LIVE TV
യുഎഇ ദിർഹത്തിന്റെ പുതിയ ചിഹ്നം ഇനി മുതൽ മൊബൈൽ ഫോണുകളിലും കമ്പ്യൂട്ടറുകളിലും ഉൾപ്പെടെ ഡിജിറ്റൽ ഉപകരണങ്ങളിൽ എളുപ്പത്തിൽ ഉപയോഗിക്കാം. ലോകമെമ്പാടുമുള്ള ഡിജിറ്റൽ ഉപകരണങ്ങളിൽ അക്ഷരങ്ങളും ചിഹ്നങ്ങളും ഏകീകൃതമായി ഉപയോഗിക്കാൻ സഹായിക്കുന്ന 'യൂണിക്കോഡ് സ്റ്റാൻഡേർഡ്' (Unicode Standard) പുതിയ ദിർഹം ചിഹ്നത്തിന് അംഗീകാരം നൽകി. യൂണിക്കോഡ് 18.0 പതിപ്പിലാണ് യുഎഇ ദിർഹത്തിനും ഒമാൻ റിയാലിനും ഉൾപ്പെടെയുള്ള പുതിയ കറൻസി ചിഹ്നങ്ങൾക്കും ഇമോജികൾക്കും പ്രത്യേക കോഡ് അനുവദിച്ചിരിക്കുന്നത്.
2025-ലാണ് യുഎഇ സെൻട്രൽ ബാങ്ക് ദിർഹത്തിന് പുതിയ കറൻസി ചിഹ്നം ഔദ്യോഗികമായി പുറത്തിറക്കിയത്. എന്നാൽ ഡിജിറ്റൽ തലത്തിൽ സാർവത്രികമായി ഉപയോഗിക്കാനുള്ള പ്രത്യേക കോഡിങ് സമ്പ്രദായം നിലവിലില്ലാത്തതിനാൽ ഇത് ഫോണുകളിലും കമ്പ്യൂട്ടറുകളിലും വലിയ തോതിൽ ഉപയോഗിക്കാൻ സാധിച്ചിരുന്നില്ല. യൂണിക്കോഡിന്റെ പുതിയ അംഗീകാരത്തോടെ ഈ പ്രതിസന്ധിക്ക് പരിഹാരമായിരിക്കുകയാണ്.
യുഎഇ ദിർഹം എന്നതിന്റെ ഇംഗ്ലീഷ് അക്ഷരങ്ങളെ ആസ്പദമാക്കിയാണ് സാർവദേശീയ തലത്തിൽ ശ്രദ്ധിക്കപ്പെടുന്ന ഈ ചിഹ്നം രൂപകൽപ്പന ചെയ്തിരിക്കുന്നത്. രാജ്യത്തിന്റെ ദേശീയ പതാകയിൽ നിന്നും പ്രചോദനമുൾക്കൊണ്ട് തയ്യാറാക്കിയ ഈ ഡിസൈനിലെ രണ്ട് തിരശ്ചീന രേഖകൾ (Horizontal lines) യുഎഇ ദിർഹത്തിന്റെ സാമ്പത്തിക സ്ഥിരതയെയും കരുത്തിനെയുമാണ് സൂചിപ്പിക്കുന്നത്.
യുഎഇയുടെ പരമ്പരാഗത സാംസ്കാരിക പാരമ്പര്യവും ഭാവിയിലേക്കുള്ള പുരോഗമനപരമായ കാഴ്ചപ്പാടും സമന്വയിപ്പിച്ചാണ് ഈ ചിഹ്നം നിർമ്മിച്ചിരിക്കുന്നത്. ഡിജിറ്റൽ പ്ലാറ്റ്ഫോമുകളിലും അച്ചടി മാധ്യമങ്ങളിലും ഒരുപോലെ കൃത്യതയോടെയും ഏകീകൃതതയോടെയും ഈ ചിഹ്നം ഉപയോഗിക്കുന്നതിനായി യുഎഇ അധികൃതർ പ്രത്യേക മാർഗ്ഗനിർദ്ദേശങ്ങളും പുറപ്പെടുവിച്ചിട്ടുണ്ട്.
Content Highlights: The UAE dirham symbol has received a key approval for digital use. The approval will allow the currency symbol to be incorporated into digital systems, including smartphones, computers and other electronic devices, making it easier to use the symbol across digital platforms.
