LIVE TV
ഇന്ത്യക്കെതിരായ രണ്ടാം ഏകദിന മത്സരത്തിലെ തകര്പ്പന് പ്രകടനത്തിന് പിന്നാലെ ബാറ്റിങ് റെക്കോഡുകളില് പുതിയ ചരിത്രമെഴുതി ഇംഗ്ലണ്ട് സൂപ്പര് താരം ജോ റൂട്ട്. ഇന്ത്യക്കെതിരെ പുറത്താകാതെ 99 റണ്സ് നേടി ടീമിനെ വിജയത്തിലേക്ക് നയിച്ച ഇന്നിങ്സോടെ, ഏകദിന ക്രിക്കറ്റിലെ റണ്വേട്ടയില് ഇന്ത്യന് താരം വിരാട് കോഹ്ലിയുടെ നിര്ണായകമായ ഒരു റെക്കോര്ഡാണ് ജോ റൂട്ട് മറികടന്നത്.
കാര്ഡിഫിലെ സോഫിയ ഗാര്ഡന്സില് നടന്ന മത്സരത്തില് തകര്ച്ചയിലായ ഇംഗ്ലണ്ടിനെ റൂട്ടിന്റെ അസാമാന്യ ക്ഷമയും പരിചയസമ്പന്നതയുമാണ് വിജയതീരത്ത് എത്തിച്ചത്. 133 പന്തില് നിന്നാണ് റൂട്ട് 99 റണ്സ് അടിച്ചെടുത്തത്. സെഞ്ചുറിക്ക് ഒരു റണ്സ് അകലെ ടീം ലക്ഷ്യം കണ്ടതിനാല് സെഞ്ചുറി തികയ്ക്കാനായില്ലെങ്കിലും, റൂട്ടിന്റെ ഈ മാച്ച് വിന്നിങ് ഇന്നിങ്സ് ഇംഗ്ലണ്ടിന് പരമ്പരയില് ജീവന് നിലനിര്ത്താന് സഹായിച്ചു. ആദ്യമത്സരത്തില് ഇന്ത്യ ജയിച്ചിരുന്നു. രണ്ടാം മത്സരത്തില് ഇംഗ്ലണ്ട് ജയിച്ചതോടെ അവസാന മത്സരം നിര്ണായകമായി. ഈ ഇന്നിങ്സോടെ ഏകദിന ക്രിക്കറ്റിലെ റണ്ചേസുകളില് ഉയര്ന്ന ബാറ്റിങ് ശരാരിയുള്ള രണ്ടാമത്തെ താരമായി ജോ റൂട്ട് (91.59) നേട്ടമിട്ടു. വിരാട് കോഹ്ലിയെയാണ് (89.07) മറികടന്നത്. ഒന്നാം സ്ഥാനത്ത് എംഎസ് ധോണിയാണ് (102.71).
മത്സരത്തില് ഇന്ത്യ ഉയര്ത്തിയ 234 റണ്സ് വിജയലക്ഷ്യം പിന്തുടര്ന്ന ഇംഗ്ലണ്ട്, റൂട്ടിന്റെയും വില് ജാക്സിന്റെയും (30) മികച്ച ബാറ്റിങ്ങിന്റെ ബലത്തില് 4 വിക്കറ്റ് വിജയം സ്വന്തമാക്കുകയായിരുന്നു. ഇതോടെ മൂന്ന് മത്സരങ്ങളടങ്ങിയ ഏകദിന പരമ്പര 1-1 എന്ന നിലയിലായി. ജൂലൈ 19-ന് ലോര്ഡ്സിലാണ് പരമ്പരയിലെ നിര്ണായകമായ അവസാന മത്സരം.
content highlights: Joe Root surpasses Virat Kohli's ODI record
