Get the latest news at
your fingertips!
Download our app now
LIVE TV
Search
കണ്ണൂര്: സിപിഐഎം ജില്ലാകമ്മിറ്റി അംഗം വി കുഞ്ഞികൃഷ്ണനെ തള്ളി സിപിഐഎം. കുഞ്ഞികൃഷ്ണന്റെ ആരോപണങ്ങള് വാസ്തവ വിരുദ്ധമാണെന്നും പാര്ട്ടിയെ ബഹുജന മധ്യത്തില് തെറ്റിദ്ധരിപ്പിക്കുന്ന ആരോപണങ്ങള് ഉന്നയിച്ച് എതിരാളികള്ക്ക് കടന്നാക്രമിക്കാന് ആയുധം നല്കുന്ന കുഞ്ഞികൃഷ്ണന്റെ പ്രവര്ത്തി അംഗീകരിക്കാന് കഴിയാത്തതാണെന്നും സിപിഐഎം വ്യക്തമാക്കി. തെരഞ്ഞെടുപ്പ് അടുത്ത ഘട്ടത്തില് മാധ്യമങ്ങളുടെയും രാഷ്ട്രീയ ശത്രുക്കളുടെയും കോടാലികൈയ്യായി മാറുന്ന തരത്തിലാണ് കുഞ്ഞികൃഷ്ണന്റെ പ്രവര്ത്തി. ഇത് അംഗീകരിക്കാന് സാധിക്കില്ലെന്നും സിപിഐഎം വിശദീകരിച്ചു.
'വര്ഷങ്ങള്ക്ക് മുന്പ് പാര്ട്ടിയില് ഉയര്ന്നുവന്ന കാര്യങ്ങള് പാര്ട്ടി ചര്ച്ചചെയ്ത് തീരുമാനം കൈക്കൊണ്ടതാണ്. സമയ ബന്ധിതമായി വരവ്-ചിലവ് കണക്ക് അവതരിപ്പിക്കുന്നതിലുള്ള വീഴ്ച അല്ലാതെ വ്യക്തിപരമായി ആരും ധനാപഹരണം നടത്തിയിട്ടില്ലെന്ന കമ്മീഷന് റിപ്പോര്ട്ട് ജില്ലാ കമ്മിറ്റി ചര്ച്ച ചെയ്ത് അംഗീകരിച്ചതുമാണ്. 2021 ല് ഉയര്ന്നുവന്ന ആക്ഷേപത്തെ തുടര്ന്ന് പാര്ട്ടി ജില്ലാ കമ്മിറ്റി നിശ്ചയിച്ച കമ്മീഷന് പരിശോധന നടത്തുകയും, കമ്മീഷന്റെ റിപ്പോര്ട്ട് പാര്ട്ടി ജില്ലാ കമ്മിറ്റി ചര്ച്ച ചെയ്ത് ചില സംഘടന നടപടികള് സ്വീകരിച്ചതുമാണ്. പാര്ട്ടി ജില്ലാ കമ്മിറ്റിയും, പാര്ട്ടി പയ്യന്നൂര് ഏരിയ കമ്മിറ്റിയും നിശ്ചയിച്ച കമ്മീഷനുകളാണ് വിവിധ ആക്ഷേപങ്ങളെക്കുറിച്ച് അതത് ഘട്ടത്തില് അന്വേഷിച്ച് അതത് കമ്മിറ്റികള് ചര്ച്ച ചെയ്ത് തീരുമാനങ്ങള് കൈക്കൊണ്ടത്. ഈ ചര്ച്ചയിലും, തീരുമാനങ്ങളിലും വി. കുഞ്ഞികൃഷ്ണനും പങ്കാളിയായതാണ്', സിപിഐഎം വിശദീകരിച്ചു.
സമ്മേളനം നടക്കുന്ന ഘട്ടത്തിലും കുഞ്ഞികൃഷ്ണന് ഉന്നയിച്ച പുതിയ ആരോപണങ്ങള് പാര്ട്ടി ജില്ലാ കമ്മിറ്റി നിശ്ചയിച്ച കമ്മീഷന് അന്വേഷിക്കുകയും റിപ്പോര്ട്ട് ചര്ച്ച ചെയ്തതുമാണ്. വിഭാഗീയ ലക്ഷ്യങ്ങളോടെ തെറ്റായ ആരോപണങ്ങള് ബോധപൂര്വ്വം ഉന്നയിക്കുകയായിരുന്നു എന്ന് കണ്ടെത്തിയതിനെ തുടര്ന്ന് വി. കുഞ്ഞികൃഷ്ണനെതിരെ അച്ചടക്ക നടപടി സ്വീകരിച്ചതുമാണ്. 8 മാസങ്ങള്ക്ക് മുമ്പ് നടന്ന ജില്ലാ കമ്മിറ്റി യോഗത്തില് തനിക്ക് തെറ്റുപറ്റിയെന്ന് വി കുഞ്ഞികൃഷ്ണന് തുറന്ന് പറഞ്ഞതുമാണ്. അതിന് ശേഷം പാര്ട്ടിയുടെ വിവിധ ഘടക യോഗങ്ങളിലും പരിപാടികളിലും വി കുഞ്ഞികൃഷ്ണന് പങ്കെടുത്തതാണെന്നും സിപിഐഎം ചൂണ്ടിക്കാട്ടി.
Content Highlights: Kannur CPIM Denied the allegations by v kunhikrishnan allegation over fund Fraud
