താരങ്ങളുടെ മൊഴിയെടുക്കാന്‍ ഓസ്‌ട്രേലിയ; പന്ത് ചുരണ്ടല്‍ വിവാദത്തില്‍ സ്വതന്ത്ര ഫോറം രൂപീകരിക്കും

ദക്ഷിണാഫ്രിക്കന്‍ പര്യടനത്തിനിടെയാണ് ലോക ക്രിക്കറ്റിനെ പിടിച്ചുകുലുക്കിയ പന്ത് ചുരണ്ടല്‍ വിവാദമുണ്ടായത്

താരങ്ങളുടെ മൊഴിയെടുക്കാന്‍ ഓസ്‌ട്രേലിയ; പന്ത് ചുരണ്ടല്‍ വിവാദത്തില്‍ സ്വതന്ത്ര ഫോറം രൂപീകരിക്കും
dot image

എട്ട് വര്‍ഷം മുന്‍പ് ദക്ഷിണാഫ്രിക്കന്‍ പര്യടനത്തിനിടെ ലോക ക്രിക്കറ്റിനെ പിടിച്ചുകുലുക്കിയ പന്ത് ചുരണ്ടല്‍ വിവാദവുമായി ബന്ധപ്പെട്ട് 2018-ലെ ഓസ്ട്രേലിയന്‍ സ്‌ക്വാഡിലുണ്ടായിരുന്ന താരങ്ങളുടെ മൊഴികളും അനുഭവങ്ങളും കേള്‍ക്കുന്നതിനായി 'സ്വതന്ത്ര ഫോറം' രൂപീകരിക്കുമെന്ന് ക്രിക്കറ്റ് ഓസ്ട്രേലിയ പ്രഖ്യാപിച്ചു. മുന്‍ ഓസ്ട്രേലിയന്‍ ബാറ്റര്‍ ഉസ്മാന്‍ ഖവാജ തന്റെ ആത്മകഥയായ 'സബറില്‍' പന്ത് ചുരണ്ടല്‍ വിവാദത്തെക്കുറിച്ച് നടത്തിയ വെളിപ്പെടുത്തലുകള്‍ക്ക് പിന്നാലെയാണ് നീക്കം. കേപ്ടൗണില്‍ സംഭവം പുറത്തുവന്നപ്പോള്‍ ശിക്ഷിക്കപ്പെട്ട അന്നത്തെ ക്യാപ്റ്റന്‍ സ്റ്റീവ് സ്മിത്ത്, വൈസ് ക്യാപ്റ്റന്‍ ഡേവിഡ് വാര്‍ണര്‍, കാമറൂണ്‍ ബാന്‍ക്രോഫ്റ്റ് എന്നിവര്‍ക്ക് മാത്രമല്ല, ടീമിലെ എല്ലാവര്‍ക്കും ഇതിനെക്കുറിച്ച് അറിയാമായിരുന്നുവെന്നും ടീം ഒന്നടങ്കം ഇതിന്റെ ഉത്തരവാദിത്തം ഏറ്റെടുക്കണമെന്നും അദ്ദേഹം പുസ്തകത്തില്‍ ആവശ്യപ്പെട്ടിരുന്നു.

കേപ്ടൗണ്‍ ടെസ്റ്റിന് മുന്‍പ് ഗ്‌കെബെര്‍ഹയില്‍ നടന്ന ടെസ്റ്റിലും സാന്‍ഡ്പേപ്പര്‍ ഉപയോഗിച്ചിരുന്നുവെന്നും, 2017/18ലെ ആഷസ് പരമ്പരയ്ക്കിടെ റിവേഴ്‌സ് സ്വിംഗ് ലഭിക്കുന്നതിനായി പന്തിന്റെ സീമിന്റെ ഒരു ഭാഗം ഉയര്‍ത്തി പന്തില്‍ കൃത്രിമം കാണിച്ചിരുന്നുവെന്നും ഖവാജ വെളിപ്പെടുത്തി. എല്ലാ താരങ്ങളുടെയും മൊഴികള്‍ കേള്‍ക്കുമെന്നും, ദക്ഷിണാഫ്രിക്കന്‍ പര്യടനത്തിലെ സംഭവങ്ങളെച്ചൊല്ലി പുകയുന്ന വിവാദങ്ങള്‍ക്ക് ഇതൊരു 'സര്‍ക്യൂട്ട് ബ്രേക്കര്‍' ആകുമെന്ന് പ്രതീക്ഷിക്കുന്നതായും ക്രിക്കറ്റ് ഓസ്ട്രേലിയ വ്യക്തമാക്കി.

