LIVE TV
ഇന്ത്യൻ സിനിമയിലെ പ്രശസ്തനായ സംവിധായകനും തിരക്കഥാകൃത്തും ആണ് സിംഗീതം ശ്രീനിവാസ റാവു. 1931-ൽ ആന്ധ്രപ്രദേശിലെ ഗുദൂരിൽ ജനിച്ച അദ്ദേഹം തെലുങ്ക്, കന്നഡ, തമിഴ്, ഹിന്ദി സിനിമകളിൽ പ്രവർത്തിച്ചിട്ടുണ്ട്. വ്യത്യസ്തമായ കഥപറച്ചിലും പരീക്ഷണാത്മകമായ സിനിമാശൈലിയുമാണ് അദ്ദേഹത്തെ വേറിട്ടു നിർത്തുന്നത്. ലോക സിനിമയിൽ വർഷങ്ങളായി നിലനിന്നിരുന്ന ഒരു റെക്കോർഡ് ഇപ്പോൾ തർക്കത്തിരിക്കുകയാണ് അദ്ദേഹം.
ഹോളിവുഡിലെ പ്രശസ്ത സംവിധായകൻ ക്ലിന്റ് ഈസ്റ്റ്വുഡ് കൈവശം വെച്ചിരുന്ന റെക്കോർഡ് ആണ് സിംഗീതം ശ്രീനിവാസ റാവു തിരുത്തുന്നത്. തന്റെ 61-ാമത്തെ സിനിമയായ “സിങ് ഗീതം” 94-ാം വയസ്സിൽ സംവിധാനം ചെയ്തിരിക്കുകയാണ് സിംഗീതം. ക്ലിന്റ് ഈസ്റ്റ്വുഡ് തന്റെ അവസാന സിനിമയായ “ജുറർ നമ്പർ 2” 93-ാം വയസ്സിൽ സംവിധാനം ആരംഭിച്ചിരുന്നെങ്കിലും, അത് റിലീസ് ചെയ്തത് 94-ാം വയസ്സിലായിരുന്നു. എന്നാൽ സിംഗീതം ഇതിനകം തന്നെ ഈ റെക്കോർഡ് മറികടന്നിരിക്കുകയാണ്. സജീവമായി സിനിമകൾ സംവിധാനം ചെയ്യുന്ന ലോകത്തിലെ ഏറ്റവും പ്രായം കൂടിയ സംവിധായകനായി മാറിയിരിക്കുകയാണ് ഇതോടെ സിംഗീതം ശ്രീനിവാസ റാവു.
കോമഡി, ഫാന്റസി, കുടുംബചിത്രങ്ങൾ, നിശ്ശബ്ദ സിനിമകൾ എന്നിവയിൽ ശ്രീനിവാസ റാവു തന്റെ കഴിവ് തെളിയിച്ചിട്ടുണ്ട്. അദ്ദേഹത്തിന്റെ ഏറ്റവും പ്രശസ്തമായ ചിത്രങ്ങളിൽ ഒന്ന് “പുഷ്പക വിമാന” ആണ്. സംഭാഷണമില്ലാത്ത ഈ കോമഡി സിനിമ ലോകമെമ്പാടും ശ്രദ്ധ നേടി.സാങ്കേതികതയിലും കഥപറച്ചിലിലും പുതിയ പരീക്ഷണങ്ങൾ നടത്തുന്നതിൽ അദ്ദേഹം എപ്പോഴും മുന്നിലായിരുന്നു. ഇന്ത്യൻ സിനിമയുടെ വളർച്ചയിൽ വലിയ സംഭാവന നൽകിയ വ്യക്തിയാണ് സിംഗീതം ശ്രീനിവാസ റാവു. പുതിയ തലമുറ സംവിധായകർക്ക് പ്രചോദനമായും അദ്ദേഹം തുടരുന്നു.
അതേസമയം, സിങ് ഗീതം ഇന്ത്യയിലെ ആദ്യത്തെ മ്യൂസിക്കൽ ഫാന്റസി സിനിമയായി പറയപ്പെടുന്നു. ഈ ചിത്രത്തിൽ അയാൻ, അഹില്യ ബാംറൂ, ശാലിനി കൊണ്ടെപുടി എന്നിവരാണ് പ്രധാന വേഷങ്ങളിൽ അഭിനയിക്കുന്നത്. ചിത്രം നാഗ് അശ്വിൻ നിർമ്മിച്ച് വൈജയന്തി മൂവീസ്, സ്വപ്ന സിനിമ ബാനറുകളിൽ നിർമ്മിച്ചിരിക്കുന്നു. ചിത്രം ജൂൺ 11-ന് ലോകമെമ്പാടും റിലീസ് ചെയ്യും.
Content Highlights: Veteran Indian filmmaker Singeetham Srinivasa Rao has surpassed a Hollywood director’s longevity record, becoming the world’s oldest active filmmaker while working on his 61st film “Sing Geetham,” a musical fantasy.
