LIVE TV
ഇന്നലെ നടന്ന 2026 ലോകകപ്പിലെ പോർച്ചുഗലിന്റെ ആദ്യ മത്സരത്തിൽ കോംഗോയോട് അപ്രതീക്ഷിത സമനില വഴങ്ങിയിരുന്നു. അതിന് പിന്നാലെ പോർച്ചുഗലിന്റെ ഇതിഹാസതാരം ക്രിസ്റ്റ്യാനോ റൊണാള്ഡോയ്ക്കെതിരെ രൂക്ഷവിമര്ശനവുമായി രംഗത്തെത്തിയിരിക്കുകയാണ് ഫ്രാന്സിന്റെ മുന് ഇതിഹാസ താരം തീയറി ഹെന്റി. വളരെ മികച്ച അവസരങ്ങള് ലഭിച്ചിട്ടും റൊണാള്ഡോ ടീമിനായി കളിക്കാതെ സ്വന്തം റെക്കോര്ഡുകള്ക്ക് വേണ്ടിയാണ് ശ്രമിച്ചതെന്നും, അത് മത്സരത്തില് പോര്ച്ചുഗലിന് വലിയ തിരിച്ചടിയായെന്നുമാണ് ഹെന്റി തുറന്നടിച്ചിരിക്കുന്നത്.
'ക്രിസ്റ്റ്യാനോ റൊണാള്ഡോ ഒരു അത്ഭുത പ്രതിഭയാണെന്നതില് ആര്ക്കും തര്ക്കമില്ല. എന്നാല് ഈ പ്രായത്തിലും അദ്ദേഹം ടീമിന്റെ വിജയത്തേക്കാള് പ്രാധാന്യം നല്കുന്നത് വ്യക്തിഗത റെക്കോര്ഡുകള്ക്കാണ്. കളികളത്തില് മറ്റ് താരങ്ങൾക്ക് പാസ് നല്കാന് മികച്ച അവസരങ്ങള് ഉണ്ടായിരുന്നിട്ടും അദ്ദേഹം സ്വയം ഷോട്ടുതിര്ക്കാനാണ് ശ്രമങ്ങൾ നടത്തിയത്. ഈ സ്വാര്ത്ഥത ഒരു ലോകകപ്പ് ടൂര്ണമെന്റില് ടീമിന് ഒട്ടും ഗുണം ചെയ്യില്ല', ഹെന്റി വിമർശനം ഉയർത്തി.
റൊണാള്ഡോ കളത്തില് നില്ക്കുന്നത് പോര്ച്ചുഗല് നിരയിലെ റാഫേല് ലിയാവോ, ജോവോ ഫെലിക്സ് തുടങ്ങിയ മികച്ച യുവ മുന്നേറ്റ നിരക്കാരുടെ സ്വതന്ത്രമായ കളി ശൈലിയെ ബാധിക്കുന്നുണ്ടെന്നും ഹെന്റി ചൂണ്ടിക്കാണിക്കുന്നു. പന്ത് എപ്പോഴും റൊണാള്ഡോയ്ക്ക് തന്നെ പാസ് നൽകണമെന്ന രീതിയിലുള്ള സഹകളിക്കാരുടെ ചിന്ത ടീമിന്റെ സ്വാഭാവിക നീക്കങ്ങളെ വല്ലാതെ തടസ്സപ്പെടുത്തുന്നുണ്ട്. പരിശീലകന് റോബര്ട്ടോ മാര്ട്ടിനസ് അടുത്ത മത്സരങ്ങളില് കടുത്ത തീരുമാനങ്ങള് എടുക്കാന് തയ്യാറാകണമെന്നും, ടീമിന്റെ താല്പര്യങ്ങള്ക്കാണ് വ്യക്തികളേക്കാള് സ്ഥാനം നല്കേണ്ടതെന്നും അദ്ദേഹം കൂട്ടിച്ചേര്ത്തു.
Content highlight: Thierry Henry slams cristiano Ronaldo selfish play style Portugal
