

ഐപിഎല് 2027 സീസണിന് മുന്നോടിയായി ഇംഗ്ലണ്ട് ഓള്റൗണ്ടര് സാം കറനെ ഉള്പ്പെടുത്തിയുള്ള ട്രേഡ് ഡീലിലൂടെ ഇന്ത്യന് പേസര് മുഹമ്മദ് ഷമി ലഖ്നൗ സൂപ്പര് ജയന്റ്സില് നിന്ന് രാജസ്ഥാന് റോയല്സിലേക്ക് മാറാന് ഒരുങ്ങുന്നതായി റിപ്പോര്ട്ട്. കരാറിന്റെ ഭാഗമായി സ്പിന്നര് എം. സിദ്ധാര്ത്ഥിനെ റിലീസ് ചെയ്യാനും ലഖ്നൗ സൂപ്പര് ജയന്റ്സ് സമ്മതിച്ചിട്ടുണ്ടെന്ന് റിപ്പോര്ട്ടില് പറയുന്നു.
2026 സീസണില് 9.00 ഇക്കോണമി റേറ്റില് 13 മത്സരങ്ങളില് നിന്ന് 12 വിക്കറ്റുകള് മാത്രമാണ് നേടിയതെങ്കിലും, 36-കാരനായ ഷമി ലഖ്നൗവിന്റെ ബൗളിംഗ് നിരയ്ക്ക് വലിയ അനുഭവസമ്പത്തും കരുത്തും നല്കിയിരുന്നു. കഴിഞ്ഞ സീസണില് സണ്റൈസേഴ്സ് ഹൈദരാബാദിനെതിരെ 9 റണ്സ് മാത്രം വഴങ്ങി 2 വിക്കറ്റ് വീഴ്ത്തിയ മിന്നും സ്പെല്ലിലൂടെ തന്റെ മാച്ച് വിന്നിംഗ് മികവും അദ്ദേഹം തെളിയിച്ചു. അടുത്തിടെയാണ് ഷമി ടെസ്റ്റ് ക്രിക്കറ്റില് നിന്ന് വിരമിക്കല് പ്രഖ്യാപിച്ചത്.
2024 മുതല് പവര്പ്ലേ ഓവറുകളില് 8.76 ഇക്കോണമി റേറ്റില് 14 വിക്കറ്റുകള് ഷമി വീഴ്ത്തിയിട്ടുണ്ട്. ഈ ട്രേഡ് യാഥാര്ത്ഥ്യമായാല്, കഴിഞ്ഞ സീസണില് രാജസ്ഥാന് റോയല്സിന്റെ പ്രധാന സ്ട്രൈക്ക് ബൗളറായിരുന്ന ജോഫ്ര ആര്ച്ചറിനൊപ്പം ചേര്ന്ന് പന്തെറിയാന് ഷമിക്ക് സാധിക്കും.
അതേസമയം, ട്രേഡ് പൂര്ത്തിയായാല് സാം കറന് എത്തുന്ന മൂന്നാമത്തെ ഐപിഎല് ഫ്രാഞ്ചൈസിയായിരിക്കും ലഖ്നൗ സൂപ്പര് ജയന്റ്സ്. നേരത്തെ രണ്ട് തവണ വീതം പഞ്ചാബ് കിങ്സ്, ചെന്നൈ സൂപ്പര് കിങ്സ് എന്നീ ടീമുകള്ക്കായി അദ്ദേഹം കളിച്ചിട്ടുണ്ട്. പരിക്കിനെത്തുടര്ന്ന് 2026 സീസണ് കറന് നഷ്ടമായിരുന്നു. കറന്റെ വരവ് ബാറ്റിംഗ് നിരയെ ശക്തിപ്പെടുത്താനും മത്സരത്തിന്റെ വിവിധ ഘട്ടങ്ങളില് പന്തെറിയാനും കഴിവുള്ള ഒരു മികച്ച ഓള്റൗണ്ടറെ ലഖ്നൗവിന് സമ്മാനിക്കും.
2022 ടി-20 ലോകകപ്പില് ഇംഗ്ലണ്ട് കിരീടം നേടിയപ്പോള് 'പ്ലെയര് ഓഫ് ദി ടൂര്ണമെന്റും' 'പ്ലെയര് ഓഫ് ദി ഫൈനലുമായി' തിരഞ്ഞെടുക്കപ്പെട്ട കറന്, ലഖ്നൗവിന്റെ ഒഴിഞ്ഞുകിടക്കുന്ന ക്യാപ്റ്റന് സ്ഥാനത്തേക്കും പരിഗണിക്കപ്പെടാന് സാധ്യതയുണ്ട്. 2026 സീസണിന് ശേഷം റിഷഭ് പന്ത് ക്യാപ്റ്റന് സ്ഥാനമൊഴിയുകയും തുടര്ന്ന് ട്രേഡിലൂടെ ഡല്ഹി ക്യാപിറ്റല്സിലേക്ക് മാറുകയും ചെയ്തതോടെയാണ് ലഖ്നൗവിന് പുതിയ നായകനെ ആവശ്യമായി വന്നത്. എയ്ഡന് മാര്ക്രം, നിക്കോളാസ് പൂരന്, മിച്ചല് മാര്ഷ്, ജോഷ് ഇംഗ്ലിസ് എന്നിവരാണ് ക്യാപ്റ്റന് സ്ഥാനത്തേക്ക് പരിഗണിക്കപ്പെടുന്ന മറ്റ് വിദേശ താരങ്ങള്. അതേസമയം, ഇടങ്കയ്യന് സ്പിന്നറായ എം. സിദ്ധാര്ത്ഥ് അടുത്തിടെ ടിഎന്പിഎല് കിരീടം നേടിയിരുന്നു. സയ്യിദ് മുഷ്താഖ് അലി ട്രോഫിയില് തമിഴ്നാടിനെ പ്രതിനിധീകരിക്കാന് ഒരുങ്ങുകയാണ് താരം ഇപ്പോള്.
content highlights: Big IPL 2027 Trade: Mohammed Shami Set to Join Rajasthan Royals, Sam Curran to LSG