ചൊവ്വാഴ്ച വൈകുന്നേരം നടന്ന സി.എ ബോര്‍ഡ് യോഗത്തിന് ശേഷം നടത്തിയ പത്രസമ്മേളനത്തില്‍ ഇടക്കാല ചെയര്‍മാന്‍ ഡേവിഡ് ബൂണും ചീഫ് എക്‌സിക്യൂട്ടീവ് ടോഡ് ഗ്രീന്‍ബെര്‍ഗുമാണ് ഫോറം പ്രഖ്യാപിച്ചത്. താരങ്ങള്‍ക്കും സ്റ്റാഫുകള്‍ക്കും 'രഹസ്യസ്വഭാവമുള്ള അന്തരീക്ഷത്തില്‍' തങ്ങളുടെ ഭാഗം വിശദീകരിക്കാന്‍ ഇതിലൂടെ സാധിക്കുമെന്ന് അവര്‍ പറഞ്ഞു. എട്ട് വര്‍ഷം മുന്‍പ് നടത്തിയ പ്രാഥമിക അന്വേഷണം ക്രിക്കറ്റ് ഓസ്ട്രേലിയ വീണ്ടും നടത്തുകയാണെന്നും എന്നാല്‍ താരങ്ങള്‍ക്കോ സ്റ്റാഫുകള്‍ക്കോ പുതിയ ശിക്ഷകളൊന്നും നല്‍കില്ലെന്നും വ്യാഴാഴ്ച ഹൊബാര്‍ട്ടില്‍ ഗ്രീന്‍ബെര്‍ഗ് വ്യക്തമാക്കി. ഒരു മാസത്തിനുള്ളില്‍ നടപടികള്‍ പൂര്‍ത്തിയാകുമെന്നാണ് പ്രതീക്ഷിക്കുന്നത്. ഇതിനുശേഷം ഏതൊക്കെ വിവരങ്ങള്‍ പരസ്യപ്പെടുത്തണമെന്ന് സി.എ ബോര്‍ഡ് തീരുമാനിക്കും.

'മുന്നോട്ടുവരുന്നവരുടെ സ്വകാര്യത സംരക്ഷിക്കുന്നതോടൊപ്പം തന്നെ കഴിയുന്നത്ര സുതാര്യമായിരിക്കാന്‍ ഞങ്ങള്‍ ശ്രമിക്കും' ഗ്രീന്‍ബെര്‍ഗ് പറഞ്ഞു. '2018-ല്‍ കേപ്ടൗണില്‍ എന്താണ് സംഭവിച്ചതെന്നതിനെക്കുറിച്ചുള്ള പരസ്പരവിരുദ്ധമായ വെളിപ്പെടുത്തലുകള്‍ കേള്‍ക്കുമ്പോള്‍ ക്രിക്കറ്റ് എന്ന കായികവിനോദം ഇപ്പോള്‍ വേദനിക്കുകയാണ്. ഇത് ആര്‍ക്കും നല്ലതല്ല. നമുക്ക് ഇതിലൂടെ ഒരു വഴി കണ്ടെത്തേണ്ടതുണ്ട്, ഈ മുറിവുകള്‍ ഉണങ്ങേണ്ടതുണ്ട്' -അദ്ദേഹം കൂട്ടിച്ചേര്‍ത്തു. 2018-ലെ സംഭവത്തിന് ശേഷം അന്നത്തെ പുതിയ ക്യാപ്റ്റന്‍ ടിം പെയ്‌നും മുഖ്യ പരിശീലകന്‍ ജസ്റ്റിന്‍ ലാംഗറും ഡ്രസ്സിംഗ് റൂമില്‍ പുതിയൊരു സംസ്‌കാരം വളര്‍ത്തിയെടുക്കുകയും 'എന്ത് വിലകൊടുത്തും വിജയിക്കുക' എന്ന മാനസികാവസ്ഥ കര്‍ശന പരിശോധനയ്ക്ക് വിധേയമാക്കുകയും ചെയ്തിരുന്നു.

