LIVE TV
വീഡിയോ കോള്‍ ചെയ്യാന്‍ ശ്രമിക്കുമ്പോള്‍ മറുവശത്തുള്ളയാള്‍ക്ക് വാട്സ്ആപ്പ് അക്കൗണ്ട് ഇല്ലാത്തതുകൊണ്ട് ബുദ്ധിമുട്ട് നേരിട്ടിട്ടുണ്ടോ?. ഓണ്‍ലൈന്‍ മീറ്റിങ്ങുകള്‍, പഠനവുമായി ബന്ധപ്പെട്ട ചര്‍ച്ചകള്‍, സുഹൃത്തുക്കളുമായുള്ള സംഭാഷണങ്ങള്‍ എന്നിവയ്ക്കിടെ ഇത്തരം സാഹചര്യം ഉണ്ടാകാറുണ്ട്. എന്നാല്‍ ഇനി ഈ പ്രശ്നത്തിന് ഒരു പരിഹാരമുണ്ട്. വാട്സ്ആപ്പ് അവതരിപ്പിച്ചിരിക്കുന്ന പുതിയ ഗസ്റ്റ് കോളിങ് ഫീച്ചര്‍ ഉപയോഗിച്ച് അക്കൗണ്ട് ഇല്ലാത്തവരെയും വോയ്സ്, വീഡിയോ കോളുകളിലേക്ക് ക്ഷണിക്കാം.
കോളില്‍ ചേരാന്‍ ക്ഷണിക്കപ്പെടുന്നയാള്‍ക്ക് വാട്സ്ആപ്പ് അക്കൗണ്ട് ഉണ്ടാകണമെന്നില്ല. ആപ്പ് ഇന്‍സ്റ്റാള്‍ ചെയ്യാതെ തന്നെ കമ്പ്യൂട്ടറിലെ വെബ് ബ്രൗസറിലൂടെ കോളില്‍ പ്രവേശിക്കാനാകും. ഇതോടെ വിവിധ ആവശ്യങ്ങള്‍ക്കായി ഓണ്‍ലൈന്‍ കോളുകള്‍ സംഘടിപ്പിക്കുന്നത് കൂടുതല്‍ എളുപ്പമാകും.
വാട്സ്ആപ്പ് അക്കൗണ്ടുള്ള ഒരാള്‍ക്ക് ഒരു കോള്‍ ലിങ്ക് തയ്യാറാക്കി മറ്റുള്ളവരുമായി പങ്കുവയ്ക്കാം. ഈ ലിങ്ക് ലഭിക്കുന്നവര്‍ക്ക് വാട്സ്ആപ്പ് അക്കൗണ്ട് ഇല്ലെങ്കിലും കോളില്‍ ചേരാന്‍ അപേക്ഷിക്കാം. എന്നാല്‍ കോളിന്റെ നിയന്ത്രണം ലിങ്ക് തയ്യാറാക്കിയ വ്യക്തിക്കായിരിക്കും.ഗസ്റ്റ് ആയി എത്തുന്നവര്‍ക്ക് കോളില്‍ പ്രവേശിക്കുന്നതിന് മുമ്പ് അവരുടെ പേര് നല്‍കേണ്ടിവരും. തുടര്‍ന്ന് ഹോസ്റ്റിന്റെ അനുമതിക്കായി കാത്തിരിക്കണം. ഹോസ്റ്റ് അനുമതി നല്‍കിയാല്‍ മാത്രമേ കോളില്‍ പ്രവേശിക്കാനാകൂ. ആവശ്യമായ സാഹചര്യങ്ങളില്‍ ഗസ്റ്റിനെ കോളില്‍നിന്ന് പുറത്താക്കാനും ഹോസ്റ്റിന് സാധിക്കും.
ഒരാള്‍ക്ക് മറ്റൊരാളെ വിളിക്കാന്‍ മാത്രമല്ല ഗ്രൂപ്പ് കോളുകള്‍ക്കും ഈ സൗകര്യം ഉപയോഗിക്കാം. വാട്സ്ആപ്പിന്റെ അറിയിപ്പ് പ്രകാരം 32 പേര്‍ക്ക് വരെ ഒരേ ഗ്രൂപ്പ് കോളില്‍ പങ്കെടുക്കാനാകും. സുഹൃത്തുക്കള്‍ തമ്മിലുള്ള ചര്‍ച്ചകള്‍ക്കും ഓണ്‍ലൈന്‍ ക്ലാസുകള്‍ക്കും ജോലി സംബന്ധമായ മീറ്റിങ്ങുകള്‍ക്കും ഇത് പ്രയോജനപ്പെടും.
