Get the latest news at
your fingertips!
Download our app now
LIVE TV
Search
ഹൃദയ സ്തംഭനവും ഹൃദയാഘാതവും പ്രായഭേദമന്യേ എല്ലാവരേയും ഭയപ്പെടുത്തുന്ന ആരോഗ്യ പ്രശ്നമായി മാറിക്കഴിഞ്ഞു. മുന്പ് പ്രായമായവരില് കണ്ടുവന്നിരുന്ന ഹൃദയാഘാതം ഇന്ന് ചെറുപ്പക്കാരുടെ ജീവനും അപകടത്തിലാക്കുന്നുണ്ട്. ആരോഗ്യം സംരക്ഷിക്കേണ്ടത് അത്യാവശ്യമാണെങ്കിലും തിരക്കിട്ട ജീവിതത്തിനിടയില് പലരും ആരോഗ്യ സംരക്ഷണം മനപ്പൂര്വ്വം മറന്നുകളയുകയാണ്. ആരോഗ്യ സംബന്ധമായ പലതരം ബുദ്ധിമുട്ടുകള് ഉണ്ടാകുമ്പോള് ജോലി ഭാരവും മാനസിക സമ്മര്ദ്ദവും കാരണമാണ് അങ്ങനെ സംഭവിക്കുന്നതെന്ന് വിലയിരുത്തുന്നതിന് മുന്പ് സ്വന്തം ആരോഗ്യത്തെക്കുറിച്ച് ചിന്തിക്കേണ്ടതുണ്ട്. ബംഗളൂരു മണിപ്പാല് ആശുപത്രിയിലെ കാര്ഡിയോളജിസ്റ്റ് ഡോ. പ്രദീപ് ഹരണഹള്ളി ഹിന്ദുസ്ഥാന് ടൈംസിന് നല്കിയ ലേഖനത്തിലാണ് ഹൃദയത്തിന്റെ ആരോഗ്യം കുറഞ്ഞുവരുന്നതിന്റെ ലക്ഷണങ്ങളെക്കുറിച്ച് പറയുന്നത്.
ഹൃദയാഘാത വ്യവസ്ഥ സംഭവിക്കുന്നത് preserved ejection fraction, reduced ejection fraction എന്നീ രണ്ട് വിഭാഗങ്ങളായിട്ടാണ്. ഇവ രണ്ടും വേണ്ട ചികിത്സ നടത്താന് സഹായിക്കുമെങ്കിലും രോഗികള് അനുഭവിക്കുന്ന ലക്ഷണങ്ങള് പലപ്പോഴും സമാനമാണ്. ഈ ലക്ഷണങ്ങള് നേരത്തെ തിരിച്ചറിയുന്നത് അപകട സാധ്യതകള് ഒഴിവാക്കാന് സാധിക്കും.
ഹൃദയസ്തംഭനത്തിന്റെ ആദ്യ ലക്ഷണങ്ങളില് ഒന്ന് ശാരീരിക പ്രവര്ത്തനങ്ങള് ചെയ്യാനുള്ള കഴിവ് ക്രമേണെ കുറയുന്നതും ക്ഷീണം ഉണ്ടാകുന്നതുമാണ്. പ്രായമാകുമ്പോഴുണ്ടാകുന്ന ബുദ്ധിമുട്ടായി പലരും ഇതിനെ തള്ളിക്കളയുകയാണ് ചെയ്യുന്നത്. എന്നാല് ഈ ലക്ഷണം ഹൃദയസ്തംഭനത്തിന്റെ സൂക്ഷ്മമായ മുന്നറിയിപ്പ് സൂചനയായി കണക്കാക്കാമെന്നാണ് ഡോ. പ്രദീപ് പറയുന്നത്.
ശാരീരിക പ്രവര്ത്തനങ്ങള് കുറയുമ്പോള് ശരീരഭാരം കൂടാന് സാധ്യതയുണ്ടെന്ന് ഡോ. പ്രദീപ് ചൂണ്ടിക്കാട്ടി. പലപ്പോഴും കൊഴുപ്പിന് പകരം ശരീരദ്രാവകങ്ങള് അടിഞ്ഞുകൂടുമ്പോഴാണ് ഇങ്ങനെ സംഭവിക്കുന്നത്. ഇത്തരത്തില് ദ്രാവകം അടിഞ്ഞുകൂടുന്നത് കുടലുകളുടെ പ്രവര്ത്തനത്തെ ബാധിക്കും. ഇത് വിശപ്പ് കുറയുന്നതിനും ഭക്ഷണം കഴിഞ്ഞാലുടന് വയറ് വീര്ക്കുന്നതിനും കാരണമാകും.
കാലുകളിലുണ്ടാകുന്ന നീര്വീക്കം മറ്റൊരു പ്രധാന കാരണമാണ്. തുടക്കത്തില് ഈ ലക്ഷണം വൈകുന്നേരങ്ങളിലാണ് കാണപ്പെടുന്നത്. രാവിലെ ഉറങ്ങി എഴുന്നേല്ക്കുമ്പോള് അപ്രത്യക്ഷമാവുകയും ചെയ്യും. ഹൃദയാരോഗ്യം കൂടുതല് തകരാറിലാകുമ്പോള് നീര്വീക്കം ദിവസം മുഴുവന് നീണ്ടുനില്ക്കുകയും ചെയ്യും. മാത്രമല്ല ശ്വാസകോശത്തില് ദ്രാവകം അടിഞ്ഞുകൂടുകയും ശ്വാസതടസം. ചുമ, കിടക്കാന് ബുദ്ധിമുട്ട് എന്നിവ ഉണ്ടാവുകയും ചെയ്യും. ചിലര്ക്ക് ഉറക്കത്തില് ശ്വാസതടസവും ചുമയും ഉണ്ടാകുന്നു. ഈ അവസ്ഥ paroxysmal nocturnal dyspnea എന്നാണ് അറിയപ്പെടുന്നത്. ഈ ലക്ഷണങ്ങളൊക്കെ ശ്വാസകോശത്തില് ദ്രാവകം അടിഞ്ഞുകൂടുന്നതിനെയാണ് സൂചിപ്പിക്കുന്നത്.
ഹൃദയാരോഗ്യം തകരാറിലാകുമ്പോള് രാത്രിയില് മൂത്രമൊഴിക്കല് വര്ധിപ്പിക്കുന്നതിന് കാരണമാകുന്ന നാട്രിയൂററ്റിക് പെപ്റ്റെഡുകളുടെ വര്ധനവിന് കാരണമാകുന്നു. പതിവ് ആരോഗ്യ പരിശോധനകള് നടത്തുമ്പോള് നെഞ്ചിന്റെ എക്സറെകളിലുണ്ടാകുന്ന വ്യത്യാസം, രക്തപരിശോധനയില് ക്രിയേറ്റിനിന്, എന്ടി-പ്രോബിഎന്പി അളവ് വര്ധിച്ചതായി കാണുക തുടങ്ങിയ സൂചനകള് ഉണ്ടായേക്കാം. ഇതോടൊപ്പം പൊണ്ണത്തടി, പ്രമേഹം, രക്താതിമര്ദ്ദം ഇവയുളളവരും മുന്പ് ഹൃദയാഘാതം, ഹൃദ്രോഗങ്ങള് എന്നിവ വന്നിട്ടുള്ളവര് ഇവരിലൊക്കെ റിസ്ക് കൂടുതലാണെന്ന് ഡോ. പ്രദീപ് പറയുന്നു.
Content Highlights :Know the signs of declining heart health
