LIVE TV
റായ്പൂരില്‍ നടന്ന രണ്ടാം ടി20 മത്സരത്തില്‍ ക്യാപ്റ്റന്‍ സ്മൃതി മന്ഥാനയുടെയും ഷെഫാലി വര്‍മയുടെയും തകര്‍പ്പന്‍ പ്രകടനത്തിന്റെ കരുത്തില്‍ സിംബാബ്വെയെ ഒമ്പത് വിക്കറ്റിന് തകര്‍ത്ത് ഇന്ത്യന്‍ വനിതാ ടീം വിജയം നേടി. ഈ വിജയത്തോടെ മൂന്ന് മത്സരങ്ങളടങ്ങിയ ടി20 പരമ്പര ഒരു മത്സരം ശേഷിക്കെ 2-0 ന് ഇന്ത്യ സ്വന്തമാക്കി.
ടോസ് നേടി ബാറ്റിങ് തിരഞ്ഞെടുത്ത സിംബാബ്വെ ഉയര്‍ത്തിയ 103 റണ്‍സ് ലക്ഷ്യം 8.5 ഓവറില്‍ ഇന്ത്യ മറികടന്നു. അര്‍ധസെഞ്ചുറിയുമായി (55) ഷെഫാലി വര്‍മ ചേസിംഗില്‍ തിളങ്ങി.
ആദ്യം ബാറ്റ് ചെയ്ത സിംബാബ്വെയ്ക്ക് തുടക്കത്തില്‍ തന്നെ കൃത്യമായ ഇടവേളകളില്‍ വിക്കറ്റുകള്‍ നഷ്ടമായി. 8.1 ഓവറില്‍ 30/3 എന്ന നിലയിലേക്ക് അവര്‍ വീണു. തുടര്‍ന്ന് ചിപ്പോ മുഗേരി-തിരിപാനോയും (32 പന്തില്‍ 5 ഫോറുകളോടെ 34) ക്യാപ്റ്റന്‍ ജോസഫിന്‍ എന്‍കോമോയും (35 പന്തില്‍ 2 ഫോറുകളോടെ 27 നോട്ടൗട്ട്) ചേര്‍ന്ന് നാലാം വിക്കറ്റില്‍ 45 റണ്‍സിന്റെ കൂട്ടുകെട്ടുണ്ടാക്കി. നിശ്ചിത 20 ഓവറില്‍ സിംബാബ്വെ 102/8 എന്ന സ്‌കോറിലൊതുങ്ങി. ഇന്ത്യന്‍ ബൗളര്‍മാരില്‍ നീകി പ്രസാദ് (2 ഓവറില്‍ 2/7), ക്രാന്തി ഗൗഡ് (4 ഓവറില്‍ 1/15), ദീപ്തി ശര്‍മ്മ (3 ഓവറില്‍ 1/13) എന്നിവര്‍ മികച്ച പ്രകടനം പുറത്തെടുത്തു. ശ്രീ ചരണി, നന്ദിനി ശര്‍മ്മ എന്നിവരും ഓരോ വിക്കറ്റ് വീതം വീഴ്ത്തി.
103 റണ്‍സ് വിജയലക്ഷ്യവുമായി മറുപടി ബാറ്റിംഗിനിറങ്ങിയ ഇന്ത്യക്കായി സ്മൃതിയും ഷെഫാലിയും ചേര്‍ന്ന് സ്‌ഫോടനാത്മക തുടക്കമാണ് നല്‍കിയത്. 4.3 ഓവറില്‍ തന്നെ ടീം സ്‌കോര്‍ 50 കടന്നു. അഞ്ചാം ഓവറില്‍ ന്യാഷ ഗ്വാഞ്ചുറയെ അഞ്ച് ഫോറുകള്‍ക്ക് അതിര്‍ത്തി കടത്തിയ സ്മൃതിയുടെ പ്രകടനം കൂട്ടുകെട്ടിലെ പ്രധാന ആകര്‍ഷണമായി. തൊട്ടടുത്ത ഓവറില്‍ മിഷേല്‍ മാവുങ്കയെ രണ്ട് ഫോറുകളും ഒരു സിക്‌സറും സഹിതം ഷഫാലി ശിക്ഷിച്ചു. വെറും 24 പന്തില്‍ നിന്ന് ഷഫാലി തന്റെ 2026-ലെ ഒമ്പതാം 50+ സ്‌കോറിലെത്തി. 25 പന്തില്‍ 6 ഫോറും 4 സിക്‌സറും അടക്കം 55 റണ്‍സെടുത്ത ഷെഫാലിയെ പുറത്താക്കി ബിസെഡ് ബിസയാണ് 96 റണ്‍സിന്റെ ഓപ്പണിംഗ് കൂട്ടുകെട്ട് പൊളിച്ചത്.
