Get the latest news at
your fingertips!
Download our app now
LIVE TV
Search
ഗുവാഹത്തി: അസമില് എസ്ഐആര് നടക്കുമ്പോള് നാല് ലക്ഷം മിയ മുസ്ലിങ്ങളുടെ വോട്ടുകളെങ്കിലും പട്ടികയില് നിന്ന് നീക്കം ചെയ്യുമെന്ന് അസം മുഖ്യമന്ത്രി ഹിമന്ത ബിശ്വ ശര്മ. നിയമസഭാ തെരഞ്ഞെടുപ്പ് നടക്കാന് മാസങ്ങള് ബാക്കിനില്ക്കെയാണ് മുഖ്യമന്ത്രിയുടെ പരാമര്ശം. മിയ മുസ്ലിങ്ങളെ വോട്ട് ചെയ്യാന് അനുവദിക്കാത്ത വിധത്തിലുളള നടപടികളാണ് തങ്ങള് സ്വീകരിക്കുന്നതെന്നും ഇത് പ്രാഥമിക നടപടി മാത്രമാണെന്നും അദ്ദേഹം പറഞ്ഞു. എസ്ഐആര് അസമിലേക്ക് വരുമ്പോള് നാല് മുതല് അഞ്ച് ലക്ഷം വരെ മിയ മുസ്ലിങ്ങള് വോട്ടര് പട്ടികയില് നിന്ന് നീക്കം ചെയ്യപ്പെടുമെന്നും മുഖ്യമന്ത്രി വ്യക്തമാക്കി.
'കോണ്ഗ്രസ് എന്നെ അധിക്ഷേപിച്ചോട്ടെ. പക്ഷെ എന്റെ കര്ത്തവ്യം മിയ മുസ്ലിങ്ങളെ ഉപദ്രവിക്കലാണ്. അവര് കഷ്ടപ്പെട്ടില്ലെങ്കില് ദുലിയജാനിലേക്കും ടിന്സുകിയയിലേക്കും വരും. കുറച്ചുദിവസം മുന്പ് ടിന്സുകിയയിലെ ഭൂമി ഇടപാടുകളുടെ ഒരു ലിസ്റ്റ് എനിക്ക് ലഭിച്ചു. ഹിന്ദുക്കളെല്ലാം ഭൂമി വില്ക്കുകയാണ്. മിയ മുസ്ലിങ്ങളാണ് അവ വാങ്ങുന്നത്. നമ്മള് ഇപ്പോള് ശ്രദ്ധിച്ചില്ലെങ്കില് പിന്നെ എപ്പോഴാണ്? ബുദ്ധിമുട്ടുകള് നേരിട്ടാല് മാത്രമേ അവര് അസം വിടൂ. അവര്ക്കെതിരെ പ്രശ്നങ്ങള് സൃഷ്ടിക്കാന് ഞാന് ആളുകളെ പ്രോത്സാഹിപ്പിക്കുകയാണ്. നിങ്ങള് അവരെ ബുദ്ധിമുട്ടിച്ചില്ലെങ്കില് നിങ്ങളുടെ വീടുകളില് ലവ് ജിഹാദ് ഉണ്ടാകും. അതിനാല് നിങ്ങള് അവര്ക്ക് കുഴപ്പങ്ങളുണ്ടാക്കണം' ഹിമന്ത ബിശ്വ ശര്മ പറഞ്ഞു.
മിയ മുസ്ലിങ്ങള് ഓടിക്കുന്ന ഓട്ടോറിക്ഷയില് കയറിയാല് അഞ്ചുരൂപയാണ് ചാര്ജെങ്കില് നാല് രൂപയേ കൊടുക്കാവൂ എന്നും അദ്ദേഹം പറഞ്ഞു. 'അഞ്ചുരൂപയാണ് ചാര്ജെങ്കില് നിങ്ങള് നാല് രൂപയേ കൊടുക്കാവൂ. അതിനെതിരെ പരമാവധി അവര് എന്താണ് ചെയ്യുക? കേസ് കൊടുക്കും. അത് അസം പൊലീസ് കൈകാര്യം ചെയ്തോളും. ബിജെപിയും ഞാനും അവരെ ഉപദ്രവിക്കാന് തന്നെയാണ് രംഗത്തുളളത്' എന്നും അസം മുഖ്യമന്ത്രി പറഞ്ഞു.
Content Highlights: 'My duty is to make Miya Muslims suffer'says Assam Chief Minister himanta biswa sarma
