LIVE TV
കോഴിക്കോട്: കോഴിക്കോട് മെഡിക്കല് കോളേജില് രോഗി മരിച്ചത് ചികിത്സാ പിഴവിനെ തുടര്ന്നെന്ന് പരാതി. വാണിമേല് സ്വദേശി റീജിത്താണ് മരിച്ചത്. കിഡ്നി സ്റ്റോണിന് ചികിത്സയ്ക്ക് എത്തിയതായിരുന്നു റീജിത്ത്. കഴിഞ്ഞ വര്ഷം ഓഗസ്റ്റിലാണ് കിഡ്നി സ്റ്റോണ് ബാധിച്ച് റീജിത്ത് കോഴിക്കോട് മെഡിക്കല് കോളേജിലെ യൂറോളജി ഡിപ്പാര്ട്ട്മെന്റില് എത്തിയത്. ഓഗസ്റ്റില് ആദ്യ സര്ജറിയും ഈ വര്ഷം ഏപ്രിലില് രണ്ടാമത്തെ സര്ജറിയും ചെയ്തിരുന്നു. ആദ്യ സര്ജറി ചെയ്തതില് വീഴ്ചയുണ്ടായി എന്നാണ് കുടുംബത്തിന്റെ ആരോപണം.
ശസ്ത്രക്രിയ ഇടത് വശത്ത് ചെയ്യുന്നതിന് പകരം വലതുവശത്ത് ചെയ്തു. തുടര്ന്ന് പഴുപ്പുണ്ടായി. പലതവണയായി ചികിത്സയ്ക്ക് മെഡിക്കല് കോളേജിലേക്ക് വന്നിരുന്നു. ഏപ്രില് മാസത്തില് രണ്ടാമത് വലതുവശത്ത് തന്നെ ശസ്ത്രക്രിയ ചെയ്തു. കുടുംബത്തിന്റെ അനുമതിയില്ലാതെയാണ് ശസ്ത്രക്രിയ ചെയ്തതെന്നാണ് ആരോപണം. മൃതദേഹം ഏറ്റുവാങ്ങില്ല എന്ന നിലപാടിലാണ് കുടുംബം.
അതേസമയം ചികിത്സാ പിഴവ് ആരോപണം നിഷേധിച്ച് ആശുപത്രി അധികൃതര് രംഗത്തെത്തി. രോഗിയുടെ രണ്ട് വൃക്കകളിലും കല്ലുകള് നിറഞ്ഞിരുന്നു. ഗുരുതര രോഗാവസ്ഥയിലായിരുന്നുവെന്നും ആശുപത്രിയിലെ യൂറോളജിസ്റ്റ് ഡോ. മണികണ്ഠന് പ്രതികരിച്ചു.
Content Highlights: Kidney stone patient dies in Kozhikode Medical College; family alleges medical negligence
