ഭൂമിയില്‍ പകലും രാത്രിയും ഇല്ലാതായാല്‍ എന്ത് സംഭവിക്കും?

സൂര്യപ്രകാശമില്ലാത്ത ഭൂമിയെയും ഇരുട്ടില്ലാത്ത ലോകത്തെയും കുറിച്ച് ചിന്തിച്ചിട്ടുണ്ടോ? പകലും രാത്രിയും മാറിമാറി വരുന്നത് നമ്മുടെ ജീവിതത്തിന്റെ സ്വാഭാവിക ഭാഗമാണ്. എന്നാല്‍ ഈ ക്രമം തെറ്റിയാല്‍ ഭൂമിയിലാകെയും ജീവജാലങ്ങള്‍ക്കൊക്കെയും എന്തെല്ലാം മാറ്റങ്ങളുണ്ടാകും?

ഭൂമിയില്‍ പകലും രാത്രിയും ഇല്ലാതായാല്‍ എന്ത് സംഭവിക്കും?
dot image

രാവിലെ സൂര്യപ്രകാശം ഭൂമിയിലെത്തുമ്പോള്‍ ഒരു പുതിയ ദിവസം ആരംഭിക്കുന്നു. രാത്രിയാകുമ്പോള്‍ പ്രകൃതി വിശ്രമത്തിലേക്ക് കടക്കുന്നു. മനുഷ്യരുടെ ഉറക്കവും ജോലിയും മുതല്‍ സസ്യങ്ങളുടെ വളര്‍ച്ചയിലും മൃഗങ്ങളുടെ ജീവിതരീതിയിലും വരെ പകലും രാത്രിയും സ്വാധീനിക്കുന്നുണ്ട്. എന്നാല്‍ ഭൂമിയില്‍ എപ്പോഴും വെളിച്ചം മാത്രമായാലോ, അതല്ലെങ്കില്‍ സൂര്യപ്രകാശം പൂര്‍ണമായി ഇല്ലാതായാലോ എന്തു സംഭവിക്കും?.

എപ്പോഴും പകലായിരുന്നാല്‍ എന്തായിരിക്കും സംഭവിക്കുക?

ഭൂമി സ്വന്തം അച്ചുതണ്ടില്‍ കറങ്ങുന്നതുകൊണ്ടാണ് പകലും രാത്രിയും മാറിമാറി വരുന്നത്. ഈ ഭ്രമണം നിലയ്ക്കുകയും ഭൂമിയുടെ ഒരു ഭാഗം സ്ഥിരമായി സൂര്യനു നേരെ നില്‍ക്കുകയും ചെയ്താല്‍ ആ ഭാഗത്ത് തുടര്‍ച്ചയായി സൂര്യപ്രകാശം ലഭിക്കാം. ഇങ്ങനെ സംഭവിച്ചാല്‍ സൂര്യന് നേരെയുള്ള ഭാഗത്ത് താപനില ഉയരുകയും മറുഭാഗത്ത് കടുത്ത തണുപ്പ് അനുഭവപ്പെടുകയും ചെയ്യും. വളരെക്കാലം തുടര്‍ച്ചയായി ചൂട് ലഭിക്കുന്ന പ്രദേശങ്ങളില്‍ ജലത്തിന്റെ ലഭ്യതയും കാലാവസ്ഥയും മാറാം. സസ്യങ്ങളുടെയും മൃഗങ്ങളുടെയും മനുഷ്യരുടെയും അതിജീവനം വെല്ലുവിളിയാകും. എന്നാല്‍ സൂര്യനു നേരെയുള്ള ഭാഗത്തെ എല്ലാ നദികളും സമുദ്രങ്ങളും തിളച്ചുമറിയുമെന്നോ ചെടികളും മരങ്ങളും കത്തിയമരുമെന്നോ പറയാനാകില്ല. സംഭവിക്കുന്ന മാറ്റങ്ങള്‍ ഭൂമിയുടെ അന്തരീക്ഷം, മേഘങ്ങള്‍, സമുദ്രങ്ങള്‍, ചൂടിന്റെ വിതരണം തുടങ്ങിയ ഘടകങ്ങളെ ആശ്രയിച്ചിരിക്കും.

 day and night ceased to exist on Earth

സൂര്യപ്രകാശം പൂര്‍ണമായി ഇല്ലാതായാല്‍?