'അന്ന് സംഭവിച്ചതും ഇപ്പോള്‍ തുടരുന്നതുമായ കാര്യങ്ങള്‍ക്ക് അക്കാലത്ത് നിലനിന്നിരുന്ന സംസ്‌കാരവുമായി വലിയ ബന്ധമുണ്ട്. ആ സംസ്‌കാരം സൃഷ്ടിക്കുന്നതില്‍ ക്രിക്കറ്റ് ഓസ്ട്രേലിയയ്ക്കും പങ്കുണ്ടായിരുന്നു' -ഗ്രീന്‍ബെര്‍ഗ് സമ്മതിച്ചു. 'അത് തിരിച്ചറിഞ്ഞതുകൊണ്ടാണ് എത്തിക്‌സ് സെന്റര്‍ റിപ്പോര്‍ട്ടിന് രൂപം നല്‍കിയതും അതിലെ 42 ശുപാര്‍ശകളില്‍ 36 എണ്ണം നടപ്പിലാക്കിയതും' -അദ്ദേഹം വ്യക്തമാക്കി. കഴിഞ്ഞ എട്ട് വര്‍ഷമായി ക്യാപ്റ്റന്‍ പാറ്റ് കമ്മിന്‍സിന്റെയും മുഖ്യ പരിശീലകന്‍ ആന്‍ഡ്രൂ മക്‌ഡൊണാള്‍ഡിന്റെയും നേതൃത്വത്തില്‍ ടീം കെട്ടിപ്പടുത്ത സംസ്‌കാരത്തില്‍ സി.എ ചീഫ് എക്‌സിക്യൂട്ടീവ് അഭിമാനം പ്രകടിപ്പിച്ചു. അതേസമയം, 'സാന്‍ഡ്പേപ്പര്‍ഗേറ്റ്' വിവാദം രാജ്യത്തെ ക്രിക്കറ്റിനുണ്ടാക്കിയ വേദനയും മുറിവും അദ്ദേഹം അംഗീകരിക്കുകയും ചെയ്തു.

'കഴിഞ്ഞ എട്ട് വര്‍ഷമായി ടീം വളര്‍ത്തിയെടുത്ത സംസ്‌കാരത്തില്‍ ഞങ്ങള്‍ വളരെയധികം അഭിമാനിക്കുന്നു. ഞങ്ങളുടെ കളിക്കാരും പരിശീലകരും, പ്രത്യേകിച്ച് ഈ ടീമിനെ മികച്ച രീതിയില്‍ നയിക്കുന്ന പാറ്റ് കമ്മിന്‍സും ആന്‍ഡ്രൂവും മക്‌ഡൊണാള്‍ഡും വലിയ അഭിനന്ദനം അര്‍ഹിക്കുന്നു' -ഗ്രീന്‍ബെര്‍ഗ് പറഞ്ഞു. 'എന്നാല്‍ സാന്‍ഡ്പേപ്പര്‍ഗേറ്റുമായി ബന്ധപ്പെട്ട സംഭവങ്ങള്‍ ഉണ്ടാക്കിയ വേദനയും വിഷമവും ഞങ്ങള്‍ തിരിച്ചറിയുന്നു.' ക്രിക്കറ്റിന്റെ 'മികച്ച താല്‍പ്പര്യങ്ങള്‍ മുന്‍നിര്‍ത്തിയാണ്' ഈ തീരുമാനമെടുത്തതെന്ന് സി.എ ഇടക്കാല ചെയര്‍മാന്‍ ഡേവിഡ് ബൂണും പറഞ്ഞു. 2018-ലെ പര്യടനത്തിന്റെ പ്രത്യാഘാതങ്ങള്‍ ഓസ്ട്രേലിയന്‍ ക്രിക്കറ്റിലെ ചര്‍ച്ചകളില്‍ ഇപ്പോഴും തുടരുന്നുണ്ടെന്നും 'പലര്‍ക്കും അതൊരു പ്രയാസകരമായ അധ്യായമായിരുന്നുവെന്നും' അദ്ദേഹം ചൂണ്ടിക്കാട്ടി.

