Get the latest news at
your fingertips!
Download our app now
LIVE TV
Search
തിരുവനന്തപുരം: ശബരിമല സ്വര്ണക്കൊള്ള കേസില് ദേവസ്വം ബോര്ഡ് മുന് കമ്മീഷണര് എന് വാസു ജയില് മോചിതനായി. വാസു സമര്പ്പിച്ച സ്വാഭാവിക ജാമ്യഹര്ജിയില് കൊല്ലം വിജിലന്സ് കോടതിയാണ് ജാമ്യം അനുവദിച്ചത്. ഉപാധികളോടെയാണ് ജാമ്യം അനുവദിച്ചത്.
റിമാന്ഡ് കാലാവധി 90 ദിവസം പിന്നിട്ടതോടെയായിരുന്നു എന് വാസു ജാമ്യം തേടിയത്. കട്ടിളപ്പാളിക്കേസിലെ മൂന്നാം പ്രതിയാണ് എന് വാസു. എസ്ഐടി കുറ്റപത്രം സമര്പ്പിക്കാത്തത് ചൂണ്ടിക്കാട്ടിയായിരുന്നു ജാമ്യനീക്കം. ശബരിമല കട്ടിളപ്പാളികള് ആദ്യമായി ചെമ്പാണെന്ന് രേഖപ്പെടുത്തിയത് എന് വാസു ദേവസ്വം ബോര്ഡിന്റെ അംഗീകാരത്തിനായി നല്കിയ കത്തിലാണെന്ന് എസ്ഐടി കണ്ടെത്തിയിരുന്നു.
2019 ഫെബ്രുവരിയില് വാസു നല്കിയ കത്ത് അംഗീകരിച്ചാണ് മാര്ച്ചില് ബോര്ഡ് ഉണ്ണികൃഷ്ണന് പോറ്റിയുടെ കൈയില് കട്ടിളപ്പാളികള് കൊടുത്തുവിടാന് തീരുമാനിച്ചതെന്നും അന്വേഷണത്തില് വ്യക്തമായിരുന്നു. ഇതനുസരിച്ചുള്ള ദേവസ്വം സെക്രട്ടറിയായിരുന്ന എസ് ജയശ്രീയുടെ ഉത്തരവിന്റെ അടിസ്ഥാനത്തില് പാളികള് കടത്തിയെന്നും ദേവസ്വം ഉദ്യോഗസ്ഥര്ക്ക് ഗുരുതര വീഴ്ച പറ്റിയെന്നും അന്വേഷണ റിപ്പോര്ട്ടിലുണ്ടായിരുന്നു. പിന്നാലെയാണ് പ്രതി ചേര്ത്തത്.
2019 നവംബര് മുതല് രണ്ടുവര്ഷമാണ് എന് വാസു ദേവസ്വം ബോര്ഡ് പ്രസിഡന്റായി പ്രവര്ത്തിച്ചത്. ഇതിന് മുമ്പ് 2018 ഫെബ്രുവരി മുതല് 2019 മാര്ച്ച് വരെ ദേവസ്വം കമ്മീഷണറായും പ്രവര്ത്തിച്ചു. പി കെ ഗുരുദാസന് എക്സൈസ് മന്ത്രിയായിരുന്ന സമയത്ത് വാസു പേഴ്സണല് സ്റ്റാഫ് അംഗമായി സേവനമനുഷ്ഠിച്ചിട്ടുണ്ട്.
Content Highlights: Sabarimala gold robbery case N Vasu released from jail
