Get the latest news at
your fingertips!
Download our app now
LIVE TV
Search
പത്തനംതിട്ട: പത്തനംതിട്ട കോട്ടാങ്ങല് പഞ്ചായത്ത് പ്രസിഡന്റായി യുഡിഎഫിലെ കെ വി ശ്രീദേവി തെരഞ്ഞെടുക്കപ്പെട്ടു. നറുക്കെടുപ്പിലൂടെയാണ് തെരഞ്ഞെടുക്കപ്പെട്ടത്. യുഡിഎഫിനും ബിജെപിക്കും അഞ്ച് അംഗങ്ങള് ഉണ്ടായിരുന്നു. തുടര്ന്നാണ് നറുക്കെടുപ്പിലേക്ക് പോയത്. നേരത്തെ പ്രസിഡന്റ് സ്ഥാനത്തേക്ക് നടന്ന തെരഞ്ഞെടുപ്പില് ശ്രീദേവി തന്നെയായിരുന്നു വിജയിച്ചത്. എന്നാല് എസ്ഡിപിഐ വോട്ട് ചെയ്തതിന്റെ പേരില് സത്യപ്രതിജ്ഞയ്ക്ക് മുന്പ് തന്നെ രാജിവെക്കുകയായിരുന്നു.
ഇന്ന് തന്നെ പഞ്ചായത്തില് വൈസ് പ്രസിഡന്റ് തെരഞ്ഞെടുപ്പും നടക്കും. ചട്ടലംഘനം നടന്നുവെന്ന് ചൂണ്ടിക്കാട്ടി എസ്ഡിപിഐ നല്കിയ പരാതിയെ തുടര്ന്നായിരുന്നു വൈസ് പ്രസിഡന്റ് തെരഞ്ഞെടുപ്പ് കമ്മീഷന് അസാധുവാക്കിയത്. എന്ഡിഎയും യുഡിഎഫും എസ്ഡിപിഐയും വൈസ് പ്രസിഡന്റ് തെരഞ്ഞെടുപ്പില് സ്ഥാനാര്ത്ഥിയെ നിര്ത്തിയിരുന്നു. തെരഞ്ഞെടുപ്പ് കഴിഞ്ഞപ്പോള് യുഡിഎഫ് 5, ബിജെപി 5, എസ്ഡിപിഐ 3, എല്ഡിഎഫ് 1 എന്നിങ്ങനെയായിരുന്നു കക്ഷി നില.
മൂന്ന് നാമനിര്ദേശങ്ങളുള്ള സാഹചര്യത്തില് രണ്ടുപേര്ക്ക് സമനില ലഭിച്ചാല്, ഏറ്റവും കുറഞ്ഞ വോട്ട് നേടിയ കക്ഷിയെ ഒഴിവാക്കി വീണ്ടും തെരഞ്ഞെടുപ്പ് നടത്തുന്നതാണ് പതിവ്. എന്നാല് കോട്ടാങ്ങല് പഞ്ചായത്തില് രണ്ടാമതൊരു തെരഞ്ഞെടുപ്പ് നടന്നിരുന്നില്ല. നേരെ നറുക്കെടുപ്പിലേക്ക് കടക്കുകയായിരുന്നുവെന്നും ഇത് തെരഞ്ഞെടുപ്പ് ചട്ടവിരുദ്ധമാണെന്നുമായിരുന്നു എസ്ഡിപിഐ പരാതി.
നറുക്കെടുപ്പിലും വീഴ്ച വരുത്തിയതായും എസ്ഡിപിഐ നല്കിയ പരാതിയില് ആരോപിക്കുന്നുണ്ട്. സാധാരണ നിലയില് രണ്ട് പേരുകളിലെ നറുക്കെടുപ്പാണെങ്കില് എടുക്കുന്ന നറുക്കിലെ പേരുകാരാണ് തെരഞ്ഞെടുക്കപ്പെടുക. കോണ്ഗ്രസ് സ്ഥാനാര്ത്ഥിയുടെ പേര് എഴുതിയ നറുക്കായിരുന്നു എടുത്തത്. എന്നാല് ഇത് ഒഴിവാക്കി ബിജെപി സ്ഥാനാര്ത്ഥിയെ വൈസ്പ്രസിഡന്റായി റിട്ടേണിങ് ഓഫീസര് തെരഞ്ഞെടുത്തുവെന്നുമാണ് പരാതി.
Content Highlights: Pathanamthitta Kottangal Panchayat President election UDF Wins