'എല്ലാ ഓസ്ട്രേലിയന്‍ ക്രിക്കറ്റ് ആരാധകരോടും നേരിട്ട് സംസാരിക്കാനാണ് ഞാന്‍ ആഗ്രഹിക്കുന്നത്. കഴിഞ്ഞ രാത്രി ക്രിക്കറ്റ് ഓസ്ട്രേലിയ ബോര്‍ഡ് യോഗം ചേരുകയും ക്രിക്കറ്റിന്റെ നന്മയ്ക്കായി ഞങ്ങള്‍ വിശ്വസിക്കുന്ന ഒരു തീരുമാനത്തിലെത്തുകയും ചെയ്തു' -ബൂണ്‍ പറഞ്ഞു. 'വിശദമായ ചര്‍ച്ചകള്‍ക്ക് ശേഷം, 2018-ലെ ദക്ഷിണാഫ്രിക്കന്‍ സംഭവങ്ങളില്‍ ഉള്‍പ്പെട്ട കളിക്കാര്‍ക്കും സ്റ്റാഫുകള്‍ക്കും അവരുടെ അനുഭവങ്ങളും കാഴ്ചപ്പാടുകളും പങ്കുവെക്കാന്‍ ഒരു ഫോറം രൂപീകരിക്കാന്‍ ഞങ്ങള്‍ തീരുമാനിച്ചു. ഏകദേശം ഒരു ദശാബ്ദത്തോളമായി ഈ സംഭവങ്ങളുടെ അലയൊലികള്‍ ഓസ്ട്രേലിയന്‍ ക്രിക്കറ്റിലെ ചര്‍ച്ചകളുടെ ഭാഗമാണ്. തുടരുന്ന ഈ വിവാദങ്ങള്‍ നമ്മുടെ കളിക്ക് വലിയൊരു ശ്രദ്ധ തിരിക്കലായി മാറിയിരിക്കുന്നു. ഇതിനൊരു വിരാമമിടാന്‍ സമയമായെന്ന് ഞങ്ങള്‍ വിശ്വസിക്കുന്നു.' 'ഭൂതകാലത്തെ വീണ്ടും വിചാരണ ചെയ്യാനല്ല ഈ ഫോറം. മറിച്ച്, തങ്ങളുടെ ഭാഗം കേള്‍പ്പിക്കാന്‍ ആഗ്രഹിക്കുന്നവര്‍ക്ക് മാന്യവും സുരക്ഷിതവുമായ അന്തരീക്ഷത്തില്‍ അവരുടെ കഥകള്‍ പറയാനും, നമ്മുടെ കായികലോകത്തിന് അത് കേള്‍ക്കാനുമുള്ള അവസരമൊരുക്കുകയാണ് ഇതിലൂടെ ലക്ഷ്യമിടുന്നത്' -ബൂണ്‍ വ്യക്തമാക്കി.

ഖവാജയുടെ വാദങ്ങളെ അദ്ദേഹത്തിന്റെ അടുത്ത സുഹൃത്തും മുന്‍ ഓപ്പണിംഗ് പങ്കാളിയുമായ ഡേവിഡ് വാര്‍ണര്‍ പിന്തുണച്ചിട്ടുണ്ട് (വാര്‍ണര്‍ക്കും സ്റ്റീവ് സ്മിത്തിനും 12 മാസത്തെ വിലക്കും ആജീവനാന്ത ക്യാപ്റ്റന്‍സി വിലക്കും ലഭിച്ചിരുന്നു). ഒരു ടെസ്റ്റ് മാത്രം കളിച്ചിട്ടുള്ള ബൗളര്‍ ചാഡ് സയേഴ്‌സും ഗ്‌കെബെര്‍ഹയില്‍ സാന്‍ഡ്പേപ്പര്‍ ഉപയോഗിച്ചിരുന്നുവെന്ന് വെളിപ്പെടുത്തിയിരുന്നു. നേരത്തെ 2021-ല്‍, ബൗളിങ് നിരയിലെ പ്രമുഖരായ പാറ്റ് കമിന്‍സ്, നഥാന്‍ ലിയോണ്‍, മിച്ചല്‍ സ്റ്റാര്‍ക്ക്, ജോഷ് ഹേസല്‍വുഡ് എന്നിവര്‍ പന്തിന്റെ രൂപമാറ്റം വരുത്താന്‍ ബാഹ്യവസ്തുക്കള്‍ ഉപയോഗിച്ചതിനെക്കുറിച്ച് തങ്ങള്‍ക്ക് യാതൊരു അറിവുമില്ലായിരുന്നുവെന്ന് സംയുക്ത പ്രസ്താവന ഇറക്കിയിരുന്നു. അടുത്തിടെ സിഡ്നിയില്‍ നടന്ന പത്രസമ്മേളനത്തില്‍, ഖവാജയുടെ അവകാശവാദങ്ങള്‍ 'തികഞ്ഞ അസംബന്ധമാണെന്ന്' പറഞ്ഞ ക്യാപ്റ്റന്‍ കമ്മിന്‍സ്, സുഹൃത്തുക്കളുടെ ജീവിതത്തെയും പ്രശസ്തിയെയും കുറിച്ച് ഖവാജ 'നിസ്സാരമായും അശ്രദ്ധമായും' പെരുമാറുകയാണെന്ന് കുറ്റപ്പെടുത്തി.

