LIVE TV
ശതകോടീശ്വരന് ഇലോണ് മസ്കിന്റെ സാറ്റലൈറ്റ് ഇന്റര്നെറ്റ് സേവനമായ സ്റ്റാര്ലിങ്കും പൊതുമേഖലാ ടെലകോം കമ്പനിയായ ബിഎസ്എന്എല്ലും ഇന്ത്യയില് ബ്രോഡ്ബാന്ഡ് സേവനങ്ങള് വ്യാപിപ്പിക്കുന്നതിനായി കൈകോര്ക്കുന്നുവെന്ന് റിപ്പോര്ട്ട്. രാജ്യത്തെ ഗ്രാമീണ മേഖലയിലും ദുര്ഘട ഭൂപ്രദേശങ്ങളിലും അതിവേഗ ഇന്റര്നെറ്റ് ലഭ്യമാക്കുകയാണ് പങ്കാളിത്തത്തിലൂടെ ലക്ഷ്യമിടുന്നതെന്ന് ദേശീയ മാധ്യമങ്ങള് റിപ്പോര്ട്ട് ചെയ്തു.
റിപ്പോര്ട്ടുകള് പ്രകാരം, സ്റ്റാര്ലിങ്കുമായി സാറ്റലൈറ്റ് ബാക്ക്ഹോള് സേവനങ്ങളില് സഹകരിക്കാനുള്ള സാധ്യതകളാണ് ബിഎസ്എന്എല് പരിശോധിക്കുന്നത്. അതായത്, ഫൈബര് കേബിള് എത്തിക്കാന് ബുദ്ധിമുട്ടുള്ള മലനിരകള്, വനമേഖലകള്, അതിര്ത്തി പ്രദേശങ്ങള്, ദ്വീപുകള് തുടങ്ങിയ ഇടങ്ങളിലെ മൊബൈല് ടവറുകളെ നേരിട്ട് സ്റ്റാര്ലിങ്കിന്റെ ഉപഗ്രഹ ശൃംഖലയുമായി ബന്ധിപ്പിക്കാനാകും. ഇതിലൂടെ 4ജി, 5ജി സേവനങ്ങള് വേഗത്തില് വ്യാപിപ്പിക്കാനാകുമെന്ന് വിലയിരുത്തുന്നു.
വടക്കുകിഴക്കന് സംസ്ഥാനങ്ങള്, ഹിമാലയന് മേഖലകള്, ഉള്നാടന് ഗ്രാമങ്ങള് എന്നിവിടങ്ങളില് ഫൈബര് കേബിള് സ്ഥാപിക്കല് വളരെ ചെലവേറിയതും സമയമെടുക്കുന്നതുമാണ്. എന്നാല് സ്റ്റാര്ലിങ്ക് പോലുള്ള ലോ എര്ത്ത് ഓര്ബിറ്റ് സാറ്റലൈറ്റ് ശൃംഖലകള് ഉപയോഗിച്ചാല് ഏതാനും ആഴ്ചകള്ക്കുള്ളില് തന്നെ ഇന്റര്നെറ്റ് സേവനം ആരംഭിക്കാനാകുമെന്ന് വിദഗ്ധര് ചൂണ്ടിക്കാട്ടുന്നു.
സ്റ്റാര്ലിങ്കിന് ഇന്ത്യയില് സേവനം ആരംഭിക്കാന് സര്ക്കാര് സുരക്ഷാ അനുമതികളും റെഗുലേറ്ററി അംഗീകാരങ്ങളും നിര്ണായകമാണ്. ബിഎസ്എന്എല് പോലുള്ള പൊതുമേഖലാ സ്ഥാപനവുമായി സഹകരിക്കുന്നത് ഇന്ത്യയിലെ പ്രവര്ത്തനാനുമതികള് നേടുന്നതിന് സഹായകരമാകുമെന്നാണ് റിപ്പോര്ട്ടുകള് പറയുന്നത്. ഇതിനകം തന്നെ ഇന്ത്യന് നാഷണല് സ്പേസ് പ്രൊമോഷന് ആന്ഡ് ഓതറൈസേഷന് സെന്റര് (ഇന്-സ്പേസ്) സ്റ്റാര്ലിങ്കിന് ചില പ്രാഥമിക അനുമതികള് നല്കിയിട്ടുണ്ട്.
അതേസമയം, ബിഎസ്എന്എല്ലിനും ഈ പങ്കാളിത്തത്തില് നിന്ന് വലിയ നേട്ടം ലഭിക്കുമെന്നാണ് വിലയിരുത്തല്. ഗ്രാമീണ ഇന്ത്യയില് ടെലകോം സേവനങ്ങളുടെ വ്യാപ്തി വര്ധിപ്പിക്കുക, ഡിജിറ്റല് ഇന്ത്യ പദ്ധതിയെ ശക്തിപ്പെടുത്തുക, സര്ക്കാര് വകുപ്പുകള്ക്കും ബാങ്കുകള്ക്കും പൊതുമേഖല സ്ഥാപനങ്ങള്ക്കും വിദൂരപ്രദേശങ്ങളില് കൂടുതല് സ്ഥിരതയുള്ള കണക്റ്റിവിറ്റി നല്കുക എന്നിവയ്ക്ക് ഈ സാങ്കേതിക സഹകരണം സഹായകമാകും.
ഇതിനകം ഭാരതി എയര്ടെല്, റിലയന്സ് ജിയോ തുടങ്ങിയ സ്വകാര്യ ടെലകോം കമ്പനികളും സ്റ്റാര്ലിങ്കുമായി സഹകരിക്കുന്നതിനുള്ള ചര്ച്ചകള് നടത്തിയിട്ടുണ്ട്. ഇതോടെ ഇന്ത്യയിലെ സാറ്റലൈറ്റ് ഇന്റര്നെറ്റ് വിപണിയില് വലിയ മത്സരം ഉണ്ടാകുമെന്നാണ് വിലയിരുത്തല്. സ്റ്റാര്ലിങ്ക് നിലവില് ലോകത്തിലെ നിരവധി രാജ്യങ്ങളില് സേവനം നല്കുന്നുണ്ട്. പരമ്പരാഗത ഫൈബര് ബ്രോഡ്ബാന്ഡ് എത്താത്ത പ്രദേശങ്ങളിലേക്ക് അതിവേഗ ഇന്റര്നെറ്റ് എത്തിക്കാനുള്ള ശേഷിയാണ് ഇതിന്റെ പ്രധാന പ്രത്യേകത.
Content Highlights: State-run Bharat Sanchar Nigam (BSNL) is in early discussions with billionaire Elon Musk-owned Starlink to explore collaboration opportunities in the areas of satellite backhaul and offering enterprise services.