തുടര്‍ന്ന് വന്ന അനുഷ്‌ക ശര്‍മ്മയെ (1 നോട്ടൗട്ട്) കാഴ്ചക്കാരിയാക്കി സ്മൃതി മന്ഥാന (25 പന്തില്‍ 6 ഫോറും 2 സിക്‌സും അടക്കം 47 നോട്ടൗട്ട്) ഒരു സിക്‌സറിലൂടെ 8.5 ഓവറില്‍ കളി അവസാനിപ്പിച്ചു.
2026ല്‍ കളിച്ച 26 മത്സരങ്ങളില്‍ ഇന്ത്യന്‍ വനിതകളുടെ 17-ാം ടി20 വിജയമാണിത്. ഒരു കലണ്ടര്‍ വര്‍ഷത്തില്‍ ഇന്ത്യന്‍ ടീം നേടുന്ന ഏറ്റവും കൂടുതല്‍ ടി20 വിജയങ്ങളാണിത്. ഇതിന് മുന്‍പ് 2018-ല്‍ കളിച്ച 23 പൂര്‍ണ്ണ മത്സരങ്ങളില്‍ നിന്ന് 16 വിജയങ്ങളായിരുന്നു ഇന്ത്യയുടെ റെക്കോര്‍ഡ്.
സ്മൃതിയും ഷെഫാലിയും ചേര്‍ന്ന് നടത്തുന്ന ഈ വര്‍ഷത്തെ ഒമ്പതാമത്തെ 50+ റണ്‍സ് കൂട്ടുകെട്ടാണിത്. വനിതാ ടി20 അന്താരാഷ്ട്ര മത്സരങ്ങളില്‍ ഒരു കലണ്ടര്‍ വര്‍ഷത്തില്‍ ഏത് ബാറ്റിംഗ് ജോഡിയും നേടുന്ന ഏറ്റവും ഉയര്‍ന്ന സംഖ്യയാണിത്. കൂടാതെ വനിതാ ടി20 ചരിത്രത്തില്‍ ഒരു കലണ്ടര്‍ വര്‍ഷത്തില്‍ ഏതൊരു വിക്കറ്റിലും 1000-ത്തിലധികം റണ്‍സ് കൂട്ടിച്ചേര്‍ക്കുന്ന ആദ്യ ജോഡിയായും ഇരുവരും മാറി.
ഒരു കലണ്ടര്‍ വര്‍ഷത്തില്‍ ഏറ്റവും കൂടുതല്‍ റണ്‍സ് നേടുന്ന താരമെന്ന റെക്കോര്‍ഡ് നിലവില്‍ ഷഫാലിക്കാണ് (26 ഇന്നിംഗ്‌സുകളില്‍ നിന്ന് 38.41 ശരാശരിയിലും 165-ന് മുകളില്‍ സ്‌ട്രൈക്ക് റേറ്റിലും ഒരു സെഞ്ചുറിയും എട്ട് അര്‍ദ്ധസെഞ്ചുറിയും അടക്കം 922 റണ്‍സ്). ഒരു കലണ്ടര്‍ വര്‍ഷത്തില്‍ ഏറ്റവും കൂടുതല്‍ 50+ സ്‌കോറുകള്‍ നേടുന്ന വനിതാ താരമെന്ന കാര്യത്തില്‍ സ്മൃതി മന്ഥാനയെ ഷഫാലി മറികടന്നു. 2024-ല്‍ സ്മൃതി 8 തവണ 50+ സ്‌കോര്‍ നേടിയപ്പോള്‍ ഈ വര്‍ഷം ഷഫാലി 9 തവണയാണ് 50-ന് മുകളില്‍ റണ്‍സ് കുറിച്ചത്.
content highlights: Smriti and Shafali Shine as India Thrash Zimbabwe by 9 Wickets to Seal Series
