LIVE TV
കൊച്ചി: ഒരു തരിയെങ്കില് ഒരു തരി പൊന്ന്, അത് മാലയുടെ രൂപത്തിലായാലും മോതിരത്തിന്റെ രൂപത്തിലായാലുമൊക്കെ വാങ്ങി സംരക്ഷിച്ച് പോരുന്നവരാണ് നമ്മുടെ നാട്ടില് പലരും. സ്ത്രീകളാണ് ഇത്തരം നിക്ഷേപത്തില് ഏറെ ശ്രദ്ധ പുലർത്താറുള്ളത്. ആ ശ്രദ്ധയിലൂടെ അവർക്ക് സ്വന്തമാക്കാന് സാധിച്ചിരിക്കുന്നത് നിക്ഷേപത്തിന്റെ ഇരട്ടിയിലേറെ മൂല്യമാണ്. ഇതിന് അധികം കാലം പിന്നോട്ടൊന്നും പോകേണ്ടതില്ല. ഉദാഹരണത്തിന് 2016-ൽ നിങ്ങൾ വാങ്ങിയ ഒരു സ്വർണ്ണാഭരണത്തിന് ഇന്ന് വിപണിയിൽ അഞ്ച് മടങ്ങോളമായിരിക്കും വില വർദ്ധിച്ചിരിക്കുന്നത്.
കേവലം പത്ത് വർഷം മുൻപ് നടത്തിയ ചെറിയ സ്വർണ്ണ നിക്ഷേപങ്ങൾക്ക് പോലും ഇന്ന് വൻ സാമ്പത്തിക മൂല്യമാണ് കൈവന്നിരിക്കുന്നത്. ഉദാഹരണത്തിന്, 2016-ൽ വിപണിയിൽ 22 കാരറ്റ് സ്വർണ്ണത്തിന് ഗ്രാമിന് ഏകദേശം 2600 രൂപ മുതൽ 3000 രൂപ വരെയായിരുന്നു വില. അക്കാലത്ത് ഒരു പവന് തൂക്കമുള്ള ഒരു സ്വർണ്ണമോതിരം പണിക്കൂലിയും നികുതിയും ഉൾപ്പെടെ ഏതാണ്ട് 22000-25000 രൂപയ്ക്കായിരുന്നു ആളുകള് വാങ്ങിയിരുന്നത്.
2024 ല് 22 കാരറ്റ് സ്വർണ്ണവില ഗ്രാമിന് ശരാശരി 14500 രൂപയ്ക്ക് മുകളിൽ എത്തിയതോടെ, അന്ന് വാങ്ങിയ അതേ ഒരു ഗ്രാമിന്റെ മോതിരത്തിന് ഇന്ന് സ്വർണ്ണവില മാത്രം ഏതാണ്ട് 116000 രൂപ വരും. ഇന്നത്തെ വിലയാണെങ്കില് പവന് 11240 രൂപയാണ് നിരക്ക് (ഗ്രാം 13905). ഇതിലേക്ക് നിലവിലെ പണിക്കൂലിയും ജിഎസ്ടിയും കൂടി കണക്കാക്കുമ്പോൾ ഇതിന്റെ ആകെ മൂല്യം 120000 രൂപ മുതൽ 122000 രൂപ വരെയായി മാറും.
