Get the latest news at
your fingertips!
Download our app now
LIVE TV
Search
ന്യൂഡൽഹി: തീവ്രമായ സൗരോ‍ർജ്ജ വികിരണം A320-ഫാമിലി ജെറ്റുകളിലെ ഫ്ലൈറ്റ്-കൺട്രോൾ സിസ്റ്റങ്ങൾ ഉപയോഗിക്കുന്ന ഡാറ്റയെ ബാധിച്ചേക്കാമെന്ന് മുന്നറിയിപ്പ്. ഇതിന് പിന്നാലെ ഇൻഡിഗോ, എയർ ഇന്ത്യ, എയർ ഇന്ത്യ എക്സ്പ്രസ് എന്നീ വിമാന കമ്പനികൾ വ്യാപകമായ വിമാന സർവീസിൽ തടസ്സം നേരിട്ടേക്കാമെന്നും റിപ്പോർട്ട്. ഇന്ത്യയിൽ 200 മുതൽ 250 വരെ A320 വിമാനങ്ങൾക്ക് ഉടനടി സോഫ്റ്റ്‌വെയർ അപ്‌ഡേറ്റുകളോ ഹാർഡ്‌വെയർ പുനഃക്രമീകരണങ്ങളോ ആവശ്യമാണെന്നാണ് പിടിഐ റിപ്പോർട്ട് ചെയ്യുന്നത്. ഇതിനായുള്ള പരിഹാരത്തിന് എഞ്ചിനീയർമാർ ഒരുങ്ങുന്നതിനാൽ വിമാന സർവീസുകളിൽ തടസ്സം നേരിടുമെന്നാണ് റിപ്പോർട്ട്.
A320വിന് അടുത്തിടെ വിദേശത്ത് സംഭവിച്ച ഒരു സാങ്കേതിക തകരാർ വിശകലനം ചെയ്തതിൽ നിന്നതിൽ നിന്നാണ് ഈ നിഗമനത്തിൽ എത്തിയത്. എലിവേറ്റർ ഐലറോൺ കമ്പ്യൂട്ടറിലെ (ELAC) തകരാർ കാരണമാണ് വിമാനം അൽപ്പനേരത്തേയ്ക്ക് താഴേക്ക് പതിച്ചതെന്നായിരുന്നു കണ്ടെത്തൽ. ഏതെങ്കിലും തരത്തിൽ തകരാറുകൾ കണ്ടെത്തിയ വിമാനങ്ങളിൽ അടുത്ത പറക്കലിന് മുമ്പായി സർവീസ് ചെയ്യാവുന്ന ELAC യൂണിറ്റുകൾ സ്ഥാപിക്കാൻ വിമാന കമ്പനികൾക്ക് യൂറോപ്യൻ യൂണിയൻ ഏവിയേഷൻ സേഫ്റ്റി ഏജൻസി (EASA) അടിയന്തര എയർവർത്തിനസ് നിർദ്ദേശം നൽകിയിട്ടുണ്ട്. ELAC സംവിധാനങ്ങളാണ് പ്രധാന ഫ്ലൈറ്റ്-കൺട്രോൾ പ്രവർത്തനങ്ങൾ കൈകാര്യം ചെയ്യുന്നത്.
ഇന്ത്യയിൽ ഏകദേശം 560 A320 ഫാമിലി ജെറ്റുകളുണ്ട്. ഇതിൽ പകുതിയോളം എണ്ണത്തിന് സാങ്കേതിക മാറ്റം ആവശ്യമായി വന്നേക്കാമെന്നാണ് റിപ്പോർട്ട്. ഇത്രയധികം ജെറ്റുകൾക്ക് അറ്റകുറ്റ പണി ആവശ്യമായി വന്നാൽ വിമാന സർവീസുകളിൽ തടസ്സം നേരിട്ടേക്കാമെന്നാണ് ചൂണ്ടിത്താണിക്കപ്പെടുന്നത്.
