LIVE TV
മഹേന്ദ്ര സിങ് ധോണിയുടെ ഫിറ്റ്നസും ചെന്നൈ സൂപ്പര് കിങ്സിലേക്കുള്ള മടങ്ങിവരവും ചര്ച്ചയാകാന് തുടങ്ങിയിട്ട് നാളുകളേറെയായി. ഇന്ത്യന് പ്രീമിയര് ലീഗ് ക്രിക്കറ്റില് ധോണി തിരിച്ചെത്തിയേക്കുമെന്ന് സൂചനകള് പലകുറി ടീം കോച്ചുള്പ്പടെ നല്കിയെങ്കിലും ഇതുവരെ ഗ്രൗണ്ടിലെത്തിയിട്ടില്ല. അതേസമയം, നിലവില് മികച്ച പ്രകടനം നടത്തുന്ന ചെന്നൈ നിരയിലേക്ക് ധോണി എത്താനിടയില്ലെന്നാണ് മുന് ഇന്ത്യന് താരം അനില് കുംബ്ലെ പറയുന്നത്. 'തന്റെ ഫിറ്റ്നസ് തിരിച്ചുപിടിക്കാനുള്ള ശ്രമത്തിലാണ് ധോണി. നെറ്റ്സില് മികച്ച പ്രകടനമാണ് അദ്ദേഹം നടത്തുന്നത്. എന്നാല് ഇപ്പോള് മികച്ച പ്രകടനം നടത്തുന്ന ടീമിലേക്ക് ധോണി തിരിച്ചെത്തിയേക്കില്ല. ചെന്നൈ സൂപ്പര് കിങ്സ് പ്ലേയിങ് ഇലവനിലേക്ക് വരാന് ധോണി ആഗ്രഹിക്കുന്നില്ലെന്നാണ് മനസ്സിലാക്കുന്നത്. നിലവിലെ ടീമില് കാര്യമായ മാറ്റങ്ങള് വരുത്താന് അവര് ആഗ്രഹിക്കുന്നില്ല' -കുംബ്ലെ പറയുന്നു. അതേസമയം, ധോണി ബാറ്റിങ് പരിശീലനത്തോടൊപ്പം വിക്കറ്റ് കീപ്പിങ് പരിശീലനവും തുടങ്ങിയതായി കുംബ്ലെ പറഞ്ഞു.
തുടക്കത്തില് ചെന്നൈ കളികള് തോറ്റപ്പോള് ധോണി തിരിച്ചെത്തുമെന്ന വാര്ത്തകള് വ്യാപകമായി പ്രചരിച്ചിരുന്നു. ധോണി തിരിച്ചെത്തുമെന്ന സൂചന നല്കി ചെന്നൈ കോച്ച് സ്റ്റീഫന് ഫ്ളെമിങ്ങോയും രംഗത്തെത്തി. ഇതോടെ പ്രതീക്ഷയിലായിരുന്നു ചെന്നൈ ആരാധകര്. എന്നാല് ഇതുവരെയുള്ള പ്ലേയിങ് ഇലവനിലൊന്നും ഇടംനേടാന് ധോണിക്കായില്ല. ധോണി തന്നെ മാറിനില്ക്കുകയാണ് എന്നാണ് പുറത്തുവരുന്നവിവരം.
നിലവില് റുതുരാജ് ഗെയ്ക്വാദ് നയിക്കുന്ന സംഘത്തില് സഞ്ജു സാംസണ്, കാര്ത്തിക് ശര്മ, ഉര്വില് പട്ടേല്, അകീല് ഹുസൈന്, ജാമി ഓവര്ട്ടണ്, നൂര് അഹമ്മദ്, അന്ഷുല് കംബോജ്, മുകേഷ് ചൗധരി, ഗുര്ജപ്നീത് സിംഗ് തുടങ്ങിയവര് മികച്ച പ്രകടനമാണ് നടത്തുന്നത്. ഈ ടീമില് വിശ്വാസത്തിലാണ് ചെന്നൈ മാനേജ്മെന്റ്.
content highlights: Training continues, but Dhoni is not playing; Former Indian star speaks on 'Thala's' comeback