ഗസ്റ്റുകള്‍ക്ക് കമ്പ്യൂട്ടറിന്റെ സ്‌ക്രീന്‍ പങ്കുവയ്ക്കാനും തംബ്സ് അപ്പ്, ഹാര്‍ട്ട് തുടങ്ങിയ ഇമോജികളിലൂടെ പ്രതികരിക്കാനും സംസാരിക്കാനുള്ള അവസരം അഭ്യര്‍ഥിക്കാന്‍ കൈ ഉയര്‍ത്തുന്ന ഫീച്ചര്‍ ഉപയോഗിക്കാനും കഴിയും.
പുതിയ ഫീച്ചറില്‍ സ്വകാര്യതയ്ക്കും പ്രാധാന്യം നല്‍കിയിട്ടുണ്ട്. ഗസ്റ്റ് കോളുകള്‍ എന്‍ഡ്-ടു-എന്‍ഡ് എന്‍ക്രിപ്ഷന്‍ ഉപയോഗിച്ചാണ് സംരക്ഷിക്കുന്നതെന്ന് വാട്സ്ആപ്പ് വ്യക്തമാക്കുന്നു. കോളിലെ സംഭാഷണം അനധികൃതമായി മറ്റുള്ളവര്‍ക്ക് കേള്‍ക്കാനാകാതിരിക്കാന്‍ സഹായിക്കുന്ന സുരക്ഷാ സംവിധാനമാണിത്. എന്നാല്‍ ഗസ്റ്റുകള്‍ക്ക് കോളില്‍ പങ്കെടുക്കുന്ന മറ്റ് ആളുകളുടെ ഫോണ്‍ നമ്പറുകള്‍ കാണാനാകില്ല. കോളിനിടെ സന്ദേശങ്ങള്‍ അയയ്ക്കാനോ സ്വന്തം നിലയില്‍ മറ്റുള്ളവരെ കോളിലേക്ക് ക്ഷണിക്കാനോ കഴിയില്ല. പ്രവേശനം നിയന്ത്രിക്കുന്നതിനും ആവശ്യമെങ്കില്‍ ഗസ്റ്റിനെ നീക്കം ചെയ്യുന്നതിനും ഹോസ്റ്റിന് അധികാരമുണ്ട്.
വാട്സ്ആപ്പിന്റെ അറിയിപ്പുപ്രകാരം ഗസ്റ്റ് കോളുകള്‍ സൗജന്യമാണ്. കോളിന് നിശ്ചിത സമയപരിധിയില്ലാത്തതിനാല്‍ നിശ്ചിത സമയം കഴിയുമ്പോള്‍ കോള്‍ അവസാനിക്കുന്നതിനെക്കുറിച്ച് ആശങ്കപ്പെടേണ്ടതില്ല. എന്നാല്‍ ഇന്റര്‍നെറ്റ് ഉപയോഗിക്കുന്നതിനുള്ള ഡാറ്റാ ചെലവ് ബാധകമായേക്കാം.
ഗസ്റ്റ് കോളിങ്ങിന് പുറമേ ഗൂഗിള്‍ കലണ്ടര്‍, മൈക്രോസോഫ്റ്റ് ഔട്ട്ലുക്ക് എന്നിവയുമായി കോളിങ് സൗകര്യം ബന്ധിപ്പിക്കാനും വാട്സ്ആപ്പ് പദ്ധതിയിടുന്നുണ്ട്. ഈ സൗകര്യം ലഭ്യമാകുന്നതോടെ കലണ്ടര്‍ ഇന്‍വൈറ്റുകള്‍ക്കൊപ്പം വാട്സ്ആപ്പ് കോള്‍ ലിങ്കും ചേര്‍ത്ത് മീറ്റിങ്ങുകള്‍ ക്രമീകരിക്കാന്‍ സാധിക്കും. ഈ സൗകര്യം ഈ വര്‍ഷം ഉടന്‍തന്നെ അവതരിപ്പിക്കുമെന്നാണ് കമ്പനി അറിയിച്ചിരിക്കുന്നത്.
Content Highlights :WhatsApp has introduced a new feature that allows you to invite people—even those without an account—to a call via a link. How can you use this feature?
