LIVE TV
വിരമിച്ചവർ തങ്ങളുടെ സമ്പാദ്യം നിക്ഷേപിക്കാൻ ഏറ്റവും കൂടുതൽ തിരഞ്ഞെടുക്കുന്ന ഒന്നാണ് ബോണ്ടുകൾ . ഇതിന് പല കാരണങ്ങളുണ്ട്. വിരമിക്കൽ കാലത്തേക്ക് കടക്കുമ്പോൾ, ഒരാളുടെ സാമ്പത്തിക ലക്ഷ്യങ്ങളിൽ വലിയ മാറ്റമുണ്ടാകുന്നു. കൂടുതൽ പണം സമ്പാദിക്കുന്നതിന് പകരം, കയ്യിലുള്ള പണം നഷ്ടപ്പെടാതെ സൂക്ഷിക്കുന്നതിനും സ്ഥിര വരുമാനം ഉറപ്പാക്കുന്നതിനുമാണ് അപ്പോൾ മുൻഗണന നൽകുന്നത്.ഓരോ മാസവും കൃത്യമായി ലഭിച്ചിരുന്ന ശമ്പളം നിലയ്ക്കുന്നതോടെ, നിത്യജീവിതത്തിലെ ചെലവുകൾ ബുദ്ധിമുട്ടില്ലാതെ കൊണ്ടുപോകുക എന്നത് വലിയ വെല്ലുവിളിയായി മാറിയേക്കാം.
സ്ഥിര വരുമാനം
ബോണ്ടുകളിൽ നിക്ഷേപിക്കുമ്പോൾ, നിശ്ചിത ഇടവേളകളിൽ, മാസത്തിലോ വർഷത്തിലോ പലിശ ലഭിക്കുമെന്ന് ഉറപ്പാണ്. ഇതിനെ കൂപ്പൺ പേയ്മെന്റ് എന്ന് വിളിക്കുന്നു. ജോലിയിൽനിന്ന് വിരമിച്ചവർക്ക് പെൻഷൻ പോലെ ഓരോ മാസവും കൃത്യമായ തുക ലഭിക്കാൻ ഇത് സഹായിക്കുന്നു.വ്യത്യസ്ത മാസങ്ങളിൽ പലിശ നൽകുന്ന ഒന്നിലധികം ബോണ്ടുകളിൽ നിക്ഷേപിച്ചാൽ സ്ഥിര വരുമാനം ഉറപ്പു വരുത്താം. ഉദാഹരണത്തിന്, ഒരു ബോണ്ട് ജനുവരി-ജൂലൈ മാസങ്ങളിൽ പലിശ നൽകുന്നതും മറ്റൊന്ന് ഫെബ്രുവരി-ഓഗസ്റ്റ് മാസങ്ങളിൽ നൽകുന്നതുമാണെങ്കിൽ നിങ്ങൾക്ക് കൂടുതൽ മാസങ്ങളിൽ വരുമാനം ഉറപ്പാക്കാം.
മൂലധന സംരക്ഷണം
ഓഹരി വിപണിയെ അപേക്ഷിച്ച് ബോണ്ടുകൾ സുരക്ഷിതമാണ്. പ്രത്യേകിച്ച് സർക്കാർ ബോണ്ടുകളിൽ നിക്ഷേപിക്കുമ്പോൾ, കാലാവധി കഴിയുമ്പോൾ നിങ്ങൾ നിക്ഷേപിച്ച തുക തിരികെ ലഭിക്കുമെന്നതിന് സർക്കാർ ഗ്യാരണ്ടി നൽകുന്നു. കയ്യിലുള്ള പണം നഷ്ടപ്പെടാതെ സൂക്ഷിക്കാൻ ആഗ്രഹിക്കുന്നവർക്ക് ഇത് മികച്ചതാണ്.
ദീർഘകാല സുരക്ഷ
10 വർഷമോ 20 വർഷമോ നീണ്ടുനിൽക്കുന്ന ബോണ്ടുകൾ ലഭ്യമാണ്. വിരമിച്ച ശേഷമുള്ള ദീർഘകാല ജീവിതത്തിന് ഇത് സുരക്ഷ നൽകുന്നു. പണപ്പെരുപ്പത്തെ ഒരു പരിധിവരെ നേരിടാനും വിപണിയിലെ ചാഞ്ചാട്ടങ്ങളിൽനിന്ന് നിക്ഷേപത്തെ സംരക്ഷിക്കാനും ബോണ്ടുകൾ സഹായിക്കും.നിങ്ങൾ ഒരു കമ്പനിക്കോ സർക്കാരിനോ പണം വായ്പയായി നൽകുന്നു എന്ന് കരുതുക. പകരം അവർ നിങ്ങൾക്ക് ഒരു സർട്ടിഫിക്കറ്റ് നൽകും. അതിൽ എത്ര രൂപ പലിശ തരും, എപ്പോൾ നിങ്ങളുടെ പണം തിരികെ നൽകും എന്ന് എഴുതിയിട്ടുണ്ടാകും.
കുറഞ്ഞ റിസ്ക്
ഓഹരികളെ അപേക്ഷിച്ച് ബോണ്ടുകൾക്ക് നഷ്ടസാധ്യത വളരെ കുറവാണ്.അതുപോലെ ലാഭവിഹിതം എത്ര കിട്ടുമെന്ന് മുൻകൂട്ടി അറിയാം.ആവശ്യമെങ്കിൽ കാലാവധിക്ക് മുൻപ് തന്നെ ബോണ്ടുകൾ വിൽക്കാനും സാധിക്കും. പണം സുരക്ഷിതമായിരിക്കണം, ഒപ്പം ഓരോ മാസവും കൃത്യമായ വരുമാനം ലഭിക്കുകയും വേണം എന്ന് ആഗ്രഹിക്കുന്നവർക്ക് ഏറ്റവും അനുയോജ്യമായ നിക്ഷേപമാണ് ബോണ്ടുകൾ.
Content Highlights: Why bonds are the go-to option for retirees seeking stable income, capital protection and long-term security
