LIVE TV
കൊച്ചി: കാലടി സംസ്കൃത സര്വകലാശാലയില് സിന്ഡിക്കേറ്റ് യോഗത്തിനിടെ വൈസ് ചാന്സലര് സിസ തോമസിനെ തടഞ്ഞ കേസില് 17 എസ്എഫ്ഐ പ്രവര്ത്തകര്ക്ക് മുൻകൂർ ജാമ്യം. ഹൈക്കോടതിയാണ് മുൻകൂർ ജാമ്യം അനുവദിച്ചത്. യൂണിയന് ചെയര്മാന്, എസ്എഫ്ഐ യൂണിറ്റ് സെക്രട്ടറി ഉള്പ്പെടെയുള്ളവര്ക്കാണ് മുൻകൂർ ജാമ്യം.
ഓഗസ്റ്റ് 13-നായിരുന്നു സിന്ഡിക്കേറ്റ് യോഗത്തിനിടെ വി സി സിസ തോമസിനെതിരെ വിദ്യാര്ത്ഥികള് പ്രതിഷേധിച്ചത്. സര്വകലാശാലയില് ചേര്ന്ന സിന്ഡിക്കേറ്റ് യോഗത്തിലേക്ക് പ്രവര്ത്തനരഹിതമായ ലൈറ്റുകളുടെ ശവമഞ്ചം അടക്കം കൊണ്ടുവന്നായിരുന്നു എസ്എഫ്ഐയുടെ പ്രതിഷേധം. വി സി സിസ തോമസിനേയും സിന്ഡിക്കേറ്റ് അംഗങ്ങളെയും പ്രതിഷേധക്കാര് തടഞ്ഞുവെച്ചിരുന്നു.
ഇതിന് പിന്നാലെ തനിക്കെതിരെ കയ്യേറ്റം നടന്നുവെന്ന് ആരോപിച്ച് സിസ തോമസ് രംഗത്തെത്തുകയായിരുന്നു. സിന്ഡിക്കേറ്റ് അംഗങ്ങളെ മുറിയില് പൂട്ടിയിട്ടെന്നും സിസ തോമസ് പറഞ്ഞിരുന്നു. ഔദ്യോഗിക വാഹനം നശിപ്പിച്ചെന്ന ആരോപണവും അവര് ഉന്നയിച്ചിരുന്നു. സംഭവത്തില് പരാതി നല്കില്ലെന്നായിരുന്നു സിസ തോമസ് ആദ്യം പറഞ്ഞത്. എന്നാല് പിന്നീട് പരാതി നല്കുകയായിരുന്നു.
Content Highlights: high court has granted anticipatory bail to 17 SFI activists in a case related to allegedly obstructing Vice Chancellor
