അത്യപൂര്‍വ്വമെങ്കിലും തൂക്കുകയറില്ല; സൂരജിനെ വധശിക്ഷയില്‍ നിന്ന് രക്ഷിച്ചത് പ്രായവും മാനസാന്തര സാധ്യതയും

ഉത്രവധക്കേസില്‍ പ്രതിയായ സൂരജിന് കൊലപാതകുറ്റം ഒഴികെ മറ്റെല്ലാ കേസുകളിലും പരമാവധി ശിക്ഷ വിധിച്ചുകൊണ്ടാണ് കൊല്ലം അഡീഷണല്‍ സെഷന്‍സ് കോടതിയുടെ നിര്‍ണ്ണായക വിധി പുറത്തുവന്നിരിക്കുന്നത്. വിധി പ്രസ്ഥാവത്തിന് മുന്‍പ് അപൂര്‍വ്വങ്ങളില്‍ അപൂര്‍വ്വമായി പരിഗണിക്കപ്പെടുന്ന സാഹചര്യങ്ങള്‍ വിവരിച്ച കോടതി ഉത്രവധക്കേസും അത്യപൂര്‍വ്വമാണെന്നാണ് നിരീക്ഷിച്ചത്. എന്നാല്‍ പ്രോസിക്യൂഷന്‍ ആവശ്യപ്പെട്ടതുപോലെ പരമാവധി ശിക്ഷയായ വധശിക്ഷയില്‍ നിന്ന് സൂരജിനെ കോടതി ഒഴിവാക്കി.

പ്രതിയുടെ പ്രായവും ക്രിമിനല്‍ പശ്ചാത്തലമില്ലാത്ത ഭൂതകാലവും പരിഗണിച്ചായിരുന്നു കോടതി വിധി. വധശിക്ഷയ്ക്ക് സുപ്രീംകോടതി നിശ്ചയിച്ചിട്ടുളള അഞ്ച് കുറ്റങ്ങളില്‍ നാലും പ്രതിയായ സൂരജ് ചെയ്തെന്ന് അവസാന വാദത്തില്‍ പ്രോസിക്യൂഷന്‍ കോടതിയെ ധരിപ്പിച്ചിരുന്നു. എന്നാല്‍ സൂരജിന്റെ പ്രായം ചെറുപ്പമാണെന്ന ഘടകം പരിശോധിച്ച കോടതി മാനസാന്തര സാധ്യത പരിഗണിച്ച് വധശിക്ഷ ഒഴിവാക്കുകയായിരുന്നു.

ഇതോടെ ഐപിസി 302-ാം വകുപ്പ് പ്രകാരം കൊലപാതകത്തിനും ഐപിസി 307 -ാം വകുപ്പ് പ്രകാരം വധശ്രമത്തിനുമായി ഇരട്ട ജീവപര്യന്തത്തിന് കോടതി സൂരജിനെ ശിക്ഷിച്ചു. കൊലപാതക കുറ്റത്തിന് ജീവപര്യന്തത്തിനൊപ്പം അഞ്ചു ലക്ഷം രൂപ പിഴയും പ്രതി ഒടുക്കണം.

കൊലപാതകം, വധശ്രമം എന്നീ കുറ്റങ്ങള്‍ക്ക് പുറമെ ഐപിസി 328-ാം വകുപ്പ് പ്രകാരം വിഷമുപയോഗിച്ച് ദേഹോപദ്രവം ഏല്‍പ്പിക്കാനുള്ള ശ്രമത്തിന് ലഭിക്കാവുന്ന പരമാവധി ശിക്ഷയായ പത്തുവര്‍ഷത്തെ തടവിനും, തെളിവ് നശിപ്പിക്കല്‍ തുടങ്ങിയ കുറ്റങ്ങളില്‍ ഐപിസി 201-ാം വകുപ്പ് പ്രകാരം പരമാവധി ശിക്ഷയായി ഏഴുവര്‍ഷത്തെ തടവിനും കോടതി വിധിച്ചു. ഈ 17 വര്‍ഷത്തിന് ശേഷമായിരിക്കും ഇരട്ട ജീവപര്യന്തിന്റെ കാലാവധി ആരംഭിക്കുക. കൊല്ലം ആറാം അഡീഷണല്‍ സെഷന്‍സ് കോടതി ജഡ്ജി എം മനോജാണ് കേസില്‍ വിധി പറഞ്ഞത്. പാമ്പിനെ കൊണ്ട് കടിപ്പിച്ച് ഒരാളെ കൊലപ്പെടുത്തിയ കേസില്‍ രാജ്യത്ത് ശിക്ഷിക്കപ്പെടാന്‍ പോകുന്ന ആദ്യ പ്രതിയാണ് സൂരജ്.

2018 മാര്‍ച്ച് 25 നായിരുന്നു ഉത്രയുടെയും സൂരജിന്റെയും വിവാഹം. വിവാഹം കഴിഞ്ഞ് രണ്ട് വര്‍ഷത്തോടടുക്കവെ 2020 മാര്‍ച്ച് രണ്ടിന് അടൂരിലെ വീട്ടില്‍ വെച്ച് ഉത്രയ്ക്ക് ആദ്യം പാമ്പ് കടിയേല്‍ക്കുന്നു. അണലിയുടെ കടിയേറ്റ ഉത്ര അന്ന് രക്ഷപ്പെട്ടു. എന്നാല്‍ ഈ സംഭവം നടന്ന് ഒന്നര മാസത്തിനു ശേഷം ഉത്രയ്ക്ക് വീണ്ടും പാമ്പ് കടിയേല്‍ക്കുകയും യുവതി മരിക്കുകയും ചെയ്തു. ജനലിലൂടെ വീടിനുള്ളില്‍ കയറിയ മൂര്‍ഖന്‍ പാമ്പ് ഭാര്യയെ കടിച്ചതാവാമെന്നാണ് അന്ന് സൂരജ് പറഞ്ഞത്. ഇതില്‍ ആര്‍ക്കും സംശയവും തോന്നിയില്ല. പാമ്പിന്റെ പക, ശാപം തുടങ്ങിയ അന്ധവിശ്വാസ വാദങ്ങളും അന്ന് പ്രചരിച്ചു. ഇതിനിടയില്‍ സൂരജിന്റെ ഭാഗത്ത് നിന്നുണ്ടായ പെരുമാറ്റങ്ങളാണ് ഉത്രയുടെ ബന്ധുക്കളില്‍ സംശയം തോന്നിച്ചത്. തുടര്‍ന്ന് ഇവര്‍ പൊലീസിനെ സമീപിച്ചതോടെ നാടിനെ നടക്കിയ ക്രൂരകൃത്യം പുറത്തായത്.