മഴയില് കിവീസിന്റെ റണ്മല ഇടിഞ്ഞു; പാകിസ്താന് 21 റണ്സ് വിജയം

ഡക്ക്വര്ത്ത് ലൂയിസ് നിയമപ്രകാരമാണ് പാകിസ്താന് നിര്ണായക വിജയം സ്വന്തമാക്കിയത്

റിപ്പോർട്ടർ നെറ്റ്‌വര്‍ക്ക്‌

2 min read|04 Nov 2023, 08:14 pm

ബെംഗളൂരു: ഏകദിന ലോകകപ്പില് സെമി സാധ്യതകള് സജീവമാക്കി പാകിസ്താന്. ബെംഗളൂരു ചിന്നസ്വാമി സ്റ്റേഡിയത്തില് നടന്ന മത്സരത്തില് ന്യൂസിലന്ഡിനെ 21 റണ്സിന് പാകിസ്താന് പരാജയപ്പെടുത്തി. ഡക്ക്വര്ത്ത് ലൂയിസ് നിയമപ്രകാരമാണ് പാകിസ്താന് നിര്ണായക വിജയം സ്വന്തമാക്കിയത്. ഫഖര് സമാന്റെയും (126) ക്യാപ്റ്റന് ബാബര് അസമിന്റെയും (66) തകര്പ്പന് ഇന്നിങ്സാണ് പാകിസ്താനെ അനായാസ വിജയത്തിലേക്ക് നയിച്ചത്.

കിവീസ് ഉയര്ത്തിയ 401 റണ്സെന്ന കൂറ്റന് വിജയലക്ഷ്യം പിന്തുടരാനിറങ്ങിയതായിരുന്നു പാകിസ്താന്. രണ്ടാം ഓവറില് തന്നെ പാകിസ്താന് ഓപ്പണര് അബ്ദുള്ള ഷഫീഖിനെ (4) നഷ്ടമായി. സ്കോര് ബോര്ഡില് വെറും ആറ് റണ്സുള്ളപ്പോഴാണ് പാകിസ്താന് വിക്കറ്റ് നഷ്ടമായത്. എന്നാല് രണ്ടാം വിക്കറ്റില് ക്യാപ്റ്റന് ബാബര് അസമിനെ കൂട്ടുപിടിച്ച് ഓപ്പണര് ഫഖര് സമാന് തകര്ത്തടിച്ചു.

ഇതിനിടെ 21.3 ഓവറില് പാകിസ്താന് ഒന്നിന് 160 റണ്സില് നില്ക്കെ ആദ്യം മഴ വില്ലനായി എത്തിയത്. ഇതോടെ പാകിസ്താന്റെ വിജയലക്ഷ്യം 41 ഓവറില് 342 റണ്സായി പുനര്നിശ്ചയിച്ചു. വീണ്ടും തുടങ്ങിയ മത്സരം 25.3 ഓവറില് 200 റണ്സെത്തിയപ്പോള് രസംകൊല്ലിയായി വീണ്ടും മഴയെത്തി. തുടര്ന്ന് മത്സരം പുനഃരാരംഭിക്കാനാകില്ലെന്ന് തീരുമാനിക്കുകയും പാകിസ്താനെ വിജയികളായി പ്രഖ്യാപിക്കുകയുമായിരുന്നു.

ഫഖര് സമാനും ബാബര് അസമും ചേര്ന്ന് രണ്ടാം വിക്കറ്റില് 194 റണ്സാണ് കൂട്ടിച്ചേര്ത്തത്. ഓപ്പണര് ഫഖര് സമാന് 81 പന്തില് നിന്ന് 126 റണ്സ് നേടി പുറത്താകാതെ നിന്നു. 11 സിക്സും എട്ട് ബൗണ്ടറിയുമടങ്ങുന്നതായിരുന്നു താരത്തിന്റെ ഇന്നിങ്സ്. ലോകകപ്പില് ഒരു പാകിസ്താന് താരം സ്വന്തമാക്കുന്ന ഏറ്റവും വേഗമേറിയ സെഞ്ച്വറിയാണിത്. ബാബര് 63 പന്തില് നിന്ന് ആറ് ഫോറും രണ്ട് സിക്സുമടക്കം 66 റണ്സെടുത്ത് പുറത്താകാതെ നിന്നു. ജയത്തോടെ എട്ട് മത്സരങ്ങളില് നിന്ന് എട്ടു പോയിന്റ് നേടിയ പാകിസ്താന് അഞ്ചാം സ്ഥാനത്തെത്തി. ഇതോടെ സെമി പ്രതീക്ഷ നിലനിര്ത്താനും ടീമിനായി.

