LIVE TV
ചെന്നൈ: ഉദയനിധി സ്റ്റാലിന് തമിഴ്നാട് പ്രതിപക്ഷ നേതാവാകും. ഡിഎംകെ യോഗമാണ് ഉദയനിധി സ്റ്റാലിനെ പ്രതിപക്ഷ നേതാവായി തെരഞ്ഞെടുത്തത്. ഉപ പ്രതിപക്ഷ നേതാവായി കെ എന് നെഹ്റുവിനെയും വിപ്പായി ഇ വി വേലുവിനെയും തെരഞ്ഞെടുത്തു.
ഇന്നാണ് തമിഴ്നാടിന്റെ മുഖ്യമന്ത്രിയായി ടിവികെ നേതാവും നടനുമായ സി ജോസഫ് വിജയ് സത്യപ്രതിജ്ഞ ചെയ്ത് അധികാരമേറ്റത്. ആറ് പതിറ്റാണ്ടിനിപ്പുറം ദ്രാവിഡ പാര്ട്ടിയല്ലാത്ത ഒരു പാര്ട്ടി തമിഴ്നാട്ടില് സര്ക്കാര് രൂപീകരിച്ചു.
വിജയ്യുടെ പിതാവ് ചന്ദ്രശേഖര്, മാതാവ് ശോഭ ചന്ദ്രശേഖര്, തമിഴ് സിനിമാ താരം തൃഷ കൃഷ്ണന്, കോണ്ഗ്രസ് ദേശീയ അധ്യക്ഷന് മല്ലികാര്ജുന് ഖര്ഗെ, ലോക്സഭ പ്രതിപക്ഷ നേതാവ് രാഹുല് ഗാന്ധി ഉള്പ്പെടെയുള്ളവര് ചെന്നൈ നെഹ്റു സ്റ്റേഡിയത്തില് നടന്ന സത്യപ്രതിജ്ഞ ചടങ്ങില് പങ്കെടുത്തു.
വിജയ്ക്ക് പുറമേ മറ്റ് ഒമ്പത് മന്ത്രിമാരും സത്യപ്രതിജ്ഞ ചെയ്തു.
പൊതുഭരണം, ആഭ്യന്തരം, പൊലീസ് വകുപ്പുകള് വിജയ് കൈകാര്യം ചെയ്യും. ടിവികെ ജനറല് സെക്രട്ടറി എന് ആനന്ദ്, ടിവികെ ജനറല് സെക്രട്ടറി ആദവ് അര്ജുന, മുന് ഐആര്എസ് ഉദ്യോഗസ്ഥന്, ടിവികെ ചീഫ് കോര്ഡിനേറ്റര് കെ എ സെങ്കോട്ടയ്യന്, ടിവികെ ട്രഷറര് പി വെങ്കട്ടരമണന്, ടിവികെ ജനറല് സെക്രട്ടറി നിര്മല് കുമാര്, ഈറോഡ് എംഎല്എ രാജ്മോഹന്, ടിവികെ ജില്ലാ സെക്രട്ടറി ഡോ ടി കെ പ്രഭു, ശിവകാശി എംഎല്എ എസ് കീര്ത്തന എന്നിവരാണ് ഇന്ന് വിജയ്ക്കൊപ്പം സത്യപ്രതിജ്ഞ ചെയ്തത്.
Content Highlights: Udayanidhi Stalin become opposition leader in Tamil Nadu
