LIVE TV
ആധുനിക കാലത്ത് സോഷ്യല് മീഡിയ ജനജീവിതത്തിന്റെ അവിഭാജ്യ ഘടകമായി മാറിയിട്ടുണ്ട്. കുട്ടികള് മുതല് മുതിര്ന്നവര് വരെ സോഷ്യല് മീഡിയയില് സജീവമാണ്. എങ്കിലും അടുത്തിടെ കുട്ടികളുടെ സുരക്ഷയില് ശ്രദ്ധ കേന്ദ്രീകരിച്ച് നിരവധി രാജ്യങ്ങള് സോഷ്യല് മീഡിയ പ്ലാറ്റ്ഫോമുകള്ക്കെതിരെ കര്ശന നടപടി സ്വീകരിച്ചിരുന്നു. കുട്ടികളെ സംരക്ഷിക്കുന്നതിനായി പുതിയ സവിശേഷതകള് ചേര്ക്കാന് അധികാരികള് പ്ലാറ്റ്ഫോമുകളോട് നിര്ദ്ദേശിക്കുകയും ചെയ്തിരുന്നു.
എന്നാല് ഇപ്പോള് സോഷ്യല് മീഡിയയില് കുട്ടികള്ക്കായി ലഭ്യമായ പകുതിയിലധികം സവിശേഷതകളും പ്രവര്ത്തിക്കുന്നില്ലെന്നാണ് ഒരു റിപ്പോര്ട്ടിലെ ഞെട്ടിക്കുന്ന വെളിപ്പെടുത്തല്.
മൂന്ന് ഘട്ടങ്ങളിലായാണ് ഈ പരിശോധന നടത്തിയത്. വ്യത്യസ്ത പ്രായത്തിലുള്ള കുട്ടികള്ക്കും മുതിര്ന്നവര്ക്കും വേണ്ടി ഗവേഷണ സംഘം ഡമ്മി അക്കൗണ്ടുകള് സൃഷ്ടിച്ചു. തുടര്ന്ന് മൂന്ന് വ്യത്യസ്ത സാഹചര്യങ്ങളില് അവ പരീക്ഷിച്ചു. ആദ്യത്തേതില് കുട്ടികള് സാധാരണയായി പ്ലാറ്റ്ഫോം എങ്ങനെ ഉപയോഗിക്കുന്നുവെന്ന് പരിശോധിച്ചു. രണ്ടാം ഘട്ടം കുട്ടികള്ക്ക് സുരക്ഷാ സവിശേഷതകള് എങ്ങനെ എളുപ്പത്തില് മറികടക്കാമെന്ന് പരിശോധിച്ചു. മൂന്നാം ഘട്ടം മുതിര്ന്നവര്ക്ക് ചെറുപ്പക്കാരുടെ അക്കൗണ്ടുകള് എങ്ങനെ എളുപ്പത്തില് ആക്സസ് ചെയ്യാമെന്ന് പരിശോധിച്ചു. പ്ലാറ്റ്ഫോമിലെ സുരക്ഷാ സവിശേഷതകളില് പലതും തകരാറിലാണെന്ന് കണ്ടെത്തിയാല് അത് പരാജയമായി കണക്കാക്കുകയായിരുന്നു പരീക്ഷണത്തില് ചെയ്തിരുന്നത്.
ന്യൂയോര്ക്ക് യൂണിവേഴ്സിറ്റിയിലെയും നോര്ത്ത് ഈസ്റ്റേണ് യൂണിവേഴ്സിറ്റിയിലെയും ഗവേഷകരാണ് ഈ പഠനം നടത്തിയതെന്ന് മാധ്യമ റിപ്പോര്ട്ടുകള് പറയുന്നു. ഹീറ്റ് ഇനിഷ്യേറ്റീവ്, സൈബര് സേഫ്റ്റി റിസര്ച്ച് സെന്റര് എന്നിവ ചേര്ന്നാണ് പഠനം പ്രസിദ്ധീകരിച്ചത്. നാല് പ്രധാന സോഷ്യല് മീഡിയ പ്ലാറ്റ്ഫോമുകളിലെ ആകെ 86 കുട്ടികളുടെ സുരക്ഷാ സവിശേഷതകള് പരിശോധിച്ചതായി ഗവേഷണം പറയുന്നു.
അനുചിതമായ ഉള്ളടക്കത്തില് നിന്നോ അപരിചിതരുമായുള്ള സമ്പര്ക്കത്തില് നിന്നോ കുട്ടികളെ അകറ്റി നിര്ത്താന് പ്രോത്സാഹിപ്പിക്കുന്ന സുരക്ഷാ സവിശേഷതകളില് കുറഞ്ഞത് 50 ശതമാനമെങ്കിലും കൃത്യമായ ഫലങ്ങള് നല്കുന്നില്ലെന്ന് ഗവേഷകര് പറയുന്നു.
ഈ റിപ്പോര്ട്ട് പുറത്തുവന്നത് കമ്പനികള്ക്കിടയില് പ്രതിഷേധത്തിന് കാരണമായിട്ടുണ്ട്. സ്നാപ്പ്, മെറ്റ, യൂട്യൂബ് എന്നിവ പഠന ഫലങ്ങളോട് വിയോജിപ്പ് പ്രകടിപ്പിച്ചു. ഇന്സ്റ്റാഗ്രാമിന്റെ ടീന് അക്കൗണ്ട്സ് ഫീച്ചര് യുവാക്കള്ക്ക് മുമ്പത്തേക്കാള് സുരക്ഷ നല്കുന്ന രീതിയിലാണ് പ്രവര്ത്തിക്കുന്നതെന്ന് മെറ്റ പറയുന്നു. കൂടാതെ പല ഫീച്ചറുകളുടെ ദുരുപയോഗങ്ങള് റിപ്പോര്ട്ടില് കാണിക്കുന്നുണ്ടെന്ന് കമ്പനി അവകാശപ്പെട്ടിട്ടുണ്ട്. എന്നല് ഇതുമായി ബന്ധപ്പെട്ട് കാര്യമായ തെളിവുകളൊന്നും നല്കിയിട്ടില്ല.
Content Highlights :Research report states that social media security features are not working.
