Get the latest news at
your fingertips!
Download our app now
LIVE TV
Search
ദശലക്ഷക്കണക്കിന് സ്ത്രീകള്‍ ഹോര്‍മോണ്‍ ഗര്‍ഭനിരോധന മാര്‍ഗങ്ങള്‍ ഉപയോഗിക്കാറുണ്ട്. ഗര്‍ഭധാരണം തടയാനും ആര്‍ത്തവ ചക്രം നിയന്ത്രിക്കുന്നതിനും സൗകര്യപ്രദവും ഫലപ്രദവുമായ മാര്‍ഗ്ഗമാണിത്. എന്നാല്‍ 'യൂറോപ്യന്‍ സ്‌ട്രോക്ക് ഓര്‍ഗനൈസേഷന്‍ കോണ്‍ഫറന്‍സി'ല്‍ അവതരിപ്പിച്ച സമീപകാല കണ്ടെത്തലുകള്‍ ഗര്‍ഭ നിരോധന മാര്‍ഗങ്ങള്‍ സ്വീകരിക്കുമ്പോഴുള്ള അപകട സാധ്യതയെ കുറിച്ച് മുന്നറിയിപ്പ് നല്‍കുന്നതാണ്.
ഗര്‍ഭനിരോധനത്തിനായി ഉപയോഗിക്കുന്ന ഗുളികകളില്‍ ഈസ്ട്രജന്‍, പ്രൊജസ്റ്റിറോണ്‍ എന്നീ ഹോര്‍മോണുകള്‍ അടങ്ങിയിട്ടുണ്ട്. ഇത് സ്ത്രീകള്‍ക്ക് 'ക്രിപ്‌റ്റോജെനിക് സ്‌ട്രോക്ക് ' ഉണ്ടാകാനുളള സാധ്യത ഗണ്യമായി വര്‍ധിപ്പിക്കും. (വ്യക്തമായ കാരണങ്ങള്‍ ഇല്ലാതെ സംഭവിക്കുന്ന പെട്ടെന്നുണ്ടാകുന്ന ഗുരുതരമായ ഒരുതരം സ്‌ട്രോക്ക് ആണിത്). സ്ത്രീകളില്‍ ഉണ്ടാകുന്ന സ്‌ട്രോക്കുകളില്‍ 40 ശതമാനവും ക്രിപ്‌റ്റോജനിക് സ്‌ട്രോക്കുകളാണ്. 18 നും 49 നും ഇടയില്‍ പ്രായമുള്ള ആളുകളില്‍ പെട്ടെന്നുണ്ടാകുന്ന പക്ഷാഘാതത്തിന്റെ കാരണങ്ങളെക്കുറിച്ച് നടത്തിയ അന്വേഷണത്തിലാണ് ഈ കണ്ടെത്തല്‍. ഗര്‍ഭനിരോധന ഗുളികകള്‍ ഉപയോഗിക്കുന്ന സ്ത്രീകള്‍ക്ക് ക്രിപ്‌റ്റോജെനിക് പക്ഷാഘാതം ഉണ്ടാകാനുള്ള സാധ്യത മറ്റുള്ളവരെ അപേക്ഷിച്ച് മൂന്നിരട്ടി കൂടുതലാണ്.
ഗര്‍ഭനിരോധന മാര്‍ഗ്ഗങ്ങളില്‍ ലൈംഗിക ഹോര്‍മോണുകളായ ഈസ്ട്രജന്റെ സിന്തറ്റിക്ക് പതിപ്പുകളും പ്രൊജസ്റ്റിറോണിന്‍റെ സിന്തറ്റിക് പതിപ്പുകളും അടങ്ങിയിരിക്കുന്നു. ശരീരത്തിലെ സ്വഭാവിക ഈസ്ട്രജന്‍ രക്തം കട്ടപിടിക്കുന്നതിനെ പ്രോത്സാഹിപ്പിക്കുന്നതില്‍ ഒരു പ്രധാന പങ്ക് വഹിക്കുന്നു. ഇത് മുറിവുകള്‍ ഉണങ്ങാന്‍ സഹായിക്കുന്നതിനും അമിത രക്തസ്രാവം തടയുന്നതിനും സഹായിക്കുന്നു. രക്തസ്രാവം നിര്‍ത്താന്‍ ഇത് സഹായകമാണെങ്കിലും, സ്‌ട്രോക്ക് പോലുള്ള അവസ്ഥകളിലേക്ക് നയിച്ചേക്കാവുന്ന അസാധാരണമായ രക്തം കട്ടപിടിക്കാനുള്ള സാധ്യത വര്‍ദ്ധിപ്പിക്കും.
പുകവലിക്കുന്നവര്‍, മൈഗ്രെയ്ന്‍ അനുഭവിക്കുന്നവര്‍ അല്ലെങ്കില്‍ രക്തം കട്ടപിടിക്കാനുള്ള ജനിതക പ്രവണതകള്‍ ഉള്ളവര്‍ എന്നിവരില്‍ അപകടസാധ്യത കൂടുതലായിരിക്കാം. തലച്ചോറിലേക്ക് രക്തം വിതരണം ചെയ്യുന്ന ഒരു ധമനിയില്‍ രക്തം കട്ടപിടിക്കുകയോ അല്ലെങ്കില്‍ പൊട്ടി തലച്ചോറിലേക്ക് രക്തപ്രവാഹത്തിലൂടെ സഞ്ചരിക്കുകയോ ചെയ്താല്‍, അത് രക്തപ്രവാഹത്തെ തടസ്സപ്പെടുത്തുകയും 'ഇസ്‌കെമിക് സ്‌ട്രോക്ക്' (തലച്ചോറിലെ ഒരു രക്തക്കുഴലില്‍ രക്തം കട്ടപിടിക്കുന്നത് തടയുമ്പോഴാണ് ഇസ്‌കെമിക് സ്‌ട്രോക്കുകള്‍ ഉണ്ടാകുന്നത്). ഇതാണ് ഏറ്റവും സാധാരണമായ തരം സ്‌ട്രോക്ക്.
രക്തം കട്ടപിടിക്കുന്നതിനു പുറമേ, ഈസ്ട്രജന്‍ രക്തസമ്മര്‍ദ്ദം ചെറുതായി വര്‍ദ്ധിപ്പിക്കുകയും കാലക്രമേണ രക്തക്കുഴലുകളുടെ പ്രവര്‍ത്തനത്തെ ബാധിക്കുകയും ചെയ്യും, ഇത് പക്ഷാഘാത സാധ്യത വര്‍ദ്ധിപ്പിക്കും.
ഈ കണ്ടെത്തലുകള്‍ സൂചിപ്പിക്കുന്നത് പക്ഷാഘാത സാധ്യതയുടെ പ്രധാന ഘടകമാണ് ഈസ്ട്രജന്‍ എന്നാണ്. ഗര്‍ഭനിരോധന ഗുളികകള്‍ ഉപയോഗിക്കുന്ന ഓരോ 100,000 സ്ത്രീകളിലും 40 ല്‍ താഴെ പേര്‍ക്ക് മാത്രമേ പക്ഷാഘാതം അനുഭവപ്പെടൂ എന്നതിനാല്‍ അപകട സാധ്യത കുറവാണ്.
Content Highlights :Birth control methods increase risk of stroke in women, study finds