ബെംഗളൂരു ചിന്നസ്വാമി സ്റ്റേഡിയത്തില് ബാറ്റിങ്ങിനിറങ്ങിയ ന്യൂസിലന്ഡ് നിശ്ചിത 50 ഓവറില് ആറ് വിക്കറ്റ് നഷ്ടത്തിലാണ് 401 റണ്സ് നേടിയത്. രച്ചിന് രവീന്ദ്രയുടെയും (108) ക്യാപ്റ്റന് കെയ്ന് വില്യംസണിന്റെയും മികച്ച ഇന്നിങ്സിന്റെ കരുത്തിലാണ് കിവീസ് പാകിസ്താനെതിരെ ഹിമാലയന് ടോട്ടല് സ്വന്തമാക്കിയത്. പാകിസ്താന് വേണ്ടി മുഹമ്മദ് വസീം മൂന്ന് വിക്കറ്റ് വീഴ്ത്തി.

ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ന്യൂസിലന്ഡിന് ഭേദപ്പെട്ട തുടക്കമാണ് ലഭിച്ചത്. ഓപ്പണര്മാരായ ഡെവോണ് കോണ്വോയും രച്ചിന് രവീന്ദ്രയും തകര്ത്തടിച്ചപ്പോള് ഒന്നാം വിക്കറ്റില് 68 റണ്സ് പിറന്നു. 11-ാം ഓവറിലാണ് ഡെവോണ് കോണ്വോയെ നഷ്ടപ്പെട്ടത്. 39 പന്തില് നിന്ന് 35 റണ്സ് നേടിയ കോണ്വോയെ മടക്കി ഹസന് അലി പാകിസ്താന് ബ്രേക്ക് ത്രൂ നല്കുകയായിരുന്നു. വണ് ഡൗണായി എത്തിയ ക്യാപ്റ്റന് കെയ്ന് വില്യംസണ് രച്ചിന് മികച്ച പിന്തുണ നല്കി ടീമിനെ മുന്നോട്ട് നയിച്ചു. രണ്ടാം വിക്കറ്റില് 180 റണ്സ് കൂട്ടിച്ചേര്ക്കാന് ഇരുവര്ക്കും കഴിഞ്ഞു.

എന്നാല് സെഞ്ച്വറി നേടാന് അഞ്ച് റണ്സ് ബാക്കിനില്ക്കേ ക്യാപ്റ്റന് വീണു. 35-ാം ഓവറില് ഇഫ്തിഖര് അഹമ്മദ് ഫഖര് സമാന്റെ കൈകളിലെത്തിച്ച് വില്യംസണിന്റെ പോരാട്ടം അവസാനിപ്പിച്ചു. 79 പന്തുകളില് നിന്ന് രണ്ട് സിക്സും പത്ത് ബൗണ്ടറിയുമടക്കമാണ് വില്യംസണ് 95 റണ്സ് നേടിയത്. തൊട്ടടുത്ത ഓവറില് രച്ചിന് രവീന്ദ്രയ്ക്കും മടങ്ങേണ്ടി വന്നു. ലോകകപ്പിലെ തന്റെ മൂന്നാം സെഞ്ച്വറി നേടിയതിന് പിന്നാലെ രവീന്ദ്രയെ മുഹമ്മദ് വസീം സൗദ് ഷക്കീലിന്റെ കൈകളിലെത്തിക്കുകയായിരുന്നു. 94 പന്തുകളില് നിന്ന് ഒരു സിക്സും 15 ബൗണ്ടറിയുമടക്കം 108 റണ്സായിരുന്നു രവീന്ദ്രയുടെ സമ്പാദ്യം.

പിന്നീടെത്തിയ ഡാരില് മിച്ചലും (18 പന്തില് 29) മാര്ക് ചാപ്മാനും (27 പന്തില് 39) കിവീസ് സ്കോര് 300 കടത്തി. അര്ധ സെഞ്ച്വറി നേടാന് ഒന്പത് റണ്സുകള് ബാക്കി നില്ക്കെ ഗ്ലെന് ഫിലിപ്സും പവലിയനിലെത്തി. വാലറ്റത്ത് ഒരുമിച്ച മിച്ചല് സാന്റ്നറും ടോം ലാഥമും കിവീസിനെ 400 കടത്തി. 17 പന്തില് 26 റണ്സെടുത്ത് സാന്റ്നറും രണ്ട് റണ്സ് നേടി ലാഥമും പുറത്താകാതെ നിന്നു.