ആയിരം മുസ്‌ലിം ലീഗ് പ്രവര്‍ത്തകര്‍ എന്‍സിപിയില്‍ ചേരുമെന്ന് പിസി ചാക്കോ; 'മാണി സി കാപ്പന്‍ ഉള്‍പ്പെടെ പലരും പാര്‍ട്ടിയില്‍ ചേരാന്‍ ആഗ്രഹമുള്ളവര്‍'

മലപ്പുറം: മാണി സി കാപ്പന്‍ ഉള്‍പ്പെടെ പലരും എന്‍സിപിയില്‍ ചേരാന്‍ ആഗ്രഹമുള്ളവരാണെന്ന് എന്‍സിപി സംസ്ഥാന അദ്ധ്യക്ഷന്‍ പിസി ചാക്കോ. കോണ്‍ഗ്രസ്, മുസ്‌ലിം ലീഗ് പാര്‍ട്ടികളില്‍ നിന്നുള്‍പ്പെടെ നിരവധി പ്രവര്‍ത്തകര്‍ എന്‍സിപിയില്‍ ചേര്‍ന്നുകൊണ്ടിരിക്കുകയാണെന്നും ചാക്കോ പറഞ്ഞു.

കാസര്‍കോട് തൃക്കരിപ്പൂരില്‍ ഈ മാസം എന്‍സിപി സംഘടിപ്പിക്കുന്ന കണ്‍വെന്‍ഷനില്‍ 1000 മുസ്‌ലിം ലീഗ് പ്രവര്‍ത്തകര്‍ എന്‍സിപിയില്‍ ചേരുമെന്നും പിസി ചാക്കോ പറഞ്ഞു.

അതേ സമയം കോട്ടയത്തെ യുഡിഎഫിന്റെ കെ റെയില്‍ വിരുദ്ധ പ്രതിഷേധത്തില്‍ മാണി സി കാപ്പന്‍ പങ്കെടുത്തു. പ്രതിപക്ഷ നേതാവ് വിഡി സതീശന്‍ പങ്കെടുത്ത പരിപാടിയിലാണ് മാണി സി കാപ്പന്‍ എത്തിയത്. പ്രതിപക്ഷ നേതാവിനെ കാപ്പന്‍ ഷാള്‍ അണിയിച്ച് സ്വീകരിച്ചു. യുഡിഎഫ് അവഗണിക്കുന്നു എന്ന കാപ്പന്റെ പരസ്യ പ്രസ്താവനയ്ക്ക് ശേഷമുള്ള ആദ്യ പൊതുപരിപാടിയാണിത്.

വിഡി സതീശനെ ഷാളണിയിച്ച് സ്വീകരിച്ചതിന് പിന്നാലെ കാപ്പന്‍ വേദി വിട്ടു. എല്ലാം പ്രശ്‌നങ്ങളും കഴിഞ്ഞുവെന്ന് ഇതിന് പിന്നാലെ കാപ്പന്‍ മാധ്യമങ്ങളോട് പ്രതികരിച്ചു. ഒരു അസംതൃപ്തിയും ഇപ്പോള്‍ ഇല്ല. സംതൃപ്തി മാത്രമെന്നും അദ്ദേഹം കൂട്ടിച്ചേര്‍ത്തു.

യുഡിഎഫില്‍ സംഘാടനമില്ലെന്നും ആര്‍ക്കും ആരേയും എന്തും പറയാവുന്ന അവസ്ഥയാണെന്നുമായിരുന്നു കാപ്പന്റെ വിമര്‍ശനം. മുന്നണിയില്‍ അസ്വസ്ഥതകളുണ്ടെന്നും യുഡിഎഫ് പരിപാടികളൊന്നും അറിയിക്കുന്നില്ലെന്നും അദ്ദേഹം പരാതിപ്പെട്ടിരുന്നു. യുഡിഎഫിലെ പല ഘടകകക്ഷികളും സംതൃപ്തരല്ല. ആര്‍ക്കും ആരെയും എന്തും പറയാവുന്ന അവസ്ഥയാണ് യുഡിഎഫില്‍. എന്നാല്‍ ഇടതുമുന്നണിയില്‍ ഇത്തരം പ്രതിസന്ധിയില്ല. രമേശ് ചെന്നിത്തല സര്‍ക്കാരിനെതിരെ ആരോപണം ഉന്നയിക്കുമ്പോള്‍ അത് ഉന്നയിക്കേണ്ടത് താനാണെന്ന് വി.ഡി സതീശന്‍ പറയുന്നു. ഇത് സംഘാടനം ഇല്ലാത്തതിന്റെ പ്രശ്‌നമാണ്. സാഹചര്യങ്ങള്‍ ഇങ്ങനെയൊക്കെ ആണെങ്കിലും മുന്നണി മാറ്റം ആലോചിക്കുന്നില്ലെന്നും കാപ്പന്‍ പറഞ്ഞിരുന്നു.