'ഞങ്ങള്‍ക്കെല്ലാം അറിയാമായിരുന്നു എന്ന് ഖവാജ പറയുമ്പോള്‍, ഗ്രൗണ്ടിലേക്ക് സാന്‍ഡ്പേപ്പര്‍ കൊണ്ടുപോകുന്നത് ഞങ്ങള്‍ക്ക് അറിയാമായിരുന്നു എന്നാണ് അദ്ദേഹം ഉദ്ദേശിക്കുന്നതെങ്കില്‍, അത് 100 ശതമാനം തെറ്റാണ്' -കമ്മിന്‍സ് പറഞ്ഞു. 'കഴിഞ്ഞ എട്ട് വര്‍ഷമായി ഞാന്‍ ഒരേ കാര്യമാണ് പറയുന്നത്; അങ്ങനെ സംഭവിക്കുന്നത് എനിക്ക് അറിയില്ലായിരുന്നു' 'എന്നാല്‍ ഉസ്മാന്‍ അതിനേക്കാള്‍ ഗുരുതരമായ കാര്യങ്ങളാണ് പറയുന്നതെന്ന് ഞാന്‍ കരുതുന്നു. സാന്‍ഡ്പേപ്പര്‍ ഉപയോഗിച്ച് പന്ത് ചുരണ്ടാനുള്ള പദ്ധതിയുടെ സൂത്രധാരന്മാര്‍ ഞാനും മറ്റുള്ളവരുമാണെന്ന് അദ്ദേഹം പറയുന്നു. അത് തികഞ്ഞ അസംബന്ധമാണ്' -കമ്മിന്‍സ് തുടര്‍ന്നു.

ഉസ്മാനെ ഇപ്പോഴും ഒരു സുഹൃത്തായി കാണുന്നുണ്ടെങ്കിലും, സഹതാരങ്ങളെക്കുറിച്ച് ഇത്തരത്തില്‍ നിരുത്തരവാദപരമായി കഥകള്‍ പറയുന്നതിനെതിരെ കമ്മിന്‍സ് രൂക്ഷമായി പ്രതികരിക്കുകയും അദ്ദേഹത്തിന് ഉത്തരവാദിത്തബോധം വേണമെന്ന് ആവശ്യപ്പെടുകയും ചെയ്തു. 'ഉസ്മാന്‍ ഒരു സുഹൃത്താണ്, പക്ഷേ സുഹൃത്തുക്കള്‍ പരസ്പരം ജീവിതത്തെയും പ്രശസ്തിയെയും ഇത്ര നിസ്സാരമായി കാണില്ല' -അദ്ദേഹം പറഞ്ഞു. 'തന്റെ പുസ്തകത്തിലൂടെ അദ്ദേഹം എന്റെ ജീവിതത്തെയും മറ്റു പലരുടെയും ജീവിതത്തെയും, ഓസ്ട്രേലിയന്‍ ക്രിക്കറ്റിനെയും നിസ്സാരവല്‍ക്കരിച്ചിരിക്കുകയാണ്. അദ്ദേഹത്തിന് തന്റെ കഥ പറയാന്‍ 100 ശതമാനം അവകാശമുണ്ട്, അതില്‍ എനിക്ക് സന്തോഷമുണ്ട്. പക്ഷേ നമ്മള്‍ പറയുന്നതും ചെയ്യുന്നതുമായ കാര്യങ്ങള്‍ക്ക് നമ്മള്‍ തന്നെ ഉത്തരവാദികളായിരിക്കണം' -കമ്മിന്‍സ് പറഞ്ഞു.

content highlights: Cricket Australia to Form Independent Forum to Record Players' Statements in Ball-Tampering Controversy

dot image
To advertise here,contact us
dot image