LIVE TV
പോര്‍ച്ചുഗല്‍ ദേശീയ ക്യാമ്പ് വിട്ടതിനെത്തുടര്‍ന്ന് പോര്‍ച്ചുഗീസ് ഫുട്‌ബോള്‍ ഫെഡറേഷന്‍ അച്ചടക്ക നടപടികള്‍ ആരംഭിച്ച പശ്ചാത്തലത്തിലും, കളത്തിലിറങ്ങി കരിയറിലെ 1,000 ഗോളുകള്‍ എന്ന ലക്ഷ്യത്തിലേക്ക് മുന്നോട്ട് കുതിച്ച് ക്രിസ്റ്റ്യാനോ റൊണാള്‍ഡോ. എഎഫ്സി ചാമ്പ്യന്‍സ് ലീഗ് എലൈറ്റില്‍ അല്‍ നസര്‍ 3-1 ന് നെഫ്ചിയെ പരാജയപ്പെടുത്തിയ മത്സരത്തിലാണ് റൊണാള്‍ഡോ ക്ലബ്ബിനും രാജ്യത്തിനുമായി തന്റെ 981-ാം പ്രൊഫഷണല്‍ ഗോള്‍ കുറിച്ചത്.
മത്സരത്തിന്റെ 33-ാം മിനിറ്റില്‍ ആഞ്ചലോ ഗബ്രിയേലിലൂടെ അല്‍ നസര്‍ മുന്നിലെത്തി. ഒന്‍പത് മിനിറ്റുകള്‍ക്ക് ശേഷം (42-ാം മിനിറ്റില്‍) റൊണാള്‍ഡോ ടീമിന്റെ രണ്ടാം ഗോള്‍ നേടി. 51-ാം മിനിറ്റില്‍ അലിഷര്‍ ഒഡിലോവിലൂടെ നെഫ്ചി ഒരു ഗോള്‍ മടക്കി. എന്നാല്‍ 78-ാം മിനിറ്റില്‍ അന്‍വര്‍ജോണ്‍ ഗോഫുറോവിന്റെ ഓണ്‍ ഗോള്‍ അല്‍ നസ്‌റിന് രണ്ട് ഗോളിന്റെ ലീഡ് സമ്മാനിക്കുകയും മത്സരം 3-1 ന് അല്‍ നസ്ര്‍ വിജയിക്കുകയും ചെയ്തു. 'ഇന്ന് രാത്രിയുടേത് പ്രധാനപ്പെട്ട വിജയമാണ്. നമ്മള്‍ മുന്നോട്ട് കുതിക്കുന്നു' -മത്സരശേഷം റൊണാള്‍ഡോ തന്റെ ഇന്‍സ്റ്റാഗ്രാമില്‍ കുറിച്ചു.
യുവേഫ നേഷന്‍സ് ലീഗിനിടെ ദേശീയ ടീമിന്റെ ക്യാമ്പ് വിട്ടതിനെ തുടര്‍ന്നാണ് 41-കാരനായ റൊണാള്‍ഡോയെ പോര്‍ച്ചുഗീസ് ഫുട്‌ബോള്‍ ഫെഡറേഷന്‍ താത്കാലികമായി സസ്പെന്‍ഡ് ചെയ്തത്. അന്വേഷണം പൂര്‍ത്തിയാകുന്നതുവരെ പോര്‍ച്ചുഗീസ് ഫുട്‌ബോള്‍ ഫെഡറേഷന്റെ ഡിസിപ്ലിനറി കൗണ്‍സില്‍ അടിയന്തിര പ്രാധാന്യത്തോടെയാണ് ഈ താത്കാലിക വിലക്ക് ഏര്‍പ്പെടുത്തിയിരിക്കുന്നത്. കേസ് നിലവില്‍ ഫെഡറേഷന്റെ അച്ചടക്ക അന്വേഷണ സമിതിക്ക് കൈമാറിയിരിക്കുകയാണ്. ഡെന്മാര്‍ക്കിനെതിരായ മത്സരത്തിന് 24 മണിക്കൂര്‍ മുന്‍പാണ് റൊണാള്‍ഡോ പോര്‍ച്ചുഗല്‍ ക്യാമ്പ് വിട്ടത്. നോര്‍വേയ്ക്കെതിരായ തൊട്ടുമുന്‍പത്തെ മത്സരത്തില്‍ റൊണാള്‍ഡോയെ സബ്സ്റ്റിറ്റിയൂട്ട് ബഞ്ചിലിരുത്തിയിരുന്നു. രണ്ടാം പകുതിയില്‍ കളത്തിലിറങ്ങുമെന്ന പ്രതീക്ഷയില്‍ വാം-അപ്പ് ചെയ്യാന്‍ ആവശ്യപ്പെട്ടെങ്കിലും പിന്നീട് അദ്ദേഹത്തെ കളത്തിലിറക്കാന്‍ ഹെഡ് കോച്ച് ജോര്‍ജ്ജ് ജീസസ് തയ്യാറായില്ല. ഇത് റൊണാള്‍ഡോയെ നിരാശനാക്കി. തന്ത്രപരമായ തീരുമാനമായിരുന്നു ഇതെന്ന് ജോര്‍ജ്ജ് ജീസസ് വ്യക്തമാക്കിയെങ്കിലും, കളിക്കാരനും പരിശീലകനും തമ്മിലുള്ള ബന്ധം കൂടുതല്‍ വഷളാകുന്നതിനാണ് ഇത് വഴിവെച്ചത്. ടീമിലെ തന്റെ പങ്ക് സംബന്ധിച്ച ആശയവിനിമയം തകര്‍ന്നതോടെ റൊണാള്‍ഡോ ക്യാമ്പ് വിടുകയായിരുന്നു.
പോര്‍ച്ചുഗീസ് ഫുട്‌ബോള്‍ ഫെഡറേഷന്റെ അച്ചടക്ക നിയമങ്ങള്‍ അനുസരിച്ച്, ക്യാമ്പ് വിട്ടത് ന്യായീകരിക്കാന്‍ കഴിയാത്തതാണെന്ന് തെളിഞ്ഞാല്‍ റൊണാള്‍ഡോയ്ക്ക് ഒന്നു മുതല്‍ ആറു മാസം വരെ വിലക്കും പിഴയും നേരിടേണ്ടി വന്നേക്കാം. കൃത്യമായ കാരണം കാണിക്കാതെ പരിശീലനത്തില്‍ നിന്നോ മത്സരങ്ങളില്‍ നിന്നോ മറ്റ് ഔദ്യോഗിക പരിപാടികളില്‍ നിന്നോ വിട്ടുനില്‍ക്കുന്ന കളിക്കാര്‍ക്ക് ഇത്തരം ശിക്ഷാനടപടികള്‍ നേരിടേണ്ടി വരുമെന്ന് നിയമങ്ങള്‍ വ്യക്തമാക്കുന്നു. കൂടാതെ 500 മുതല്‍ 1,000 യൂറോ വരെ സാമ്പത്തിക പിഴയും അടക്കേണ്ടി വന്നേക്കാം.
content highlights: Cristiano Ronaldo Nears 1000 Career Goals as Al Nassr Goal-Scoring Spree Continues
