Get the latest news at
your fingertips!
Download our app now
LIVE TV
Search
കാന്‍സര്‍ ഉണ്ടാകുന്നത് പല ഘടകങ്ങളുമായി ബന്ധപ്പെട്ടിരിക്കുന്നു. എന്നാല്‍ കാന്‍സറും ഉയരവും തമ്മിലുള്ള ബന്ധം വളരെ അത്ഭുതമായി തോന്നിയേക്കാം. വേള്‍ഡ് കാന്‍സര്‍ റിസര്‍ച്ച് ഫണ്ട് പ്രകാരം ഉയരവും കാന്‍സര്‍ വരാനുളള സാധ്യതയും തമ്മില്‍ വളരെ അടുത്ത ബന്ധമുണ്ട്. പാന്‍ക്രിയാസ്, വന്‍കുടല്‍, ഗര്‍ഭാശയം(എന്‍ഡോമെട്രിയം), അണ്ഡാശയം, പ്രോസ്‌റ്റേറ്റ്, വൃക്ക, ചര്‍മ്മം, സ്തനങ്ങള്‍ (ആര്‍ത്തവ വിരാമത്തിന് മുന്‍പും ശേഷവും)എന്നിവയുടെ അര്‍ബുദം വരാനുള്ള സാധ്യത ഒരു വ്യക്തിയുടെ ഉയരവുമായി ബന്ധപ്പെട്ടിരിക്കുന്നുവെന്ന് പറയപ്പെടുന്നു.
അസാധാരണമായ കോശ വളര്‍ച്ച ശരീരത്തിലെ മറ്റ് കലകളെയും ബാധിക്കുന്ന അവസ്ഥയാണ് അര്‍ബുദം. ഒരു പരിധിവരെ ചികിത്സിച്ചാല്‍ ഭേദമാകുമെന്ന് വൈദ്യശാസ്ത്രം പറയുന്നു. പക്ഷേ ഉയരം കൂടുതലുളളവര്‍ക്ക് അര്‍ബുദ സാധ്യത കൂടുതലാകുന്നത് ഇപ്രകാരമാണ്. ഉയരമുള്ളവരില്‍ ആന്തരിക അവയവങ്ങള്‍ക്ക് വലിപ്പം കൂടുതലായിരിക്കും. കോശങ്ങളുടെ എണ്ണം കൂടുതലുമായിരിക്കും ഇത് അര്‍ബുദ കോശങ്ങള്‍ ഉണ്ടാകാനുള്ള സാധ്യത കൂട്ടുന്നു.
ഉയരം കൂടുന്നതിനുള്ള ഹോര്‍മോണുകളും ശാരീരിക പ്രത്യേകതകളും കാന്‍സര്‍ കോശങ്ങള്‍ രൂപപ്പെടാനുള്ള സാധ്യത വര്‍ധിപ്പിക്കുന്നു. ഉയരം കുറഞ്ഞ ആളുകള്‍ക്ക് പ്രോസ്‌റ്റേറ്റ് കാന്‍സറിനുള്ള സാധ്യത കുറവാണ്. ശരാശരി ഉയരമുളള സ്ത്രീകളില്‍ 500 പേരില്‍ 50 പേര്‍ക്ക് കാന്‍സര്‍ പിടിപെടുകയാണെങ്കില്‍ ഉയരം കൂടുതല്‍ ഉള്ളവരില്‍ 500 ല്‍ 60 പേര്‍ കാന്‍സര്‍ ബാധിതരാകുമെന്നാണ് കണ്ടെത്തല്‍. സ്ത്രീകളില്‍ 18 ശതമാനവും പുരുഷന്മാരില്‍ 11 ശതമാനവും രോഗസാധ്യത കൂടുന്നു. ഉയരം കൂടുതലുള്ള സ്ത്രീകളില്‍ സ്തനാര്‍ബുദ സാധ്യത 20 ശതമാനം കൂടുതലാണെന്നും പഠനം പറയുന്നു. ഉയരം കൂടുന്നവരില്‍ രക്തം കട്ട പിടിക്കുന്ന അവസ്ഥ, ഹൃദയസംബന്ധമായ രോഗങ്ങള്‍, പ്രമേഹം എന്നിവയ്ക്ക് സാധ്യതയുണ്ടെന്നും ഗവേഷകര്‍ കണ്ടെത്തിയിട്ടുണ്ട്.
ഉയരം കൂടുതലുള്ള എല്ലാവരും അര്‍ബുദ രോഗികളാവണമെന്നില്ല. നേരത്തെ കണ്ടെത്തിയാല്‍ ചികിത്സിച്ച് ഭേദമാക്കാവുന്ന രോഗമാണിത്. കാന്‍സര്‍ സാധ്യത കുറയ്ക്കുന്നതിന് ആരോഗ്യകരമായ ഒരു ജീവിതശൈലി സ്വീകരിക്കുക. പഴങ്ങള്‍, പച്ചക്കറികള്‍, ധാന്യങ്ങള്‍ എന്നിവ അടങ്ങിയ സമീകൃത ആഹാരം നിലനിര്‍ത്തുക. സംസ്‌കരിച്ച ഭക്ഷണങ്ങളും ചുവന്ന മാംസവും ഉപയോഗിക്കുന്നത് കുറയ്ക്കുക. പതിവായി വ്യായാമം ചെയ്യുക. മദ്യപാനം പരിമിതപ്പെടുത്തുക, സമ്മര്‍ദ്ദം നിയന്ത്രിക്കുക, മാത്രമല്ല പതിവ് മെഡിക്കല്‍ പരിശോധനകള്‍ നടത്തുന്നത് അസുഖം നേരത്തെ കണ്ടെത്താനും അപകട സാധ്യത കുറയ്ക്കാനും സഹായിക്കും.
Content Highlights :Studies show that taller people are more likely to develop cancer. The World Cancer Research Fund suggests that there is a strong link between height and cancer risk