അതുപോലെ സൂര്യപ്രകാശം ഭൂമിയിലെത്തുന്നത് പൂര്‍ണമായി നിലച്ചാല്‍ സ്ഥിതി അതീവ ഗുരുതരമാകും. ഭൂമിക്ക് ലഭിക്കുന്ന പ്രകാശത്തിന്റെയും ചൂടിന്റെയും പ്രധാന ഉറവിടമാണ് സൂര്യന്‍. സൂര്യപ്രകാശമില്ലാതാകുന്നതോടെ ഭൂമി ക്രമേണ തണുക്കാന്‍ തുടങ്ങും. ആദ്യഘട്ടത്തില്‍ തന്നെ സസ്യങ്ങളുടെ വളര്‍ച്ചയെ ബാധിച്ചുതുടങ്ങും. സസ്യങ്ങള്‍ സൂര്യപ്രകാശം ഉപയോഗിച്ച് പ്രകാശസംശ്ലേഷണം നടത്തിയാണ് ഭക്ഷണം നിര്‍മിക്കുന്നത്. പ്രകാശം ലഭിക്കാതായാല്‍ ഈ പ്രക്രിയ തടസ്സപ്പെടും. ഭക്ഷ്യോല്‍പാദനം കുറഞ്ഞുവരുന്നതോടെ മനുഷ്യരും മറ്റ് ജീവജാലങ്ങളും വലിയ പ്രതിസന്ധിയിലാകും. ഭൂമിയിലെ താപനില തുടര്‍ച്ചയായി കുറയുകയും ജലാശയങ്ങള്‍ ക്രമേണ തണുത്തുറയുകയും ചെയ്യും. എന്നാല്‍ സമുദ്രങ്ങള്‍ മുഴുവനായും ഉടന്‍ ഐസായി മാറില്ല. വലിയ ജലാശയങ്ങള്‍ക്കുള്ളില്‍ സംഭരിച്ചിരിക്കുന്ന ചൂട് കാരണം അവ തണുക്കാന്‍ കൂടുതല്‍ സമയമെടുക്കും. സൂര്യന്‍ ഇല്ലാതാകുന്ന സാഹചര്യം ഭൂമിയുടെ ഭ്രമണപഥത്തെയും ഗുരുത്വാകര്‍ഷണത്തെയും ബാധിക്കുമെന്നതും പ്രധാനപ്പെട്ട കാര്യമാണ്. എന്നാല്‍ സൂര്യപ്രകാശം മാത്രം തടയപ്പെടുന്ന സാഹചര്യവും സൂര്യന്‍ അപ്രത്യക്ഷമാകുന്ന സാഹചര്യവും രണ്ടും വ്യത്യസ്തമാണ്.

മനുഷ്യരുടെ ഉറക്കത്തെ ബാധിക്കും

മനുഷ്യരുടെ ശരീരത്തിലെ ആന്തരിക സമയക്രമത്തെ നിയന്ത്രിക്കുന്നതില്‍ പകലും രാത്രിയും പ്രധാന പങ്കുവഹിക്കുന്നു. ഇതിനെ സര്‍ക്കാഡിയന്‍ റിഥം (Circadian Rhythm) എന്നാണ് വിളിക്കുന്നത്. പകലും രാത്രിയുമാണ് ശരീരത്തിന് എപ്പോള്‍ ഉണരണമെന്നും എപ്പോള്‍ ഉറങ്ങണമെന്നും തിരിച്ചറിയാന്‍ സഹായിക്കുന്നത്. ഇരുട്ട് 'മെലട്ടോണിന്‍' എന്ന ഹോര്‍മോണിന്റെ ഉല്‍പാദനത്തെ സ്വാധീനിക്കുന്നു. ഈ ഹോര്‍മോണ്‍ ഉറക്കവുമായി ബന്ധപ്പെട്ടതാണ്. പകലും രാത്രിയും തമ്മിലുള്ള സ്വാഭാവികമായ വ്യത്യാസം ഇല്ലാതായാല്‍ ശരീരത്തിന്റെ ഉറക്കക്രമം താളംതെറ്റാം. ഉറക്കക്കുറവ്, ക്ഷീണം, ശ്രദ്ധക്കുറവ്, മാനസിക സമ്മര്‍ദം തുടങ്ങിയ പ്രശ്‌നങ്ങള്‍ ഉണ്ടാകാനുള്ള സാധ്യതയുമുണ്ട്. എന്നാല്‍ വെളിച്ചമോ ഇരുട്ടോ ഇല്ലാത്തതുകൊണ്ട് മാത്രം എല്ലാവര്‍ക്കും ഒരേ തരത്തിലുള്ള ആരോഗ്യപ്രശ്‌നങ്ങള്‍ ഉണ്ടാകുമെന്ന് പറയാനാവില്ല. പ്രകാശത്തിന്റെ തീവ്രത, ഉറക്കശീലങ്ങള്‍, കൃത്രിമ വെളിച്ചത്തിന്റെ ഉപയോഗം തുടങ്ങിയ ഘടകങ്ങളും ഇതില്‍ സ്വാധീനം ചെലുത്തും.

