LIVE TV
ചെന്നൈ: ഡിറ്റ് വാ ചുഴലിക്കാറ്റ് തമിഴ്‌നാട് തീരത്തേക്ക് അടുക്കുന്നു. ഇതിന്റെ പശ്ചാത്തലത്തില്‍ തമിഴ്‌നാട്ടിലെ തീരദേശ പ്രദേശത്ത് അതിജാഗ്രതാ നിര്‍ദേശം നല്‍കിയിരിക്കുകയാണ് കേന്ദ്ര കാലാവസ്ഥ വകുപ്പ്. ഡിറ്റ് വാ ചുഴലിക്കാറ്റിന്റെ ഭാഗമായി തമിഴ്‌നാട്, ആന്ധ്ര, പുതുച്ചേരി എന്നിവിടങ്ങളില്‍ റെഡ് അലേര്‍ട്ട് പ്രഖ്യാപിച്ചിട്ടുണ്ട്. ശ്രീലങ്കയ്ക്ക് സമീപം ബംഗാള്‍ ഉള്‍ക്കടലില്‍ നിന്ന് വടക്ക്- പടിഞ്ഞാറന്‍ ദിശയിലേക്ക് കാറ്റ് നീങ്ങുന്നുവെന്ന് കാലാവസ്ഥ വകുപ്പ് അറിയിച്ചു. ഇന്ന് അര്‍ധരാത്രിയോടെ ഡിറ്റ് വാ തമിഴ്‌നാട് തീരത്ത് എത്തുമെന്നാണ് പ്രതീക്ഷിക്കുന്നത്.
തമിഴ്‌നാട്-പുതുച്ചേരി ഭാഗത്ത് മണിക്കൂറില്‍ 70 കിലോമീറ്റര്‍ വേഗതയിലാണ് കാറ്റ് വീശുന്നത്. ഇത് മണിക്കൂറില്‍ 90 കിലോമീറ്റര്‍ വേഗത വരെ എത്താമെന്നാണ് കണക്കുകൂട്ടല്‍. തമിഴ്‌നാട്ടിലും പുതുച്ചേരിയിലും എട്ട് മീറ്റര്‍ വരെ ഉയരത്തില്‍ കാറ്റ് വീശാനുള്ള സാധ്യതയും അധികൃതര്‍ അറിയിച്ചു. നാളെ രാവിലെ തമിഴ്‌നാട്, പുതുച്ചേരി തീരത്ത് ചുഴലിക്കാറ്റ് ആഞ്ഞടിക്കുകയും വൈകുന്നേരം വരെ ശക്തമായ കാറ്റും മഴയും തുടരുകയും ചെയ്യുമെന്ന് കേന്ദ്ര കാലാവസ്ഥ കേന്ദ്രം അറിയിച്ചു.
കാറ്റിന് സാധ്യതയുള്ള പ്രദേശത്ത് താമസിക്കുന്നവര്‍ ജാഗ്രത പുലര്‍ത്തണമെന്നും അനാവശ്യമായി പുറത്തിറങ്ങരുതെന്നും കാലാവസ്ഥ വകുപ്പ് മുന്നറിയിപ്പ് നല്‍കിയിട്ടുണ്ട്. മുന്നറിയിപ്പുള്ള സംസ്ഥാനങ്ങളില്‍ മത്സ്യത്തൊഴിലാളികള്ഡ കടലില്‍ പോകരുത്. തീരദേശത്ത് താമസിക്കുന്നവര്‍ അതീവ ജാഗ്രത പുലര്‍ത്തണമെന്നും അറിയിപ്പുണ്ട്. കേരളത്തിലും ശക്തമായ മഴയ്ക്കുള്ള സാധ്യത കാലാവസ്ഥ വകുപ്പ് അറിയിച്ചിട്ടുണ്ട്.
Content Highlight; Cyclone Ditwah: Red alert issued in Tamil Nadu, Andhra Pradesh, and Puducherry
