക് വില്ലൻ തുടങ്ങിയ സിനിമകളിലൂടെ പ്രേക്ഷക ശ്രദ്ധ നേടിയ സംവിധായകനാണ് മോഹിത് സൂരി. അദ്ദേഹത്തിന്റെ ചിത്രത്തിലെ ഗാനങ്ങൾ എല്ലാം വലിയ സ്വീകാര്യത നേടുക പതിവാണ്. സൈയാരായിലെ ഗാനങ്ങളും വലിയ ശ്രദ്ധ നേടുന്നുണ്ട്. യഷ് രാജ് ഫിലിംസിന്റെ ബാനറിൽ ആദിത്യ ചോപ്ര ആണ് സിനിമ നിർമിക്കുന്നത്. സങ്കല്പ് സദാനഹ്, രോഹൻ ശങ്കർ എന്നിവരാണ് സിനിമയുടെ എഴുത്തുകാർ. വികാസ് ശിവരാമൻ ആണ് സിനിമയുടെ ഛായാഗ്രഹണം നിർവഹിക്കുന്നത്.
Content Highlights: Saiyaara creates record at indian box office