ഇൻഡിഗോ ഇതിനകം തന്നെ സർവീസിൽ തടസ്സങ്ങൾ നേരിട്ടേക്കാമെന്ന് അറിയിച്ചിട്ടുണ്ട്. 'A320 ജെറ്റുകൾക്കായി എയർബസ് ഒരു സാങ്കേതിക ഉപദേശം നൽകിയിട്ടുണ്ട്. എല്ലാ സുരക്ഷാ പ്രോട്ടോക്കോളുകൾക്കും അനുസൃതമായി, പൂർണ്ണ ജാഗ്രതയോടെയും ശ്രദ്ധയോടെയും ഞങ്ങളുടെ വിമാനങ്ങളിലെ നിർബന്ധിത അപ്‌ഡേറ്റുകൾ ഞങ്ങൾ മുൻകൂട്ടി പൂർത്തിയാക്കുകയാണ്. ഈ മുൻകരുതൽ അപ്‌ഡേറ്റുകൾ നടത്തുമ്പോൾ ചില വിമാനങ്ങളിൽ ചില ഷെഡ്യൂൾ മാറ്റങ്ങൾ കണ്ടേക്കാം' എന്നാണ് ഇൻഡിഗോ വ്യക്തമാക്കുന്നത്.
എയർബസ് A320 ജെറ്റുകളിൽ സോഫ്റ്റ്‌വെയർ പ്രശ്നങ്ങൾ പരിഹരിക്കണമെന്ന മുന്നറിയിപ്പിനെ തുടർന്ന് അടിയന്തര മുൻകരുതൽ നടപടികൾ ആരംഭിച്ചതായി എയർ ഇന്ത്യ എക്സ്പ്രസും പ്രസ്താവനയിലൂടെ അറിയിച്ചിട്ടുണ്ട്. 'ഞങ്ങളുടെ മിക്ക വിമാനങ്ങളെയും ഇത് ബാധിച്ചിട്ടില്ലെങ്കിലും ലോകമെമ്പാടുമുള്ള ഓപ്പറേറ്റർമാർക്ക് ഈ മാർഗ്ഗനിർദ്ദേശം ബാധകമാണ്. അതിനാൽ പ്രശ്ന പരിഹാരത്തിൻ്റെ ഭാഗമായി ചില വിമാന സർവീസുകളിൽ കാലതാമസമോ റദ്ദാക്കലോ ഉണ്ടായേക്കാ'മെന്നും എയർ ഇന്ത്യ എക്സ്പ്രസ് അറിയിച്ചിട്ടുണ്ട്. എയർ ഇന്ത്യ എക്സ്പ്രസിന്റെ 31 ഫാമിലി ജെറ്റുകളെ ഈ തകരാർ ബാധിച്ചേക്കാമെന്നാണ് ബന്ധപ്പെട്ട വൃത്തങ്ങളെ ഉദ്ധരിച്ച് പിടിഐ റിപ്പോർട്ട് ചെയ്യുന്നത്.
തങ്ങളുടെ ചില A320 ജെറ്റുകൾ സോഫ്റ്റ്‌വെയർ, ഹാർഡ്‌വെയർ റീഅലൈൻമെന്റിന് വിധേയമാകുമെന്നും ഇത് ടേൺഎറൗണ്ട് സമയം വർദ്ധിപ്പിക്കുമെന്നും എയർ ഇന്ത്യ എക്സ് പോസ്റ്റിൽ അറിയിച്ചിട്ടുണ്ട്. സാങ്കേതിക നവീകരണം നടപ്പിലാക്കുന്നതുവരെ യാത്രക്കാർക്ക് ഇത് കൊണ്ട് ഉണ്ടായേക്കാവുന്ന അസൗകര്യത്തിൽ എയർ ഇന്ത്യ ഖേദിക്കുന്നുവെന്നും കുറിപ്പ് വ്യക്തമാക്കുന്നുണ്ട്. തങ്ങളുടെ എത്ര വിമാനങ്ങളെയാണ് ഈ തകരാർ ബാധിച്ചതെന്ന് മൂന്ന് വിമാന കമ്പനികളും പക്ഷെ വെളിപ്പെടുത്തിയിട്ടില്ല.
Content Highlights: Air India said parts of its A320 fleet will undergo software and hardware realignment