 day and night ceased to exist on Earth

മൃഗങ്ങളുടെയും പക്ഷികളുടെയും ബാധിക്കും

പല ജീവജാലങ്ങളും പകലിനെയും രാത്രിയെയും ആശ്രയിച്ചാണ് ഭക്ഷണം കണ്ടെത്തുന്നതും സഞ്ചരിക്കുന്നതും പ്രജനനം നടത്തുന്നതും. പകല്‍ സജീവമാകുന്ന പക്ഷികള്‍ക്കും തേനീച്ചകള്‍ക്കും അതുപോലെ രാത്രിയില്‍ സജീവമാകുന്ന വവ്വാലുകള്‍ക്കും മൂങ്ങകള്‍ക്കും വ്യത്യസ്തമായ ജീവിതരീതികളുണ്ട്. വെളിച്ചത്തിന്റെയും ഇരുട്ടിന്റെയും സ്വാഭാവിക ക്രമം മാറുമ്പോള്‍ ഇവയുടെ ഭക്ഷണം കണ്ടെത്തല്‍, സഞ്ചാരം, വേട്ടയാടല്‍, പ്രജനനം തുടങ്ങിയ പ്രവര്‍ത്തനങ്ങള്‍ തടസ്സപ്പെടാം. ചില ജീവികള്‍ക്ക് പുതിയ സാഹചര്യങ്ങളോട് പൊരുത്തപ്പെടാന്‍ കഴിയുമെങ്കിലും മറ്റുചിലയ്ക്ക് അതിജീവനം പ്രയാസകരമാകും. ഇതിന്റെ പ്രത്യാഘാതം ഒരു ജീവിവര്‍ഗത്തെ മാത്രമല്ല ബാധിക്കുന്നത് മറ്റ് ജീവികളെയും സസ്യങ്ങളെയും ബാധിച്ചേക്കാം.

പകലും രാത്രിയും എത്രത്തോളം പ്രധാനമാണ്

പകലും രാത്രിയും വെളിച്ചത്തിന്റെയും ഇരുട്ടിന്റെയും മാറ്റം മാത്രമല്ല. ഭൂമിയുടെ കാലാവസ്ഥ, താപനില, ജലചക്രം, സസ്യങ്ങളുടെ വളര്‍ച്ച, ജീവികളുടെ പെരുമാറ്റം എന്നിവയെ സ്വാധീനിക്കുന്ന പ്രകൃതിയുടെ അടിസ്ഥാന ക്രമങ്ങളിലൊന്നാണിത്.ഭൂമിയിലെ ജീവന്റെ നിലനില്‍പ്പിനെ സഹായിക്കുന്ന ഒട്ടേറെ പ്രകൃതിനിയമങ്ങളുമായാണ് ഈ ക്രമം ബന്ധപ്പെട്ടിരിക്കുന്നത്.

Content Highlights :The alternating cycle of day and night is a natural part of our lives. But if this pattern were to be disrupted, what kind of changes would occur across the Earth and for all living beings?





                        
                        
                        


 


                        dot image
                        
                        
To advertise here,contact us
dot image