മൂല്യം ഇത്രയധികം ഉയർന്നെങ്കിലും നിങ്ങളുടെ കൈവശമുള്ള പഴയ സ്വർണ്ണാഭരണങ്ങൾ വിൽക്കാൻ തീരുമാനിക്കുമ്പോൾ ചില കാര്യങ്ങൾ പ്രത്യേകം ശ്രദ്ധിക്കേണ്ടതുണ്ട്. ജ്വല്ലറികളിൽ പുതിയ സ്വർണ്ണത്തിന് കാണിക്കുന്ന അതേ വില്പ്പന വില വിൽക്കുമ്പോൾ നിങ്ങള് നേരിട്ട് ലഭിക്കില്ല. ആഭരണങ്ങളിൽ പതിപ്പിച്ചിട്ടുള്ള കല്ലുകൾ, മുത്തുകൾ, ഇനാമൽ വർക്കുകൾ എന്നിവയുടെ തൂക്കം മൊത്തം തൂക്കത്തിൽ നിന്നും ജ്വല്ലറികൾ കുറയ്ക്കും. ഇതിനുപുറമെ സ്വർണ്ണം ഉരുക്കി ശുദ്ധി പരിശോധിക്കുന്നതിനായി ചെറിയൊരു തുക പ്രൊസസിങ് ഫീസായും ഈടാക്കാറുണ്ട്. അതുകൊണ്ടുതന്നെ ഷോറൂമിൽ 120000 രൂപയ്ക്ക് മുകളിൽ മൂല്യം കാണിക്കുന്ന ഒരു പവന്റെ ഒരു മോതിരം തിരികെ കൊടുക്കുമ്പോള് ആഭരണത്തിന്റെ പരിശുദ്ധി അനുസരിച്ച് ഏതാണ്ട് 103000 മുതൽ 106000 രൂപ വരെയായിരിക്കും കൈയിൽ കിട്ടുക.
പണപ്പെരുപ്പത്തിനും സാമ്പത്തിക അസ്ഥിരതകൾക്കും എതിരെ എക്കാലത്തും മികച്ചൊരു പ്രതിരോധമാണ് സ്വർണ്ണം. ആഗോള പ്രതിസന്ധികളോ വിപണിയിലെ തകർച്ചയോ ഉണ്ടാകുമ്പോൾ മറ്റ് നിക്ഷേപങ്ങളെ അപേക്ഷിച്ച് സ്വർണ്ണം അതിന്റെ മൂല്യം കൃത്യമായി നിലനിർത്തുന്നു. കൂടാതെ, ആവശ്യമുള്ളപ്പോൾ എളുപ്പത്തിൽ പണമാക്കി മാറ്റാം എന്ന ഉയർന്ന ലിക്വിഡിറ്റിയും സ്വർണത്തിന്റെ വലിയൊരു സവിശേഷതയാണ്. പഴയ സ്വർണ്ണം വിൽക്കാൻ ആഗ്രഹിക്കുന്നവർ ഒന്നിലധികം പ്രമുഖ ജ്വല്ലറികളിലെ നിരക്കുകൾ താരതമ്യം ചെയ്യണമെന്നും വിദഗ്ദ്ധർ ഉപദേശിക്കുന്നു.
ആഭരണം വാങ്ങിയ സമയത്തുള്ള ബില്ലുകൾ, ഹാൾമാർക്ക് സർട്ടിഫിക്കറ്റുകൾ എന്നിവ കരുതുന്നത് സ്വർണ്ണത്തിന്റെ പരിശുദ്ധി തെളിയിക്കാനും മികച്ച മാറ്റിവെപ്പുമൂല്യം ലഭിക്കാനും സഹായിക്കും. തട്ടിപ്പുകൾ ഒഴിവാക്കാൻ എപ്പോഴും ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് (BIS) ഹാൾമാർക്കിങ് സംവിധാനമുള്ള ഗവൺമെന്റ് അംഗീകൃത വ്യാപാരികളെ മാത്രം സമീപിക്കാൻ ശ്രദ്ധിക്കണം. ഹ്രസ്വകാലയളവിൽ സ്വർണ്ണവിലയിൽ ഏറ്റക്കുറച്ചിലുകൾ സ്വാഭാവികമാണെങ്കിലും, ദീർഘകാല നിക്ഷേപമെന്ന നിലയിൽ സ്വർണ്ണം മികച്ചൊരു സമ്പാദ്യമായി തുടരുകയാണ്.
Content Highlights: Gold has generated impressive long-term returns between 2016 and 2026, with prices increasing nearly fivefold over the decade. The surge reflects strong investor demand, global economic uncertainties, inflation concerns, and the metal’s enduring appeal as a safe-haven asset for wealth preservation.
